يا دار لبسي ثوب الأحزان
واتوشحي سود العمايم

عنج رحل من عالي الشان
وأظلم نهارج يوم شايم

جاذي الحزن في سبع الأوطان
واتنكست روس العلايم

عقبه وكني فوق نيران
ما خلفت غير الهشايم

لو تنجمع دمعات الأعيان
غطت على يود الغمايم

ونت على فرقاه عربان
وإتبللت سود اللثايم

مكتوم روح ليت ما كان
ويلي على فرقاه دايم

عقبه إن غطش ليلي وإذا بان
نور الفجر والفكر غايم

لي من ذكرته طحت غشيان
واتمزعت مني العزايم

أشجان وجدي كله أشجان
من عقب شيخان عظايم

مكتوم يعله دار لجنان
في خلد في إنس ونعايم

بنعيك لمحمد وحمدان
وأحمد عساهم في لهايم

من عند ربي عالي الشان
صبر جميل وحلم دايم

صلوا على المبعوث يا أخوان
ما بان نور في ظلايم

وادعوا لربي عالي الشان
يسكنه جنات النعايم

ذا مقالي ومع ذكر ربي بديته
يا سلام الله عليكم وبركاته

ولي بقوله والله إني ما نويته
وهوب بقصدي به مغثه ولا شماته

خبروا الغدار بأني متليته
وإني انا ما يزعزعني شراته

والذي قاله تراني ما هقيته
كيف ينكر الادمي أربع جهاته

مثل هذا القول منك ما بغيته
يا رجل الإنسان ما ينكر لذاته

والذي قلته على وشو بنيته
الحشيم اللي يحشم عرضه وخواته

يا جماعه لعربي لا من نخيته
يوقف ف/ صفك وهذه من صفاته

ما يطرش له غريب لأهل بيته
يطلع بنفسه يبلغها وصاته

والادمي لابد له في يوم ميته
والقدر والموت حق ب/مظلماته

وشيخنا لي مالي ه/الكون صيته
عايش معنا ونتقبل مماته

اه لو بيدي أنا بروحي فديته
بس م/ المكتوب ما توجد مفاته

حب زايد في وسط قلبي رعيته
اه لو تدرون في قلبي غلاته

ولي تعرض لي وأنا ما قد هجيته
لا يلوح لي ترى بكسر عصاته!!

اه يا ليته يا ليته اه ليته
لو تفرغ عن قصيده لصلاته

لي شرات اسمه من عقلي محيته
ما أحب أهل المكر وأهل اللواته

الشعر ذوق وسط دمي جريته
ما حسبته رزق أو شغلت شحاته

قبل لا تنحل أوراقي
قبل لا تقفي سنيني

يا طير الشوق بلغهم
عن اللي بايت محيني

سهير الليل لا زالي
على فرقاك يا الغالي

وأصيح بصوتي العالي
ونار البعد تكويني

متى يا زين تذكرنا؟
ترى والله تعذبنا

ترفق لا تفارقنا
وتدعينا محازيني

زمان الود وأوقاته
خفوقي يشل وناته

وموقي يهل عبراته
ألا يا زين يكفيني؟

نحل عود الصبا وأذبل
وإنت وين ما تسأل؟

هوايه صرت له تجهل
وأحس إنك مجافيني

تذكر يوم أنا قربك
ولا قد زحت عن دربك

أداري ودك وحبك
وإنت ما تداريني

مضت لسنين ع/الفرقا
ومات الحب والعشقا

ذكرت إني بك مشقى
وجيت اليوم تبغيني؟!!

أقول ارحل ولا تقبل
تراني منك متملل

ولاني فحاليه لول
على كيفك تمشيني

حبيبي لول تحول
وبنك الحب ما مول

خطأ ف/ حسابكم لول
شطب حبك من سنيني

مسحتك من سجلاتي
وقلبي وروحيه وذاتي

وكل اللي مضى وفاتي
فلا تهقا تبكيني!!

