حبتين ツ

**نفركويس** · 28-04-2015, 11:24 AM

رد: حـبـتـيـن ツ

اخر صفحة
الف الف الف الف شكر وتقدير لكل من يتابعني
ولكل من اعجب بقرقرتي وكل من قيم
ما اخفيكم ان وجودكم ومتابعتكم تدخل الفرح والسرور على قلبي
والاسعد اني رغم تقصيري الا انكم لازلتم تبدون اعجابكم بكتاباتي
شكرا من القلب الله يسعدكم ويحفظكم
ويكثر اعجابتكم وتقيماتكم لي

**نفركويس** · 03-05-2015, 09:45 AM

رد: حـبـتـيـن ツ

صباح الخيرات
يعني يوم اني سرت مشغول بالاختبارات قمتوا تدونون وتتواجدون اكثر
لماذا وليش
دعواتكم ياعرب هالاختبار جايب لي الحنبطلي ( لا يسالني وش الحنبطلي )
ييسرها الله ويفرجها بحوله وقوته
على طاري الفرج
بقول لشهرزاد وانا اخوك انتظار الفرج اجمل عبادة
واجمل مافي المعاناة والازمات ان المسلم يؤجر عليها في وقتها
ويوجر عليها بعدها وبين الازمة وبين الانفراج ايضا اجر

فالحمد لله مافي شي يضيع
فرج الله هم كل مسلم

مريت على اكثر المدونات
سويت اعجاب بدون قراءة
اصلا الاعجاب من الجوال لحاله جاب لي شد عضلي في اصباعي
ادخل من اللاب واعلق باذن الله
تحياتي للجميع

**نفركويس** · 03-05-2015, 10:05 AM

رد: حـبـتـيـن ツ

فيه ناس ثقلين بشكل ما تتصوره
توعده بوقت يجيك بعدها بساعة
واذا جاء يتكلم عن الاشياء والمواقف اللي عجبته بالطريق
يكلمك عن العجلة وان عنده شغله مهمه وهو جالس لسا ماراح
يرتفع ضغطك عشان هو تاخر وهو بارد ولا كان فيه شي
حتى لو فيه تقديم بمكان يقول لك متى اخر يوم للتقديم
هذا الشخص بالذات نفسي اربطة بناقة مشاركة في سباق الهجن

**نفركويس** · 04-05-2015, 11:29 AM

رد: حـبـتـيـن ツ

صباحكم كشخه
فتحوا قسم نساء قدام مكتبي
وقسمي مشرف عليهم وعلى سير العمل في القسم
مو هنا المشكلة المشكله في الموظفين بالاقسام الثانية يتسابقون على الخدمة
ناس اعرفهم يداوم بثوب كله زيوت من كثر ما يدف سيارته
صار يداوم بثياب جديدة مكوية وتشم عطره من ابعد مكان
قبل كم يوم سويت عرض على المدير ووافق عليه
ممنوع اي واحد يجي للقسم غير ثلاثة اشخاص مسموح لهم
واحد من عندنا من المكتب في حالة الضرورة واثنين مندوبين عن الاقسام كلها الي بالادارة
يعني تجي الوحدة تقدم اوراقها على شخص واحد وهو يخلص اوراقها من اي قسم ثاني وهي جالسة بالانتظار
وانتهينا من التميلح قدام القسم
ورجع الربع لثيابهم القديمة وريحتهم الخايسه

نجي للمنتدى
اخس المنتدى بدت ترحع له الحياة شويتن شويه
باقي بس كمن شخص ويصير اكوس شي

الوسمي يقول انتهت عاصفة الحزم هو صادق انتهت بس اثرها ومفعولها باقي مع سلمان الحزم الله يسعده
بعدين ياخي دام انك شايق التوقيع راح وقته ياخي سو لي توقيع بدال الدق بالكلام والطنازة على اخوك المسلم الفقير الى الله

عندي شوية تعليقات على انة حرف وشهر زاد وسما روحي
لكن لعل الله يخرج السوداني اللي بداخلي واكتب تعليقاتي
ع فكرة
والا بلاش خلوها بعدين مع الاجازات وكذا
الا صح ع فكرة يعني صح دام كل واحد شاف له تحيه يختم بها تدوينته
حتى انا بودعكم ع طريقتي القديمة الجديدة
peace
بيييييس

