.. زهـايـمر حكـي .~

**تنهيدهـ** · 25-12-2016, 10:32 AM

رد: ✒ .. خآصرة حرف رمآدية

ياشين الواحد لاصار نفسيه بزياده .. حتى يقول أحيان ذا أنا ولا
مب أنا .. الزبدة ماعرفتني بالصفحة اللي فاتت .. جيت اقراني
اكتئبت ..

يالله صباح خير

أحس اني المفروض ما أكون هشه بهالصوره معليش انسو اللي
كتبته قبل وارجعو للحيويه الدايمه بحرفي
صباحكم أصفر عالمي .. وأزرق حكومي .. وبرضه ناقص ثلاث نقاط
المهم صباحكم جميل وكذا ..

الأيام الماضيه كنت في غفلة من أمري وراحت علي سوالف واجده
بس برجع لها دام فيها أناقة وعندي لكم سالفه سعنونه مرااا
لكن مهمه ..
بس أحب في أول الصفحة اعاتب خيي راضي بالمقسوم على الوداع
اللي كتبه في آخر تدوينه .. ياخي اذا شفتني نفسيه لاتتاثر وربي
ما أطول منفسنه لأني ارجع اصك نفسي كف واضحك

<< مب علشانك يا تنهيده وش ذا المقلب القوي

الزبدة مالنا غناة عن سوالفك الحلوه .. وروحك الأجمل ..

تصدقون آخر تدوينه كانت لعز كنت أقول وش يحس مافهمت شي
يوم شفت المقطع دمعت عيوني على التدوينة ..
ياخي حط المقطع تحت التدوينه علشان يفهمون البقيه انك
تتكلم عن واحد انجلد جلد مب صاحي مسوي فيها هجولة درايفر
مدري شسمه ذاك المهم اللعبه اللي بالسوني مدري
وش تسمونها انتم << مصخت ذبتك ترى

فرة على مدوناتكم وراجعه بخروها لاهنتم أحس ودي استعيد
ذاكرتي بعد ما ميلت راسي بشكل ماله داعي الأيام الماضيه ..

برب ،،

**تنهيدهـ** · 26-12-2016, 10:34 PM

رد: ✒ .. خآصرة حرف رمآدية

شسمه ذا .. كيف الواحد يروق يعني وتسبده منحمسه صار لها يومين
قسم مافي شي يطربني لاصكتني أم العبيد نفسيا إلا النصر اذا لعب
وفاز على الهلال
قايله انا الف مره وكررتها الهلال ماعنده شي هالموسم إلا الترفيع من
الجهات المختصه فحاطين في بطنهم بطيخه صيفي ومروقين المنقا
بس ماجات على الكيف اليوم .. وانشاتو من كأس ولي العهد
ويارب نقابل الاتحاد الخصم العجول

مزاجي في مكانه ودي أدخل الساونا واحطه أعلى شي علشان أحس
كيف الجلد بالشتا يدفي
الحين الهلالي يحسب أنها من نقاط الدوري وكذا من زود اللخمه يعني
أعذار الهلالي اليوم .. كانت من قبل المباراة ..
قالو الحكم محلي طيب كان طلبتو اجنبي بفلوسكم حنا فغارى ماعندنا
شي هالموسم لبى قلبنا .. عسى بس مايسحبونا من البطوله ويقولون
الهلال دافع أكثر يامال العافيه صدزززز

واضح لكم روقاني بس وقسم ليت كل الناس انا يرضيني شي بسيط
ياحبني لي
يلا بما اني في الرتم الآن والمود منتاز خن اسولف لكم وحشتوني
الله يربط على قلب عز اليوم الوكاد انه منحمس حمس

وهات اللي بعدو

**تنهيدهـ** · 26-12-2016, 11:12 PM

رد: ✒ .. خآصرة حرف رمآدية

المشاركة الأصلية بواسطة ShahrzaD

" تنهيده "
Big love, big

, big hugs
يارب دوم مبسوطه يالخفوقي

I want you friend today, tomorrow, and for the rest of my life

.

**تنهيدهـ** · 27-12-2016, 06:59 AM

رد: ✒ .. خآصرة حرف رمآدية

هل طيبة القلب هي ضعف شخصيتنا وسلاح عواطفنا
يحاربنا نحن ضد المقابل !!
وهل نحن بهذه اللحظه أغبياء ام طيبين قلب ام ضعفاء ؟!!

