¤سلطان¤
كنت نايم في غرفتي ودايخ لاقصى حد ماوعيت الا الباب ينفتح بكل دفاشة الدنيا وحسيت روحي بتطلع يوم طاح شي اثقل من المكيف على ظهري
حاولت ابعده واتحرك بس مافي فايده سمعت صوت ضحكه هامسه وعرفت انه اخوي الكبير لافي هذا حركاته مستحيل يبطلها )يتركها) يأست منه:لافي قم احسن لك يالدرام لا تحسب نفسك خفيف
"لوا لافي ايديني على ظهري بقوه ومسكهم بيد وحط ايده الثانية على راسي ورصها في المخده:انا من متى مطرش دحيم عشان يصحيك ها)طبعا دحيم هذا اخوي الصغير (عبد الرحمن) اخر العنقود عمره ٤ سنين)
تنهدت بكسل مافيني على صدعة الراس
قام لافي من فوقي ورمى اللحاف وفرك يدينه وسحبني من يديني بعد مالواها على ظهري كالعاده
مشيت معه للحمام وبمووووت من النوم دفني داخل الحمام وقبل مايسكر الباب:٥ دقايق وتصير جاهز عمى ماوراك جامعة
"وسكر الباب بقوه ، باختصار هذا حياتي دايم اصحى على هالاسلوب او اردى


¤عادل¤
دخلت مجلس بيت عمي بعد ما فتحت لي الشغالة وانا ادعو ربي يعدي هالليله على خير
دخل علي ذياب وسلم واستأذن عشان عنده دوام و طلع ينام
ظليت فتره استنى عمي تأخر حيل حتى فكرت ادق على نور واخليها تطلع من الباب الخلفي ولا من درى ولا من شاف تعوذت من ابليس ومن هالافكار الي بتوديني في داهيه قعدت افكر فتره وماحسيت باللي دخل
تنحم خالي وقفت وحبيت راسه وجلست
توي بتكلم الا رفع يده يعني اسكت
:اسمعني زين كانك مانت بكفو تهتم باختك رجعها عندي هنا زي ماكانت عندي اول)طبعا اختي بعد وفاة ابوي خذها خالي عنده لانها بنت ورعايتها صعبه في ها لوقت وامي كانت عنده معاي لين ماشتد عودي بعدها خلانا نطلع من عنده بشرط اهتم فيها وفي امي خاصه ان امي مصره ترجع بيت ابوي)
:نور مثل بنتي وما حد يرضاها على بنته تظل لحالها في بيت مكشوف وفي حاره بعيده ولا اي عذر في الدنيا يقدر يبرر تصرفك فاهم طالع لي انت والمدام امك مادري وين ذالفين فيه ومافكرتو ترجعون الا قريب العشا وياليتكم مخليين عفشكم عدل الكهربا طافيه على البنت ولا هي بقادره تتحرك براحتها في البيت صبرت لين ماتجون لا كن طلعتو راعيين طويله وبعدين انا كم مره قايل لك اذا قاصرك فلوس تعال عندي وعطيك ولا انك تماطل في تسديد الفاتوره لين ما قطعوها"وطلع شيك من جيبه ورماه في حضني":خذهم وشف حاجة اهلك ولا تقصر في حقهم ولا جبهم عندي كانك ماتبي تشيل مسؤليتهم
"سكت ولا قدرت اتكلم حسيت شكلي غلط وهو بعد ماقصر احرجني وسدد الفاتوره بس بعد حسيت نقص من رجولتي بكلامه كأني رخمه
طبعا طول ماهو يتكلم انا مانزلت راسي وعيني بعينه وباين ان هالشي رافع ضغطه زود شوي ويكفخني
ابتسمت في وجهه ابتسامه كبييييره وشلت الشيك وبكل رواقه طويته لين ما صار صغير وخالي بتطلع عيونه اخذت كاس الماي الي على الطاوله ودخلت الشيك فيه وانا للحين مبتسم وطلعت بوكي وطلعت ٥٠٠ ورميتها على الطاوله بدل الفاتوره مع انها كانت اقل وقفت على حيلي ونفظت يديني:يالله ياخال كثر الله خيرك انا ماشي وراي دوام بكره مع السلامة
وطلعت وخالي ساكت وعيونه طالعه برا منصدم
ركبت السياره وانا متضايق من خالي ما كان في اي مجال للنقاش ففضلت اني اروح احسن ارسلت لنور رساله اني هنا وحركت السياره لجهة الباب الخلفي شوي وجاتني نور تركض ركبت قدام وعلى طول مشيت
احسها بتموت كأنها ماصدقت تطلع من بيت خالي كل شوي تتلفت عشان تتأكد ان ماحد لحقها