**نفركويس** · 11-05-2015, 11:05 PM

رد: حـبـتـيـن ツ

يازمان الصداقات
من زمان محد سوا لي طلب صداقه
دخلت اليوم لقيت ذي

هلا والله وغلا بصقيقيني
نورتوا الله يسعدكم

اليومين اللي فاتت كنت حزين على حالي
مرض ومذاكرة ومحاضرات ودوام وعمال بالبيت
بس الصدق الصدق بعد ماشفت معاناة شهرزاد قلت الحمد الله
اللي يشوف مصيبة غيره تهون عليه مصيبته
الله يكون بعونك ويكتب اجرك
وعالعموم صار عندك دورة مبكرة في الامومة
وباذن الله يردها لك يزن اذا كبر وتسيري اقرب خالته له وما ينسى لك هالفضل
عاد مو تذلين اهله بعدين زي خالتي كل ما قابلتها تجيب فضايحي كلها
حتى قبل يومين اتصلت عليها عشان ولدها سوا حادث وفي اخر الاتصال
الله يسعدك ياحمد ما كان يجنني غيرك طيب ليش ياخاله مو وقته الحين

ما تلاحضون ان الفصلانين كثروا اللهم زد وبارك في ناس كنا نظنهم وصاروا
بس حلو خلوكم ع طبيعتكم ماله داعي يعنني هذاك اللي مدري كيف
حلو الواحد يكون شخص بسيط اللي في قلبه ع لسانه بدون تراخي او تشدد

يقولون ان اكثر سالفه ماتحبها البنت هي كم عمرك وكم وزنك
عاد كم وزنك ذي لحالها
تتهاوش البنت مع وححده تلعن خيرها
ياقللية الحيا مو متربيه شعرك منكوشابوك فيه وامك فيها .. ياسمينه

انا سمينه ياكيس الرز
طيب السب اللي قبل ياسمينه وش وضعه
اهم شي لا تقول لها ياسمينه
اللهم نحف البنات وسمن الشباب

طيف رديت علاك وانتظرك

قبل اخرج
ابارك للخوي الوسمي ع الدوري
الف مبروك يابو الاوسام ضربتوا عصفورين بحجر فوز ع الهلال وبكيتو الاهلي
وخل الهلال يذوق من الكاس اللي كنت تذوقه الانديه الثانية
وهاردلك يابو ريان معوضين خير بالاسوية بس عاد خلو لنا المركز الثالث بالدوري لا تزاحمونا عليه

ابارك للاخت سما روحي بالفوز بافضل مدونه
ادري مو احسن من مدونتي بس الحكم حسب لها هدف تسلل ههههههههههه
موفقه تستاهل مدونتها من اجمل المدونات ومن المدونات اللي مشترك فيها
اول ما تكتب شي تجيني في اول الصفحة المدونه بكبرها

اشكر الوسمي بعد قدومه جو العربان المختفين المغبرين
مراحب شغب غبرتي المنتدي قصدي نورتي
مو كاني طولت السالفه
دعواتكم ياعرب
بقول شي ترا غيابي مو كله دفاره
بس مافي نت عندي بالمكتب فيه مشكله والضيانه عندنا يومهم بسنه
بالليل اذا جيت بدري ادخل
المهم اني اسعد بالتجول في مدوناتكم كل يوم
فلا تقطعون الكتابه
يالا نشوفكم على خار
بييييييييس

**نفركويس** · 25-05-2015, 12:15 AM

رد: حـبـتـيـن ツ

صباح الخيرات
ادري وحشتكم
عشان كذا جيت خفت لا يسير فيكم شي من الاشواق
وحشتوني ياوحشين
كيفكم كلياتكن
طرا على بالي موضوع وكتبته ونزلته بالمنتدى العام بعنوان حظر تجول
عاد متى ما نزل الموضوع سيروا عليه وعطوني رايكم
سقا الله من اول كان عندنا واسطات اذا فيه موضوع ارسل للمشرف والا المراقب ينزله
الحين راح زمن الواسطات في عهد سلمان الحزم هههههههههه
يالا ياعربان لنا لقاء قريب باذن الله
كثروا دعاء لاخوكم باقي نص المواد
وبعدها اسنتر لكم في ذا
حبيب قلبي الوسمي وينك وين اختفيت
فيه وحده تنتظر السوداني اللي بداخلي يخرج
احب اقول لها ابشرك خرج وجاب سودانية وتربعوا فيني

