حلم عمري

حلم عمري ليل يبحث عن فجر
****** حلم عمري وهم يرسمه الهجير

عايش بقلبي وفكري والنظر
***** والحقيقه فيه اتعبها المسير

وش معي غير التمني والسفر
***** والامل ضامي على ضفة غدير

والسحاب اللي توقعته مطر
***** للاسف ما كان إلا زمهرير

غرني رعده وبرقه لا حضر
***** قلت قام الحظ وخضر المصير

أثر عيني دمعها وبل انهمر
***** بلل ثيابي ولفح البرد كير

وش يدفيني اذا حتى الشجر
***** طاحت اوراقه مع السور الكبير

ما يهد الحيل ويحودب ظهر
***** مثل غدر اللي تعشمته ذخير

طعنته لو ما تميت من القهر
***** طيفها يصبح مع ظلك يسير

يا زمن كم ضاع من عمري هدر
***** في رضا اصحابي غنيهم والفقير

ما حسبت حساب ربح ولا خسر
***** كلهم في ناظري خل وعشير

كل ما زلوا اقول حنا بشر
***** وان انا زليت شر مستطير

رغم عذري لو احد منهم غفر
***** صار معروفه على روحي امير

والله ان كني لهم اوفي نذر
***** فارش عيوني غطاهم والحصير

واحمد الله ما انتظر منهم عذر
***** وان سقوني كلهم علقم مرير

ما ني بزعلان والحاصل قدر
***** إنما حزني على موت الضمير



عبدالله صالح العمري