بسم الله الرحمن الرحيم
أحزان للعراق مشتاقين ياعراق

مشتاقين
الك ياوطن
حيل مشتاقين

ياديرة ألهموم
أجيناج
ويا الشمس مصبحين

خلينه همومنه
ويا الهموم
بدم الشرايين

وسنين ألهجر
تحز بكلوبنه
مثل حز ألسجاجين

أوكف يازمن
نريد نرجع
كبل ماتمشي السنين

راجعين
نوكف مثل النخل
بوجه كل الشياطين

راجعين
مانظل مهاجرين
وليش مهاجرين

راجعين
الك وما نريد منك
بس الهوى
والطين

مشتاقين الك
ياعراق
والله حيل مشتاقين

نرجع ايام الشوكك
وكل ايام الحب
والحنين

راجعين
يامن هواكك
عطر
ونغم
وطينكك
ورد
وبساتين

راجعين
وكدام كلوبنه
ثلج كل نار البراكين

راجعين
وكدام كلوبنه
ثلج كل نار البراكين


الشاعر حامد الرعد