¤نور¤
يووووه ما صدقت اطلع من بيت خالي صدق اني مهبوله شلون رحت له انا صرفت ساره وقلت اني ابي عصير وراحت المسكينه تسوي لي مادرت انها طلعت من هنا وانا انحشت من هنا التفت لعادل وكان لا بس ملابس الدوام البدله العسكريه والكبوس ونظارات قسم بالله انه خطيير فتنه هالولد ما شاء الله عيني عليه بارده
بس ما تجرأت اكلمه ولا حتى اسلم اخاف ينفجر في وجهي
بعد انا اساس البلى خلني ساكته بكرامتي ابرك


¤تركي¤
دخلت المستشفى ونفسي خايسه حتى ماشتهيت البس لبس رسمي مع ان اليوم المستشفى منقلبه فوق تحت بيجون مشرفين من وزارة الصحة يشيكون على الشغل وينفضون المستشفى نفض ويطلعون الفضايح يعني باختصار يسوون تصفيية حسابات للصادر والوارد
وهكذا...
لبست بنطلون كحلي وتيشيرت موف خاصه ان الجو معتدل
رحت للاداره اسجل حضوري في الساعه ٣ عصرا لأنهم يحسبون لك عدد ساعات المناوبه واذا زدت يمكن يعطونك بدل اتعاب
رحت المكتب ولبست البالطو وجهزت نفسي للكرف دقيت الزر وجاتني الممرضه وطلبت سجل المواعيد وبسرررعه ابي افتك مالي خلق وجع راس
استلمت اول ملف لرجال في الخمسينات اسمه عبدالملك يوووه مسكين حالته حاله اقلب الحالات المكتوبه في ملفه ارتفاعات للضغط واكثر من مره دخل في غيبوبة سكرهذا غير الي عنده كسر خاطري صراحه اعلنت في الجهاز اسمه مرتين واستنيته يجي لما يسمع النداء
تأخر ما جا تخيلت شكله كبير في السن حيل يدفونه بعربه
ناديته مره ثانيه وللحين ما شرف
كلمت الممرضه ابيها تشوف لي اياه يمكن كنسل الموعد عاد ياكررهي للي يسوون هالحركه يعطلونا ويسوون قلق
ويخربون على غيرهم
ارتفع ضغطي وعقدت حواجبي وبدا الشرر يطلع بنفجر هذا الي ناقصني مع هاليوم الزفت انا من صحيت وانا حاس ان اليوم مرض في مرض استغفر الله
شوي وانفتح الباب وسمعت الممرضه تقول: تفضلو
ما رفعت راسي ابد بس رديت السلام بعد تقول تفضلو حشى كم واحد افف
كملت البيانات وجهزت ورقة الكشف الجديده الي بتخش الملف حقه سكرت الممرضه الباب توي برفع راسي الا طاحت اوراق كثر النمل من ملفه حسيت الدخان يطلع من راسي من العصبيه عظيت شفايفي وجمعتهم قريت واحد فيهم بتمعن وقطبت حواجبي وشفت الثاني والثالث وكلهم وش هذا طارت عيوني معقول كلها كانت من اضخم المراكز والمستشفيات السعوديه والاوربيه وكلها نفس الاعراض وعند اسم المرض :سليم
يوووه شكل فيه شي ماحد بداري عنه والدليل انه كشف بعشرات الدول عن نفس المرض لكن نفس النتيجه
حسيت اني بدخل مغامره واو عاد لو اكتشفه انا ياسلام حركات ولا ليش جاي عندي اكيد انا مشهور اخص اخص
انتبهت لنفسي اني تأخرت عليه واجد ابتسمت على خفيف احسن خلني انتقم منه حتى هو اخرني رفعت راسي بلهفه ابي اشوف وجه هالمريض وكانت الطامة