وقفه مطولة مع هالتقييم ..~

**تنهيدهـ** · 28-12-2016, 12:18 AM

رد: ✒ .. خآصرة حرف رمآدية

علشان نعرف نوع شخصياتنا مع الحيرة اللي تتملكنا أحيانا لازم
نفرق بين الغباء - السذاجة - والضعف والطيبه
لأن كل تصنيف له صفات معينه .. لكن يصعب تفسيرها بعض الأحيان تشذ
بعض المواقف اللي تحول طيبتك إلى سذاجة .. رغم إنك طيب لكن
النقص وارد أحيانا .. خلونا نوضحها علشان نعرف أنفسنا من أي نوع ..
وراح نبتدي بين الطيبة والغباء لأنها أكثر شيين نضيع بينهم ولأن الغالبية
يعرفونها إن الطيبه هي الرحمه باعتدال والسذاجه هي الرحمه الزايده :)

الطيب : يبتسم لمن كشر في وجهه
الساذج يبتسم إذا رأى انياب الأسد بارزة

الطيب يعطي من منعه تكرما منه وبذلا
اما الساذج فهو يعطي من منعه وينتظر أن يشكره

الطيب يعرف أنه على صواب وخير مهما كان مايقابل به
من نكران وجحود
اما الساذج إن قوبل بالشكر استبشر وفرح وإن قوبل بالجحود
تألم وحزن

الطيب انسان " مضحي "
الساذج انسان " ضحية "

الطيبة " تواضع "
السذاجة " ضعة "

شتان مابين الغباء والطيبة .. لكن أحيانا يغلب عليك الجانب العاطفي
في أي موقف ومع شخص يخدعك باحتراف .. وتهتز صورتك قدام
نفسك وتقل ثقتك بقدرتك على كشف الأشخاص اللي يحترفون الكذب
انا عن نفسي اعترف اني كنت ساذجه مرتين في حياتي .. حلو
على مدار 29 سنه مرتين بس ولا

طبعا الضعف ضد القوة وكلها تكمن في الشخصيه .. يعني يكون
الشخص اما طيب قوي شخصيه أو ساذج ضعيف شخصيه ..
استحالة انها تجتمع السذاجة مع القوة لأن القوة تكون في الطيب فقط
ونفس الشي لايكون الطيب ضعيف لأنها سمة السذاجة .. علشان
كذا قلت فوق إننا نكون ساذجين فترات لأننا نضعف من جوا ..
ومابه أحد كامل .. لكن بعض الناس تجيك بعنف وتقول لك انا قوي
لا أهدى من كذا حبتين .. فيه فرق ..
وبعض الناس تجي لينه ونقول عنها ضعيفه .. نحتاج دقه في التحليل
للشخصيات لأنها صفات توضح على الشخص في مواقف معينه ..
يعني الطيب له صفتين علشان تكتمل فيه صفة الطيبه ..
والساذج له صفتين علشان تكتمل فيه صفة السذاجة علشان ما اشتت
نفسي واشتتكم برتبها بتدوينه ثانيه تكمل الفكرة ^-^
مع ملخص بسيط .

برب ،،

**تنهيدهـ** · 28-12-2016, 12:09 PM

رد: ✒ .. خآصرة حرف رمآدية

القوة & العنف

الانسان القوي يأخذ حقه بالحق..أما العنيف فهو يأخذ حقه
بالباطل

القوي يتحكم في اعصابه ويضبط نفسه..
أما العنيف فأعصابه تتحكم به ولايستطيع ضبط نفسه

القوي يتنازل ان رأى في تنازله مصلحة عامة
اما العنيف فهو يهاجم للبحث عن مصلحته

القوي يسامح وهو قادر على العقاب
اما العنيف فهو يعاقب وهو يقدر على الصفح

القوي يعاقب ليؤدب ويهذب
العنيف يعاقب لينتقم لنفسه

القوي انسان " قاهر "
العنيف انسان " مقهور "

القوة " بطولة "
العنف " باطل "

اللين & الضعف

الانسان اللين يرفق بالناس لاصلاحهم
الانسان الضعيف يرفق بالناس ليتقي شرهم أو لينال منهم نفعا

الانسان اللين يتغافل عن الخطأ تسامحا منه
أما الضعيف يتغافل عن الخطأ تجنبا للمشاكل

الانسان اللين يبتسم في وجه الناس ليدخل البهجة في قلوبهم
الانسان الضعيف يبتسم للناس ليستجلب حبهم أو عطفهم

اللين إنسان "حكيم "
الضعيف إنسان " محكوم "

اللين " نعمة "
الضعف" نقمة "

* * *

قلت بكمل معكم الوصف وصدعت وماعرفت اجيبها بأسلوب سهل
لاني انا اتشتت اذا صعبت .. ناخذهم بشكل مرتب على صنفين ..
طيب لين قوي
ساذج عنيف ضعيف

