قتيل الغرامي

يا فلان قلبي يرتجف عند طاريك
*** وتصيبني رعشه تخلخل عظامي

تسري لها نشوه بجسمي تناديك
*** مثل البروق السارية في الظلامي

ويسج فكري في خياله يناجيك
*** حتى يخيلك مثل بدرالتمامي

أعيشها لحظه .. أعاتب واراضيك
*** وحاول احضن في عيونك مقامي

ويطير قلبي لين يوقع بياديك
*** يشكيك .. لك .. ويقول يا فلان ظامي

ما يرتوي لو يشرب النيل ظاميك
*** ولا تطفي أشواقه سيول الغمامي

ماله روى إلا مراشف سواقيك
*** إن جادت مزون اللقا والوئامي

واصحى على دمعه كوت خد غاليك
*** يا كنها جمره رمتها الضرامي

وارجع الى الواقع .. اغمغم واناجيك
*** وأهذي ولا فهم من كلامي كلامي

يا دوب أجمع كلمتي كيف ألاقيك
*** واسمك انادي به جميع الاسامي

لو شفتني في حينها كيف أهاذيك
***عرفت وش يعنى جنون الهيامي

وشفت الوله من نور عيني يناديك
*** ويصور الحرمان قوس وسهامي

أنا اسأل الله من غرامي يعافيك
*** أو يجعله برد عليك وسلامي

ان كان عقلك من صوابه يجافيك
*** مثلي .. وتلقى كل يوم الحمامي

يكفي أشيل الشوق عنك وأداريك
*** واخشى عليك من الغلو بهتمامي

راضي ولا غيرك بعيني يساويك
*** الا الوطن وانت الوطن في هيامي

أحب من حبك واعادي أعاديك
*** واكرم على شانك قلوب الانامي

وانا ادري ان الحال ما هو بخافيك
*** تدري ولكن لا تجاهل مرامي

إن مت قبل أوصل شواطي مرافيك
*** ومريت من قبري مرور الكرامي

اكتب على الشاخص .. عباره تواسيك
*** قبر الوفي هذا .. قتيل الغرامي

شعر : عبدالله صالح العمري