¤ شوق ¤
طلعت من المحاضرة وما باقي دعوة الا دعيتها على هالدكتور المرض بعد اليوم هزئنا وبيطلع برا في الامتحان اففف دخلت الكفتيريا واه فاضيه عمى قضو عليه مافي الا عصيرات واشيا كثيره بس المعجنات مافييه شي وش هالشحافه
خذت لي جالكسي وبيبسي وجلست في الاستراحه
شفت نور تمشي مع خويتها اشرت لها واستأذنت من خويتها وجات :مرحبا
:اهلين خلصتي
"جلست تعدل اغراضها :اي بس محاضرة اليوم تخزي العين
"وقعدت تحرك حواجبها
"ابتسمت:لايكون عندكم علي
"خقت نور:لو سمحتي قولي الدكتور علي ياويلي بذبحهم ليه يشغلونه هنا هذا مفروض وزير او رئيس دوله اخ يجنن عسل بحول ادبي عشان اشوفه على طول حظهم الي هناك
"ضحكت على خبالها :اقول خلصي فطورك انا شوي ويجي السواق
"فتحت كيستها وقعدت تاكل:اقول وين نوف ماشفتها اليوم
:مادري عنها
"تركت الي في يدها :امحق خوات
"هفيتها بعلبة البيبسي :اي اشوفك مع اخوك عال العال
"وكأنها تذكرت شي:يوو ماقلت لك امس هزئني وشرشحني زين ما سويت الي خبرك من الخوف"وقمزت
"ضحكت عليها:هههه ليه وش مسويه
"قعدت تاكل:ابد رحت بيت خالي من غير ما استادن بحجة اني خايفه ماحد معي وشكل خالي هاوشه
:طيب وبعدين
"نور: ولا شي كلت تهزيئه يحبها قلبك من امي وبعدين من البرنسيس خيو
:يووه وش سويتي
"نور:دخلت الغرفه ونمت سيييده من غير عشاعشان اكسر خاطرهم خخخ
"وقفت وانا اعدل نفسي عشان امشي :وعسى جاب نتيجه
"دقت صدرها بقوه:افا عليك
:ليه شصار
"نور:قمت الصباح ميته جوع "وابتسمت وقعدت ترمش بعيونها بسرعه
"ضحكت عليها وانا ماشيه:بعذر شاريه حق قبيله
"غصت في الاكل وتأشر يعني قولي ماشا الله
"مديت لساني :مافي
سويت لها باي وكعت علي ضحكت من قلب عليها وطلعت



¤غدير¤
دخلت البيت بسرعه توي راجعه من الكليه في العصر وراي شغل كثير جسمي صار رشيق بسبب شغل البيت ولو ان الارهاق والهالات السود تحت عيني صارو سمه اساسيه فيني
بس لازم استمتع في شغلي ولا بموت قهر دخلت غرفتي الي من الظلم انها تسمى غرفه بدلت ملابسي ولبست دراعة بيت بنيه ساده بأكمام طويله رفعت شعري الطويل سويته زي الكعكه لانه مو ناعم كثير الا شين ومموج بس احب لونه الاسود و نعومة ملمسه ودايم يعايروني به لأن مرة ابوي شعرها حرير وعيالها كلهم طلعو عليها اما انا بس ناعم على خفيف طلعت بسرعه ودخلت المطبخ الي كان حوسه بديت الملم الاغراض وارمي الوسخ لين ما فضى بلاط المطبخ بعدها رتبت الرفوف وانا منهمكه حسيت بحركه وراي لفيت وجهي شفت ريم فاتحه الثلاجه لفيت اكمل شغلي هالبنت ما اطيقها بشكل
ينرفزني لبسها العاري وكلامها مع الرجال بمياعه والله لو يدري ابوي قطعها وشرب من دمها بس ماتهون علي ماودي اعلم عليها جات جنبي وهي ماسكه علبة بيبسي شكلها تبي تتهاوش طنشتها ولا كأنها موجوده
شدني شي فيها التفت لها ياه وش هذا لابسه تنوره رصصص سوده لنص فخذها وبلوزه عنابيه لنص البطن بدون اكمام قسم بالله قرف صديت عنها بقرف وباستهزاء قالت:يوووه شكلي مادخلت مزاجك
"حسيت بغثيان وطالعتها باشمئزاز :روحي تستري بدل هالخلاعه وقلة الحيا
"ضحكت بشكل حوم كبدي وردت:شوفي انا مو جايه هنا اتخانق معك "قربت مني" انا جايه اعقد صلح
:اوووه غريبه وليه ان شاء الله
"تسندت على الطاوله:امم تقدرين تقولين مليت
:حلوو ماعندي مانع
"ابتسمت بطريقه غريبه:اوكي انا اليوم عازمتك
"قاطعتها:لالالالا اذا السالفه فيها طلعه برا البيت اسمحي لي ماقدر
"ريم:لا لا تطمني في البيت
:طيب
"طلعت من المطبخ وشي داخلي مو مطمن صحيح اني دوم هواش معها بس بعد احنا نسولف على خفيف لكن مادري الله يستر منها


