يمه فديتك من هموم الليالي = يمه عسى ما شر شفتك تونين

يمه خذي مالي وهذا حلالي = يفداك وانتي للمعاني تعرفين

يمه ترى منسى خيالك قبالي = يمه خيالك مسكنه داخل العين

يمه عسى روحي وحالي ومالي = فدوه لدمعك يوم للدمع تخفين

إليا سمعت الصوت ينسر بالي = وانسى هموم الوقت وانسى الدواوين

يمه ترى الجنه معك والمعالي = يمه قدم رجلك أحطه على العين

أذكر زمان اول وانا فالدَلالي = أذكر تعبتي معي وانتي تربين

من كثر ما اركض من يمين وشمالي = واتعبك ما همي سوى اللعب تدرين

يوم اتذكر وش جرى في خيالي = مدري عن الأيام وشلون تمشين

يوم إني اكسر خاطرك ما ابالي = ما همني يمه صغير ومسكين

واذكر زماني يوم اشق الريالي = يوم الهلل والقرش يسوى الملايين

يا حسرتي يا وقتي اللي مضالي = يوم(ن) اشوفك طول الأيام تبكين

مدري مرض ولا هموم تصالي = مدري تعب مدري كثر ما تحسين

يمه لو الأيام تشرح سؤالي = سألت أنا الأيام وينك وانا وين

وسألت دمعك يوم بل الشيالي = يا دمعة تسوى كنوز السلاطين

وسألت حر الشمس وين الظلالي = وسألت قمرى الليل ما نورت زين

يمه أبي منك السموحه ولا لي = مطلب سوى تعفين عني وترضين

واخذي من الدنيا وكل العيالي = أنتي لنا الراعي وحنا رعيين

وستأذنك وقتى ترى ما صفالي = ادعي لمن ضاقت عليه الفلاتين

ادعي لمنهو بيدته الليالي = عسى زمان راح يرجع وترضين


للشاعر / خليل المطيري (الحسام)