قصيده اعجبتني


<>



أنا أشهد إني في حبك بنيت جبال فوق جبال
وقلبي لك بعد يشهد وصرتي دم شراييني

رسمتك نون في عيني كأني للخيال خيَّال
وكَأني بعد ما أَصحى أَشوفك وردة بيديني

من أَول ما نبض قلبي لقيت الحب بك ترحال
ولقيت النار في بردك تبعدني وتدنيني

وقلت إنِّي على دربك أبضرب للعشق أمثال
أبضرب شي في الدنيا قطفته من دواويني

كفاية إنِّي عرفت دربك ولا همِّي أنا لو طال
حلفت اني أبد ما توه لو ضاعت عناويني

أشوف الشمس بعيونك يلملم طيفها الشَّلال
وأشوف الليل برموشك بحر بالعين يرميني

تخيَّل كثر حبِّي لك كثر ما في السِّفر أميال
وكثر ما ينطق العالم لغاته لو سألتيني

خيالك يسكن بدمي اِلى مِن القلم قد سال
وصارت رسمتك فيني مثل منتي رسمتيني

أصورك الجبال اللي بقت ايَة وحِكَم وأمثال
وأنا مثل السحاب اللي بأَمطاره تناديني

لجل ينبت براضينا من ورود الوله أَشكال
بعد ما شفت بعيونك جواب إنِّك عشقتيني

أشوفك حلم بحلامي وأحس برقصة الخلخال
وأحس الوقت ياخذني لأَشواقك يوديني

حقيقه كنتي بحلامي مثل وردة بوسطِ رمال
هقيت إنِّي أبقطفها ولكنِّك قطفتيني

أجيك بشوق يدفعني لعالم ما يعرف محال
وأصير الكون بيدينك ومن خوفك تضمِّيني

وأنا أشهد إنِّي في حبِّك يمين ٍ ما تعرف شمال
لأنِّي بالعطا أكبر من بحور الضما فيني

أنا واحد ولكنِّي بأمواجي غلبت رجال
وتراني يالهوى أكبر من إنِّك تنتحر فيني

عرفتك يا لقمر كامل ولا أريدك تكون هلال
أريدك يا لملاك تكون حبيبي و منبع سنيني

أريدك تفرشي قصيدي من عيون الجمال امال
وأريدكْ تسكني قلبي وقبل يشكيني تشكيني

جمعتك لو نثرتيني ونثرتك يالغلى بهمال
ويوم إنِّك جمعتيني عرفتك تستحقيني

أريدك لافقدتيني يكُون بهاجسك زلزال
وأبد ما تركن ركونك اِلى منِّك ظلمتيني

حقيقة لو نسيتيني أببقى بصورتك تمثال
سألتك هو بقى فيني مشاعر لو تخونيني

لأني ما أبي تفتح لأبواب الجفا مدخال
كفايه إنِّي فتحت قلبي وجنَّاته وبساتيني

أبد ما فيه أحد غيرك ولو قالوا لك العذَّال
ترى كل الحكي منهم يبون إِنِّك تخلِّيني

وأنا ما ابيك تجرحني ودموعك بعدها تنهال
وإذا ظنِّك بهجرانك تقول اِنِّك تجازيني

بكون أكبر من عنادك مثل ما اشرب الفنجال
ولا يطري على بالك بيوم إنِّك تكيديني

وإذا والله بعتينِي أبيعك لو بنصف ريال
برغم إنِّي صغير السِّن ودمِّك قد سرى فيني

ترى ما حب تهينيني بكلمة قيل ولاَّ قال
لأنِّي عارف ٍ نفسي قبل لنتي تعرفيني

ومهما قالوا وقلتي بقول إن الرجال أفعال
وكلامي عالورق كذبه أريدك ما تجافيني

وأريد البسمه بعيونك تناجي خافقي بوصال
وقبل لا ترمش عيونك أريدك تسكني عيني

وأريدك لاذكرتيني يكون الحق لك تختال
ويكون الحق لك تمشي على أطراف سكِّيني

أبي منِّك تعاهدني لو إِن الحال غير الحال
بأنِّي أبقى في ذاتك وهذا بس يكفِّيني

ولو إِنِّ الثرا فيني يحوِّل هالجبال أموال
لحوِّلها لجل عينك وأحرِّك هاجسك فيني

أبي تاخذنا أبياتي لشمس ٍ ماتعرف زوال
وتصبح عينك بعيني ورمشك يحتضن عيني

وتكون خطاك في دربك زهور العاشق الدَّلال
سمعت اصواتك بحلمك قبل لنتي تصحِّيني

صحيت ولا يزال الحلم بحِلمي يِعتلي الأطلال
كأني فِي سنا حلمك مثل منتي تريديني

كتبت اِسْمك على حروفي وكنتي أروع الأعمال
ِلامِن صاحت حروفي وقالت بس أنا وينِي؟

وأنا أشهد إني في حبك بنيت جبال فوق جبال
وقلبي لك بعد يشهد وصرتي دم شراييني