صيفي خليجي

صيفي خليجي وانت صيفك اروبي
***** وانا مع صيفي لقيت المسرات

وش فايده .. سافر .. اروبا وقلبي
***** سواح في بر وشواطي الامارات

لا تقول لي .. جوي .. سمومي ورطبي
***** هذا دوا يفتح جميع المسامات

استنشق النسمه شمالي وغربي
***** ولي في جنوب وشرق .. تفريج كربات

ولا من سمعت الله أكبر.. وربي
***** أطرب لها واطعم جميع الملذات

وان حن قلبي للسفر حسب حبي
***** إما طريق الجو .. ولا الغويفات

لميت اغراضي وسافرت ألبي
***** مكه ولي فيها مطامع وغايات

لى طفت حول البيت .. بدموع ذنبي
***** أرويت روحي نور .. واسرجت ظلمات

وحسيت بالدنيا .. تمر تحت عقبي
***** وانا بتواضع طرت .. فوق المجرات

ولصوب طيبه انس قلبي وطيبي
***** يا متعتي في طي .. ذيك المسافات

الشوق يحملني .. ويفرش بدربي
***** ورد يفوح بعطر أغلى المزارات

وان جيت للروضه وصليت حسبي
***** أعيش في جنه .. من الخلد لحظات

وزور قبر المصطفى .. وخير صحبي
***** اهدي لهم شوقي وازكى التحيات

وامضي ودمعي فوق الاوجان صبي
***** يذكر مناقبهم وارقى الحضارات

وارجع دبي واشوف الاحباب جنبي
***** جنه .. ولي كل الامارات جنات

عبدالله صالح العمري