قوم يا راعي المبادي والأمانة والوقار
قوم خاطب من جرحني دون ذمه ولا ضمير

بلغه خالص سلامي واحترامي باختصار
وإن لي تاج الصراحة وإني للطيبة أمير

كان شعري في نظرهم ما لقى أي اعتبار
أشهد إني ما كتبته غير من بحر غزير

ولو ( نقابي ) ما عجبهم والتحجب والخمار
حشمتي تاجي وطبعي للعلا دايم يسير

هيه نعم نكي ( شجون ) وصح اسمي مستعار
بس ستري كان تفهم يلزم النفس الكثير

أرفض التشهير وأرفض كل خضوع وانكسار
واقعي يرسم طريقه دون زلة ودون ضير

أحترم ذوق الجميع ولا على نهجي غبار
ومن نوى ينقد قصيدي به أرحب وأستشير

يا خسارة من وفيته ثم خالفني المسار
ما تمنيته سوى يسمع لقلبه والضمير

بس أنا طبعي صبور وأحترم قول الكبار
بس هذا هوب يعني إني بصمتي صغير

أصغي للي ينقلونه وأتخذ باقي القرار
وأتحقق من كلام ذاع به طفل وكبير

حيث بعض الناس تصغي للوشايا والحقار
ما دروا بالكذب حبله ف/البسيطة هو قصير

هيه نعم نكي ( شجون ) وصح اسمي مستعار
بس ستري كان تفهم يلزم النفس الكثير

هاض القصيد وزلزل الجاش زلزال
ع / الجود ضاري دون تقصير وبنود

طرزت قافه من ثمانين مدخال
عن لا يشوبه عيب وارد ومنقود

من حيث أحيده لي همى نف همال
نبعه كريم وخصته وصفة الجود

أبنيه من دمي على كل لحوال
وأرسم حدوده ولا على سامعه زود

للي بقلبي له عن الغير منزال
واللي شراته بين ه/ الناس معدود

واللي بفقده زادنا هم وأنكال
واللي بطيبه دايم الدوم معهود

( زايد ) باسمه وبالمثل ( زايد ) أفعال
في كل قلب وبيت تلقاه موجود

ما طال همي غير ما طاب لي حال
من عقب لي حبه سكن خافقي وزود

اللي بطيبه تذكره الناس لا زال
واللي بفعله ما عرف حد وحدود

الشاهد الله ما توفيه الأمثال
ولاني بمدحه أنتظر أي مردود

إلا غلاته ف / الحشا توزن جبال
ومازلت أعزه والجوارح له شهود

من قال زايد مات من قال من قال
زايد بقلب الناس عايش وموجود

مرحوم يا من تذكرك خير الأعمال
مرحوم يا من ب/الكرم دوم مشهود

أرضك لها بين الدول قدر لا زال
تزهي بحله زاهيه وسط لوجود

يقصد ثراها كل سايح ورحال
لين أصبحت في ر حلة الدرب مقصود

خضرا زهت من عقب كثبان ورمال
تكسي ثراها بهجة أزهار لورود

من حكمتك يا خايض أصعاب لمسال
ما أتعبك يا قاهر الصعب مجهود

قلت المصانع ما هي لي تصنع لرجال
لرجال لي تصنع وتجني لها الفود

يرحمك ربي لي شرع عمر واجال
يسكنك فردوسه وجنات لخلود

رب عليه نعلق عهود وامال
هو خير من نرجو وهو خير معبود

ويحفظ خليفه شيخنا ذرب لفعال
وإخوانه وأرض الكرم منبع الجود

والختم صلوا ع / النبي عد ما جال
في خاطري ذكره وما ذعذع النود

الليل جن وهاجسي بالمثل عن
والشعر هاج وخالج النفس طوفان

طوفان من عدة مشاعر تبارن
يتزاحمن من فيض قيفان وأوزان

عدي بهن يضون ويمسن ويلفن
ولو قلت بسلاهن فلا طاب سلوان

للي أساس المجد باسمه يبرهن
واللي بطيبه يذكره كل إنسان

واللي شراته ينعدم أغلب الظن
قصدت زايد هيه نعم ابن سلطان

من غير زايد بين الأضلاع يسكن
من غير زايد عايش بوسط لعيان

من غير زايد ساد في كل باطن
من غير زايد له من المجد عنوان

عليه نفسي من كثر شوقها تحن
حن المحايل ترتقب نف الأمزان

ما مات دامه يسكن القلب والجفن
ما مات دامه نذكره سنين وأزمان

حكيم دايم للصعيبات يفطن
أصيل من لابة قروم وشجعان

الخير دايم وسط أياديه يزبن