¤تركي¤
ابد ماصدقت نفسي يؤ يؤ يؤ يؤ يجي ٧ اشخاص في الغرفه شلون ما حسيت لما دخلو كل واحد طول بعرض في منهم الزين والشين ومتفاوتين في العمر في الواضح انه عشريني وفي اربعيني بس معهم واحد باين اثقلهم كبير مررره جالس على الكنبه الثلاثيه ومعه ٢ كبار بعد على نفس الكنبه واثنين كل واحد جالس على طرف نفس الكنبه الثلاثية بس على طرفها يعني كأنهم متسندين والاثنين الي بقو كل واحد جالس في كنبه منفرده ولفتني لبسهم الثوب يصقل من النظافه والنعل تلمع اف اف شكلهم عيال بطرا خخخ كانو يسولفون على خفيف انتبهو لي وطالعوني كلهم حطيت يدي اليسرى تحت خدي واليمين حطيتها على الطاوله وجلست اطق بأصابعي على الطاوله وانا اطالعهم واحد واحد من غير اي كلام ظلو ساكتين ومستغربين بس ماحد تجرأ أنه يخترق الصمت ابتسمت في وجه واحد فيهم باين انه اصغرهم كان جالس لحاله بكنبه رد لي الابتسامه وعينه بتطلع من الاستغراب اخيرا قررت اقطع الصمت:اممم ايش تشربون
ماحد رد علي بعدين تكلم واحد شكله عصبي:اعتقد هذا مو وقت تقهوينا فيه ولا شرايك تعزمنا بعد حاط عينك على الورق من اول مادخلنا ولا كلفت نفسك تسأل عن المريض " ولف للرجال الكبير ":انا قلت لك يبا من البدايه ماله داعي نجي عند هذا شكله ابد ماعنده خبره مادري وش الي عاجبك فيه
"تسندت على الكرسي ورفعت رجلي اليمين وحطيت طرفها على رجلي اليسار ومسكتها بيدي اليسار واهزها بخفه عشان اخذ راحتي وبرواقه:اوبس... اقترح عليك يا أخ انك ماترفع صوتك
"طلعت عينه واسود وجهه "
توه بيتكلم لكن نزلت رجلي ووقفت وجيت قدام الطاولة وتسندت عليها وايديني على طرفها: سواد تحت العين اصفرار للوجه تضخم للجفن قبض شديد لليد مع تعرق وحبتين رجفان وعصبية مالأمها داعي هذا ايش معناته
"ظل يطالعني وتغيرت ملامح وجهه من تجهم لتعجب"
ابتسمت بتشفي عليه :امم تعاني يا أخي العزيز من ارق شديد وما تنام الا بمنوم في الحالات الغصوى و تعالجت وعطوك ابر سببت مضاعفات وصرت تعاني من تقرحات في المعده وجاتك اكثر من مره نزلات معوية حاده هذا غير الضغط طبعا
"هنا الكل طارت عيونه بجد"
:وبناء على ماسبق قلت ماله داعي ترفع صوتك لأن حدته توتر اعصابك وبيزيد اضطرابات معدتك
انصفق وجهه وماقدر يتكلم وبدو يتهامسون
طالعت في ساعتي وشفت اني طولت وبسرعه شلت السماعه وطلبت النيرس ثواني وهي عندي
:في غرفه فاضيه
النيرس:نو دوكتور
:امم طب الحديقه
النيرس:اف كورس نت
"التفت لهم:من المريض
التفتو لأكبرهم
قلت بهدوء :من عادتي احب اخلو مع مرضاي فاخذو راحتكم في الغرفه ريثما انتهي
"حسيت مافهمو علي شلت شنطتي ومديت يدي للمريض
:عبدالملك صح
مد يده يصافحني:اي نعم
شديت على يده وسحبته ووقفته
:تفضل معي
اعترضو الي معه واصريت على رأيي :اذا ماتبوني اجلس معه بروحي انا اعتذر عن علاجه
ورجعت مكتبي
جاني واحد:انت على ايش شايف نفسك اييي اصحى وفتح عينك عدل واعرف من تكلم
انا بغمضة عين اطيرك من هالكرسي
صراحه رفع ضغطي وسد نفسي وانا مو ناقص ابد
ماعطيته وجه ولفيت وجهي لكبيرهم : لو سمحت تبيني اعالجك لازم انفرد بك
هذا الي عندي
"التفت للي معه وبإشاره وحده من اصبعه فضت الغرفه هذا طبعا بالاضافه لكلمات السب الي يتهامسون بها ما غابت عن اذني
وقفت ورحت لسرير الكشف وقام معي جلس عليه رمى الشماغ والطاقيه والعقال على السرير رفعتهم انا للطاوله
فتح ازارير ثوبه وانسدح على السرير
وغمض عينه باين عليه الهم والكدر شايل هموم الدنيا على ظهره لدرجة اني حسيت ان مرضه نفسي مو جسمي
حبيت ابدا جلستي العلاجيه الأولى على طريقتي
:عبد الملك اسمك حلو
فتح عيونه و التفت لي وعلى وجهه شبح ابتسامه : تحلى ايامك
جلست على الكرسي : يالله تفضل تكلم قول وش تحس به ومن امتى وكيف يجيك وهل تعالجت عنه من قبل سولف سولف انسى نفسك وتكلم
سكت وهو يطالعني صد للجهه الثانيه وبدا يتكلم عن مرضه بكل هدوء بعد ماخلص قمت شخصته وطلبت منه تحاليل وكتبت له موعد يراجعني فيه
ودخلت الي بعده


