يا مشرق افراحي

يا مشرق افراحي .. ويا مغرب الهم
***** خذني كلام وبعثره في سكاتك

ما طيق صمتك سم .. وان قلت لي سم
***** كلمه تبعثرني بالاربع جهاتك

ليه السكوت ومنطقك شهد واطعم
***** يمطر على كبدي .. برد من فراتك

كانه تغلي .. يا غلا روحي إرحم
***** موتي دنا .. لا فرح الله وشاتك

وانه زعل فرقا علي ترحم
***** وقرأ علي الفاتحه في صلاتك

عاشق .. واحسك .. في شراييني الدم
***** والقلب دقاته .. تدفق غلاتك

على هوى كيفك يكيف ويغتم
***** مشاعري من وين ما جيت جاتك

إن تبتسم حتى .. جروحي تبسم
***** واموت لو دمعه .. تكدر صفاتك

وان صحت لك مشتاق .. دمعي تكلم
***** ويقول خل العين تحكي شكاتك

طبعك اذا عاتبت خلك تلعثم
***** مادري معه .. وشلون تقضي حياتك

هذا كلام الدمع والخافي أعظم
***** ما حد مسوي .. في حياتي سواتك

لا تلومني والحسن في حسنك التم
***** جتني على ذوقي .. وصايف حلاتك

الليل من رمشك سواده تلثم
***** والصبح وجهه مكتسي من بهاتك

والزهر يستنشق من انفاسك الشم
***** والورد إلا الشوك .. خالف سماتك

والشوك ماهو عيب في الورد ينذم
******* لكنك منزه وكامل صفاتك

وكانك تريد تشوف من وصفي اعظم
***** شف نفسك بعيني وشوف ايش فاتك

يمكن تصدق كم انا فيك مغرم
****** وتصدق ان عينك لقلبي عصاتك

فيها سحر هاروت من غير طلسم
***** وفيها دوا من غير تنطق شفاتك

هيا إرقني .. من قبل لا موت تندم
****** ترا القصاص أحيان تأنيب ذاتك

عبدالله صالح العمري