تمام كذا .. ! خلونا نحاول نستبدل بعض الصفات ببعض ..
هل ممكن الطيب يكون ضعيف شوفو صفات الضعيف فوق
اذا كان ضعيف راح تنتفي عنه صفة القوة ويصير ..
طيب لين ضعيف والليونه والضعف ما تجتمع يا تكون لين أو ضعيف
يعني نشطب صفة الضعف لأنها ما تصلح الآن ناخذ الصفه الثانيه
منهم العنف .. فتصير طيب لين عنيف .. من غير ما تطالعون الفروقات
فوق صفات الطيب واللين تتنافى مع العنف فالقوه هي الأنسب ..
واضح لكم إن الصفات متكاملة .. الطيب هو القوي اللين وتلاقيه دايما
مبتسم متسامح متغافل أهدافه دايما لمصلحة الطرف الآخر مش لنفسه
رحيم وحكيم ..
بعكسه الساذج .. ابتسامته تجنب للمشاكل رايه مب له ينتظر من الناس
مقابل لافعاله وان غضب يحاول انه يبطش وان تغافل فهو رغما عنه ..

مش شرط انك لو شذيت وصرت ساذج يعني أخذت كل الصفات يكفي
انك تاخذ الصفات العامه للسذاجه وتخلي الضعف والعنف على جنب ..

حسيت اني استرجعت أيام التدريس في مدونتي يازينها من أيام
الزبدة لحد يحسب اني تقاعدت ترى تو عمري 29 لكني تركت التدريس
ودرست دبلوم قرآن إعداد معلمات وهيك ..

ماعليكم من الوسيلة الفاشله خلوني الخص الدرس في التدوينه اللي
بعد هذي << تحس انهم متنحين

برب ،،

**تنهيدهـ** · 28-12-2016, 12:38 PM

رد: ✒ .. خآصرة حرف رمآدية

الزبدة وبعد هالفلسفه كلها أحب اقول لكم ..

الطيب طيبته تخدمه وتخدم الناس في شتى أموره الحياتيه ولأنه مو كامل
يمكن يكون ساذج مره وينلعب عليه بشي قوي وكذا .. خصوصا بالبزنس
تلاقي أشخاص مدري كيف مشت عليهم الكذبه وساهمو في شركات
وهميه وطارت فلوسهم والشركه بح

لكن السذج موجودين بالحياة وياكثرهم وتلاقي بعضهم مبسوط بهالسذاجه
يهدم نفسه بنفسه وهو مايدري ويقول انا طيب لكن اتقو شري
المشكله لاصار شره خرطي وماعنده سالفه ضعيف جدآ يعني ..

السؤال اللي جاني كتقييم كان مختص بالمشاعر طبعا .. متى يحس الشخص انه كان ساذج ولقمه سهله مستساغه انلعب فيها يومين وخلاص .
تعرفون كيف تصير هذي ..؟ تصير بطريقتين انك تكونين فعلا ساذجه
ومش محتاجه مجهود علشان ينلعب عليك وتصدقين بسرعة

أو أنك تكونين ذات شخصيه حريصه جدا لكن تطيحين بشخص محترف
ومتعود على سرد الأحداث وربطها بالواقع بشكل ما ينشك فيه اصلا
هنا ممكن تكونين ضحية ضعف جزء منك وانعدام ضمير الشخص
المقابل ..

بالنهاية أحب اقول إن طيبتنا اللي نشوفها فينا عند موقف معين
سواء عاطفي أو غيره .. هي سذاجه ليس إلا .. ولا لنا مفر
من هالمسمى .. لذا نصيحتي كل شخص يصون نفسه وقلبه
وأموره الخاصه عن أي شخص حتى لو كان ارتاح له .. إبليس
ماله ضمير وماله أمان .. ومحدش ناقص

كل هاللجه اللي فوق كنت ابي أوصل لكم هالخلاصه البسيطة
لكني حبيت تفهمونها بشكل أدق وإن شاء الله اني ما شتتكم
مع اني أشك
جد تعبت وانا اكتب وحسيت اني معطتكم محاضرة بوقت غلط
تكفيكم الكويزات اللي وراكم << علمي نفسك

خودافس وقسم دخت ^-^

**تنهيدهـ** · 29-12-2016, 12:49 PM

رد: ✒ .. خآصرة حرف رمآدية

سولفوا ..~

**تنهيدهـ** · 29-12-2016, 04:06 PM

رد: ✒ .. خآصرة حرف رمآدية

‏الحب في قلبك يشوف الغصن ورد
من قبل لا يلمح على الغصن ورده

" أنا الدفا لا صرت مطعون بالبرد "
مضمون احساسك كذا صار سرده

بوح ..

**تنهيدهـ** · 29-12-2016, 09:39 PM

رد: ✒ .. خآصرة حرف رمآدية

احساسي الليله سوي
ذكرني بأجمل صديق

متفنن ويكوي كوي
ودي من غيابه يفيق

بوح ..

.. زهـايـمر حكـي .~

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget