يانديبي شد من ديره وحل بديره
لاترد الشور للقاصي ولا للداني
اركب اللي كن صوته يوم يدرج سيره
لحن قيفانن بدعها تركي الميزاني
جيب لكزس صنعوه مصنعين البيره
اليهود مكرمين الزانيه والزاني
ابيض تخفي معالم لونه التغبيره
مثل عفرا غبرتها رملة الصماني
كن عجه مع دماث الارض عج مغيره
جرها بن حميد واوقف زحفها القحطاني
وكن شكمانه ليا دخن وفاض قيره
جرة حرق بصلها شايب سوداني
وكن نوره لاتقادح قدحة التعميره
برق صيف وصفه لي محسن الهزاني
ولا اعترض من عقب أخذ له لفه وتدويره
اعتراضة يوم عروى شيخنا ربيعاني
صاح في ربعه وغزا لين سعيره
وانتهت حرب البسوس وهيجن القوماني
نحره دار الرجال مقدرين الجيره
الرجال اهل السلوم مزبنين الجاني
عزوة التسبيحتين وعزوة التكبيره
ونصرة الدين الحنيف وعلة النصراني
لابة لاقام راع الحرب ينقر زيره
اقطعو سبحة فلان وطار عقل فلاني
منهم القعقاع وبن صقيه والمغيره
ومنهم الاقرع وزيد وعمرو والسمعاني
والمتنبي وأوس ومالك بن نويره
والحطيئه والفرزدق وبقطر بن ثاني
ومنهم القابوس وال الشيخ واللي غيره
وشيخ شيخان الكتاب ومفتي الاخواني
ياتميم أهل الكرم والطيب وأهل السيره
وياتميم أول تميم وياتميم الثاني
ياهل الخيل الاصيله والفخر والغيره
وياهل البير القديمه والدلو والساني
جاكم الحافي يسوق من الغرام بعيره
دافعه صدق المشاعر لا لشي ثاني
لايجي فالبال شك ولا يجي به حيره
مجدكم مجد تليد وهاجسي سراني
ياسلام الله سلام فيه خير وخيره
سجله قلبي واذاعه للحضور لساني
للكبير اللي يطول وشرهته كبيره
وللصغير وللمقيم وللخوي والعاني
عد ماتقدح تميم بزندها للنيره
وعد ماتطفي تميم النار والدخاني
وعد ماتشري تميم البن بالتسعيره
وعد ماتذبح تميم من الجمل والضاني
وعد ماتدفع تميم ريال والا ليره
لاأكبرت سود المشاكل والهدف مجاني
وعد ماتغلي تميم الدين فالسريره
وعد ماتكره تميم الصدر والسستاني
والله يعز الملوك ويحفظ الجزيره
هم بعون الله حزام الامن والاماني




الشاعر

سعود بن سالم الحافي العتيبي

{...



*

قال رسول الله صلى الله عليه و سلم

(( من قال :

لا إله إلا الله الملك الحق المبين

في كل يوم مائة مرة كان له أمانا من .. الفقر و من .. وحشة القبر و ..

استجلب به الغنى و .. استقرع به باب الجنة ))



...}

يا خوي
أنت السند حزة الضيق ~




و أنت الذي يغني الناس
عن | ظله !



الطيب يرفع من مقام المخاليق
وأنت ب / طيبك ترفع الطيب كله !