الله يسامح صبح سبعة ثلاثة ~
قبل انتبه تميت تسعه وعشرين

البارحة كانت سنيني دماثة~
واليوم جيتي بالخطا يالثلاثين

دورتني بين الشعر وانبعاثه ~
وضيعتني داخل سجون الدواوين

وماكل صرخة في المدى إستغاثة ~
وما كل وردة تنهدى للمحبين

والما اذا تراب الأحاسيس عاثه~
يصبح كما الانسان مرده لطين

وأنا وشعري مالنا بالحداثة~
إحساسنا شفاف مافيه تضمين

والطيب لا صنعة ولا هو وراثة ~
الطيب طيبي وانشره فالميادين

وكان الهوى بيحدني للخباثة ~
عز الله اني ماتربيت للحين

ظامي الرجا كلما يطول لهاثه~
يعميه طعم الياس عن مورد العين

ولوكنت أصلا حاظيه باكتراثه~
مايؤمن بغيري ويكفر بهالدين

هذا زمن صار الوفا به غثاثة~
والعقل صاير يحتكم للمجانين

ولوهو على قلبي نويت اجتثاثه~
ولا أسلم طيبته للسكاكين

وعلى كثر ما خنت سبعة ثلاثة ~
الله يسامح جيتك يالثلاثين