تويت
الله .. لا .. غيبك
الله لا غيبك .. يا لغايب الحاضر
***** خالي مكانك ولا غيرك يسدونه
ما يعوض الشمس بدر في السما ظاهر
***** والشمس ما عوضت من فاقد عيونه
وانته مكانك محل الروح والناظر
***** ما يعوضك حد .. ولا غيرك يحلونه
وحدك بكفه .. وكل العالم باخر
***** وكل بعينه يرى ميزان مضنونه
يتصوره فوق ما يتصور الشاعر
***** واعذره لو قال .. ما حد غيره بكونه
كل يغني على ليلاه ويسامر
***** طيوف الاحباب والعشاق مجنونه
والليل موحش وبرده مثل ما خابر
***** يدفا على جمرة المشتاق وشجونه
كن الشتا من فصول العاشق مهاجر
***** والصيف خيم على شطان مكنونه
يتلاطم الشوق في قلبه بحر هادر
***** والصدر شاطي يظم الموج وطعونه
من تغرب الشمس لين شروقها باكر
***** والحال مسكين كان الله في عونه
والنفس من لهفها بحلامها تسافر
***** مع طيف مضنونها ما تقر من دونه
حتى ولوعندها ما تشتهي حاضر
***** ما تقنع إلا بمن هي فيه محنونه
ما يعوض الطير جنه في قفص فاخر
***** عن عشته بين شوك الطلح وغصونه
وانا حنيني حنين وخاطري خاطر
***** لو يشعر الليل .. فيني ضج بسكونه
أسمع لدمعي خرير الماي متحادر
***** شلال من عين وسط الروح مغبونه
وقول يا دمع تكفى بالعلن حاذر
***** ترا البكى عند بعض العالم مهونه
ويفول دمعي عليك الله لا تكابر
***** ما انته باخر ولا أول من يلمونه
ما حل عاشق في الدنيا ولا غادر
***** الا وصابت سهام الغيبه حصونه
والحب .. هو الحياه ونبضها الطاهر
***** صعب اتصور حياة الناس من دونه
واللي بليا حبيبه .. نصفه الاخر
***** ضايع .. ومن ضاع نصفه وين يلقونه ؟!!
عبدالله صالح العمري
تعليق