قبل الخروج
مرحبا الف دلع وحنية
حكايا
انا 1
منورين ومغبرين

لي عودة قريبا

**نفركويس** · 31-05-2015, 07:36 AM

رد: حـبـتـيـن ツ

صباحكم اختبارات خلصت

المهم احلى صباح من حلاته تمنيته لكم
نهي هرج كثير
بس

عندي موضوع نزلته بالعام ونظرا لعدم توفر مواصلات عند بعض الاعضاء
والحريم عندنا مايسوقون قلنا نجيب لهم الموضوع في ذا
مع خالص الشكر والتقدير
للاخت انة حرف الخوي الغالي الوسمي الاخ امجد الاخوات شمس الشتاء احلام بريئة
على تواجدهم بالموضوع ومشاركتهم لاعدمتهم

وهذا الموضوع بين ايدكم تسعدني تعليقاتكم وانتقاداتكم

السلام عليكم ورحمة الله وبركاته
اسعد الله اوقاتكم
هناك طرفة تقول
انه في احدى البلدان كان هناك حظر تجول
والضابط ابلغ احد العسكر ان حظر تجول يبدا الساعة التاسعة مساء
وفي تمام الساعة الثامنة والنصف قتل العسكري احد المارة
فعاتبه الضابط وقال له لماذا قتلته وباقي على الحظر نصف ساعة
قال داء ابن عمي وبيته بعيد وماراح يوصل قبل الساعة تسعة

نكته طريفه ومضحكة
لكن لو تاملنا كثير من تصرفاتنا لوجدناها قريبة من تصرف هذا العسكري
نضحك على تصرف نحن نفعله ويمكن يوميا
نحن في الواقع نتهم الناس في نواياهم يوميا
ونحلل التصرففات قبل وقوعها ونبني عليها علاقات وقطيعة
اذا راينا شخص يحمل طموح اخذنا في التنقص والتهكم منه وانه لن يصل ولن ينجح
نحن في الحقيقة نحتاج لعمل حظر تجول للافكار السئية والنوايا الخبيثة
نحتاج حظر تجول للافكار السلبية والعادات المقيتة
لماذا لا نعطي انفسنا فرصة ونعطي غيرنا فرصة للوصول للنهاية بدون مثبطات
لماذا لا ندع اعمال الناس وافعالهم للخالق ونعمل على تقوية العلاقات لا ان نقطعها
نحن بحاجة ماسة الى ان نكون اوادم
بحاجة بان نبني الانسان الحقيقي بداخلنا
نحتاج ان نعمل على طرد الافكار التي تجعلنا نكره الناس
وان لم نستطع فلندعوا في سجودنا
ربنا اغفر لنا ولإخواننا الذين سبقونا بالإيمان ولا تجعل في قلوبنا غلا للذين امنوا ربنا إنك رؤوف رحيم

وسلامتكم

**نفركويس** · 31-05-2015, 07:45 AM

رد: حـبـتـيـن ツ

احلى تقييم
مدري ليش ولماذا وليه
حسيت اني قريته بقلبي قبل عيوني
يمكن اتخرفنت يقدعان
لكن صدق والله انه تقيم بالدوري

ياهلا بالصديق الله يوفقك يا صديقي نفر ويسعدك استانس والله إذا شفتك أنت والوسمي تهذرون أحس براحة نفسية وأن الدنيا بخير

من كل قلبي شكرا لك الله يسعدك قلبك ويجعلك دوم مرتاح نفسيا
عاد انا والوسمي بنفتح عيادة
يصير هو طارق الحبيب وانا السبيعي
ودام قلب صافي تخرجت نوظفها عندنا تنظم مواعيد