كريم ما يرضى تهاون وخذلان

للسلم يسعى والمواثيق يعلن
ما يرتضي ظلم وجفوه وعدوان

ما جيت بمدح غير للحق أعلن
إنه بهاة ودرة ونور الأوطان

وإنه بغيابه زادنا غبنه وحزن
وإنه بقدره لا حشا مول ما هان

خلف رجال ما شكوا ضعف ووهن
خلف رجال كل قاسي لهم لان

قادوا المسيرة ولا اختلف فيهم الظن
شدوا الهمم وافين من دون نقصان

يا الله يا من فيك ما تخلف الظن
يا من خلقت الأرض والأنس والجان

تسكنه زايد وسط جنات يزهن
بالخير يا منان يا عالي الشان

والختم صلوا عد ما المرعد يدن
ع / النبي شفاعنا ف/ يوم الأمحان

ضج عقلي وضاعت أفكاري
وارتبط للسان موليه

يوم شبت فوق لسعاري
الرواتب ما قضت حيه

قلت صبر أيوب يا الباري
والصبر بي شب لا ضيه

زادوا البترول بسعاري
فوق خمس الدرهم شويه

غير خبر ب/العجل ثاري
في الصحايف وضحت النيه

عقب ست شهور لخباري
عن زيادة نفط سلبيه

كننا يبناه من خاري
ندفع الأموال نقديه

ياملا البترول في داري
رابي ف/ أرض حكوميه

كيف يغلا دون ما يداري
ع/الأهل والجار مع حيه

ياهي حاله وبلوة الشاري
يشتري البترول جبريه

بشتري لي بعير وحماري
مايبن بترول موليه!!

والسكن بيكون ف/ قفاري
وين لا شاكي ومشكيه

بستريح وبطعم الفاري
حيث لنه يقضي الحيه

دون خسر ودفع إجباري
أو بطاقة سحب فوريه!

صدقيني لي غدى وقتج مراره
هوب قصدي لا حشا وانتي صديقه
انتي يا اللي مخوتج عندي شهاره
أفتخر بج يا وشم قلبي وبريقه
يا حياتي ما أعلن قلبي جهاره
بس انتي في وسط قلبي حقيقه
ولي يولع بيننا أدنا شراره
رفجة العربان لمحي له طريقة
من غلط لابد ينحي عن مساره
وإلا أنا وإنتي على عهد ووثيقه
أنا وانتي لي موالين الصدارة
وإلا بعض الناس عجف لو عقيقه
هم وكنهم ماخذين الألف شاره
وإلا هم ما غير ضلعان عويقه
وش يبو اللي لي لضت في اليوف ناره
أشعل الدنيا وأمست في وهيقه
يا غلايه ناب شعري هب مساره
يمزع اللي غض نيبانه ورقيقه
ذيب لابي كبر يوم الحظ زاره
دومها لحظوظ تأفل هب شقيقه
يا مخلي عمرك إنته والعباره
كنك ف/مركاض نوق هب سبيقه
خل عنك الكبر ما يغنيك كاره
وإن نغيت الشعر مني ياك ريقه
مثل جمر وسط كوره والحراره
لاضي من بعد لفحه ما تطيقه!
ذي وصاتي والأمر تالي قراره
راجع لك وإنت تدري وش سويقه!

ثار القصيد وزلزل الجاش طوفان
عاصوف عاتي يرفض العطف واللين

جاريه جارف من عطا فيض الأمزان
تخشع لها روض وقيا ع وبساتين

يشعر بها لي ساكن ف/ساحل عمان
ياصل عطاها ب/الحيا اخر الصين

أنا ( شجون ) اللي لها العز عنوان
أرعى قصيدي وأحسم الأمر ف/الحين

ما يشتكي شعري فتور ونقصان
يخشاه لي ماله من الغزر تبيين

الشعر ساحة وساحتي كل ميدان
دامك نويت الحرب ع/ الراس والعين

وشيت بي من خلف واشي وعدوان
جرحتني وألحين تمدحني ألحين؟؟

غلطان يا اللي ساقك الحقد غلطان
أنا قصيدي در غالي المثامين

لا هان قدر اللي لهم قدر لاهان
ناس إشعرا فيهم الحق تأمين

قصيدهم يشفي الذي دوم شفقان
على الذي شال الحسن زين ع/الزين

والنعم فيهم لي طروا الحق لي زان
ما يشمتوا غيبه وريبه وتزيين

والله والله لو من الزين مابان
باكر كرام الناس تطريه ك/الدين

يا وجد حالي ع/الذي وسط الأعيان
أهواه وأحبه نعم وأحلف يمين

عسى دياره من الحيا سيل هتان
يروي محايل ضاميه قد لها سنين

والختم صلى الله على نسل عدنان
محمد المبعوث بالحق والدين