¤سامي¤
صحيت من النوم على ضجه وصراخ طلعت من غرفتي ورحت لجهة السور شفت الكنبات محذفه والحوسه ماليه المكان ونوف وشوق شابه عندهم شكلها ضرابه صرخت عليهم والتفتو لي و كل وحده جلست في كنبه لأن الانسحاب دليل على الهزيمه وهذا الي لايمكن يصير
دخلت وتروشت ونزلت تحت والوضع كما هو عليه اللهم جاو الشغالات يرتبون فقط
جلست جنب نوف ارتاح لها اكثر من شوق الدلع ولو ان نويف ماتقصر بس تعتبر اهون
:شعندكم صراخكم واصل لبرا استحو على وجيهكم كبار وكأنكم مبزره
"طبعا التطنيش على كيف كيفك ماحد ماعطني وجه جلست معهم شوي اطالع الفيلم وطلعت فوق لما حسيت بألم في صدري هالفتره لازم ارتاح كثير لين مايتحسن التنفس

>غدير>
على الساعة ١١ خلصت شغل البيت كلله رحت بحط راسي خلاص وصلت معي شفت ريم واقفه عند باب غرفتي اوه نسيت حفلتها ذي بعد
:ريم خليها بكره تعبانه حدي
ريم:لا لالا يالله سبحي وتعالي غرفتي
"وراحت من قدامي اف دخلت وسبحت ولبست فستان ساده طويل وردي فاتح وضيقته من البطن لأنه وسيع شاريته بالخش والدس رفعت شعري لفوق ونزلت غرتي
رحت لها طقيت الباب ودخلت مجهزه سفره بناتيه اقص ايدي لو انها سوت شي منهم باين انهم من محلات راقيه التفت لها وكانت كعادتها لابسه فستان اصفر بدون اكمام بس خيوط ضعيفه الى تحت الركب بشوي وفاتحه شعرها الكيرلي وانواع الاصباغ في وجهها
بس عجبني شكلها جلست معها وسولفنا شوي ودخت انا خلاص ابي انام
:ريم مشكوره تعبتك معي بس خلاص بنام
ريم :يووه تونا مابدينا بالسهره شوي ويجون ربعي استني
:مره ثانيه ان شاء الله
ريم: طيب ممكن تساعديني فشيل الصحون
"نزلت لمستوى الصحون على طول وبديت اشيل فجأه حسيت ان في احد مسكني من وراي
حاولت افك نفسي واصرخ بس في شي انحط على وجهي وحسيت اني بروح عالم ثاني اخر شي اذكره اني انحطيت
على الارض وشفت ريم لا مو ريم الا بس انا احس ان...



الى هنا اصل معكم الى نهاية الجزء الخامس .. واعتذر عن التأخير في انزاله ..يسعدني تلقي ارائكم وتعليقاتكم وتوقعاتكم لاحداث القصه ..انتظروني يوم الجمعه بعد القادم في الجزء السادس ..دمتم بخير