تصدقون زمان
هو مو زمان مره
ومان شوي يعني
كانوا يقلون انا الوسمي والوسمي انا
وواحد حلف انه متاكد 100% اننا شخص واحد داخل بشخصيتين
قلت يمكن وش يدريني يمكن انا واحد ما اعرفني
المهم لي الشرف ان اوصل لمستوى الوسمي واخلاقة وهذرته
هو العمدة واللاعب المخضرم

سحبنا على خوينا راعي التقييم
تسلم يالغالي على التقييم وخل نشوفك تفرفر مثل قبل عشان انا ارتاح نفسيا بعد

**نفركويس** · 02-06-2015, 07:45 AM

رد: حـبـتـيـن ツ

صباحكم هلالي اول مره يفوز على الاتحاد في كاس الملك عاد تخيلوا الفرحة قد ايش

بس صراحة الشوط الثاني طول الوقت اقول
يالله من الخمسات تامنا

الف مبروك للغالي عبدالعزيز ولكل الهلاليين وفالكم التوفيق

والف مبروك لمعالي سعادة فضيلة طال عمره الدافور عبدالعزيز الحربي

وابارك للاخت شهر زاد رجعوها للابتبها الله يجمع بينكم في خير

وابارك للاخت شهر زاد رجعوها للابتبها الله يجمع بينكم في خير ومنه النت ومنك المواضيع يارب

الخوي الغالي الوسمي الثار ولا العار خذوا ثارنا من الهلاليين الدواعش ( حاقد على الاربعة )
وعلى فكرة خوينا مرسل يقول لازلت اشك فيكم هههههههههههههههه
ياخي قربت اصدق انو انا انت

لي بعض التعليقات بس الوقت ما يسمح بالهذرة الكثير
وفيه موضوع برد ان لقيت وقت
بس عالسريع كذا
الناس تحب جدار ياخي حالتكم صعبة مرة
انا 2 مرحبا مليون وعصيدة ملا كرتون
منور ياسعادة مدير الفلة

ابشركم طلعت مادتين تمام باقي 6 مواد وشكله ما بتطلع الا بعد طلوع الروح
هكذا عودتنا جامعة عزوز
الناس فرحوا وسوو حفلات وتوظفت وترقت واحنا ماطلعت نتائجنا
دعواتكم

على طاري الحفلات
شرينا طاولة طعام
صار البيت كله يحب الاكل
لو صرت دب كله من الطاولة

بروح ارد بموضوع ابو شخصيتين في النقاش سيرو عليه

**نفركويس** · 03-06-2015, 10:15 PM

رد: حـبـتـيـن ツ

مساء الفل ع الكل
يسالني بشر
اقول له طلعت مادة
الف الف مبروك عقبال البقية
من بكرة يسالني واقول طلعت مادة ثانية
يقول مبروك عقبال الباقي
وعلى هذا الحال لي اسبوع وصار عندي تبريكات صغيرة
وعقبال المبروك الكبيرة يارب

رمضان على الابواب
طيب افتحوا الابواب ليش تخلونه واقف
ترا جد مش هزار
افتح قلبك لرمضان خلي رمضان الايمان ورمضان القران يتمكن من قلوبنا
لا تفكر بس في الاكل والسهر والمسلسلات
هذا الشهر هو تعويض
عارف لما تدخل تجارة وتخسر فيها وتجيك فرصه تعوض خسارتك
كنا في العام الماضي نقول ليتنا فعلنا في رمضان وليتنا ختمنا وليتنا وليتنا
الان جاء رمضان جديد واللي كانت ليت اصبحت واقع الان فهل نصدق مع انفسنا
ترى تقصير في رمضان لا يعوض ابد ولن يعود هذا اليوم ولكننا نسجل عمل رمضاني في شهر جديد
عندي سالفه بوصلها بس ماني عارف التعبير المناسب
كله من جامعة عزوز
المهم هو شهر خاص اجره خاص وعيادته خاصة
فخل لك اعمال خاصة به

مدري وش اكتب دخلت وعندي سوالف كثير والحين مضيع علومي
المهم دعواتكم لنا بالتخرج وكثروا دعوات اكثر شي

حبتين ツ

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget