أنوثة خياليه بالرغم من الملابس الرجالية..كامله

**Nåjòólā** · 14-06-2011, 05:32 PM

رد: أنوثة خياليه بالرغم من الملابس الرجالية

مرحبا.....
بصراحه بارت ولا اروع.....
بليزز اذا تكملينها الحين بتكسبين فينا كلنا اجر ....،،،

مع تحياتي...

nåjòólā

**عقد اللؤلؤ** · 14-06-2011, 05:35 PM

رد: أنوثة خياليه بالرغم من الملابس الرجالية

المشاركة الأصلية بواسطة Nåjòólā

مرحبا.....
بصراحه بارت ولا اروع.....
بليزز اذا تكملينها الحين بتكسبين فينا كلنا اجر ....،،،

مع تحياتي...

nåjòólā

اهلين يالغلا ... اشكرك على تواجدك ...

ان شاء الله ما اتاخر عليكم .... هي مسالة فقط كتابه الروايه مرة اخرى عن طريق الورد ...

يحتاج مني وقت ..والتدقيق والمتابعه ...فياليت تعذروني ....

تحياتي لك ...

**Nåjòólā** · 14-06-2011, 05:39 PM

رد: أنوثة خياليه بالرغم من الملابس الرجالية

معذوووره و خذي وقتج....
أحنا بنتظارج ....،

**حلمي حلم الغروب** · 14-06-2011, 07:50 PM

رد: أنوثة خياليه بالرغم من الملابس الرجالية

الله يعطيكي العافيه يالغلا
بارت مره روعه
منتظرينك ي عسل ا

**وردة العمر** · 14-06-2011, 10:50 PM

رد: أنوثة خياليه بالرغم من الملابس الرجالية

كويس اني دخلت عشان اقولك انو البارت مرا كان حلوو
وصح كان طوييل بس حلو انك طولتيه

عشان انا كل يوم اتذكر هذي الرواية وماقدر ادخل <<لانو عندي اختبارات

يعطيك العافيه
بس يارب يتعافى سعوود

**عقد اللؤلؤ** · 16-06-2011, 09:36 PM

رد: أنوثة خياليه بالرغم من الملابس الرجالية

المشاركة الأصلية بواسطة الدرالمنثور

الله يعطيكي العافيه يالغلا
بارت مره روعه
منتظرينك ي عسل ا

الله يعافيك يالغلا ....

منورة ...

وردة العمر
كويس اني دخلت عشان اقولك انو البارت مرا كان حلوو
وصح كان طوييل بس حلو انك طولتيه

عشان انا كل يوم اتذكر هذي الرواية وماقدر ادخل <<لانو عندي اختبارات

يعطيك العافيه
بس يارب يتعافى سعوود

اولا اتمنى لك التوفيق يارب ...

ثانيا ... الله يعافيك ... وشرفني مرورك

**عقد اللؤلؤ** · 16-06-2011, 09:37 PM

رد: أنوثة خياليه بالرغم من الملابس الرجالية

عذرا لمتابعين روايتي .... الجزء اليوم ليس الاخير ... بل ما قبل الاخير. ... حتى يكون هناك تناسق في طول الاجزاء ...اعتذر مرة اخرى

**عقد اللؤلؤ** · 16-06-2011, 09:39 PM

رد: أنوثة خياليه بالرغم من الملابس الرجالية

<<<<<<<<<<<<<<<<<<<<<<<<<<<<<<<<<<<<

الجزء السابع عشر ( قبل الاخير)

<<<<<<<<<<<<<<<<<<<<<<<<<<<<<<<<<<<<

مر على سعود في أسبوعين من لما عرف بوضعه الصحي الخاص بالإنجاب ... ومازال في المستشفى ...

عبير ... راجعت المستشفى مرتين خلال الأسبوعين ... وتعبت كثير من الروحه والرجعة ... وحالتها في تحسن بطيء...

........في فلة ابو سعود .......

عنده بالمجلس ابوه ..واخوه ابو وائل ...
ابو سعود دخل بالقهوه في المجلس و واضح عليه التعب والإرهاق ...
الجد : يا ولدي يا صالح ارتاح ...
ابو سعود "مبتسم بتعب":..مافيه تعب ...الله يحييكم ...
ابو وائل : والله شكلك مو عاجبني يا صالح ..
ابو سعود "يصب القهوه":.. خلوها على الله .. لي اكثر شهر من أيام الحادث وانا ما انام زي الناس ...الحمدلله على كل حال ...
الجد :..الحمدلله ربي سلم ...وخلاص انتبه لنفسك انت ... اولادك ان شاء الله انهم بخير ...
ابو سعود :.. كيف انتبه لنفسي واولادي الاثنين طايحين وكل واحد يبغى له من يساعده في كل شي ...
ابو وائل : متى بيطلع سعود ...؟!
ابو سعود : .. والله احتمال بعد اسبوع ... مع اني والله ودي يبقى في المستشفى ..على الاقل حتى ويقدر يعتمد على نفسه في القومه والقعده ...كفايه عبير ..
ابو وائل : عبير ما فكت الجبس في الزيارة الاخيره .؟
الجد : لا ما فكته شفته برجلها ...
ابو سعود : ايه ما فكته بس وقتها فكوه سووا اشعه للرجل ..وباقي ما تجبست ... فرجعوا الجبس ...
ابو وائل :.. الله يعين ...اذا احتجت مساعده او شي ...لا تتردد تكلمني او تكلم وائل ...ترى مافيها شي ...وباي وقت ..
الجد "ابتسم":.. و وائل صار ولدك يا صالح ...
ابو سعود : ..ما تقصرون كلكم ... وائل وأولاد عمه يساعدوني عند سعود ..اما عبير .. فانتوا عارفين ما عندها الا انا وامها...
ابو وائل "وكأنه يفكر بشي ":... الا اقول يابو سعود ... ليه ما تسوون خطبة عبير و وائل الحين ...وعشان يساعدك بعد في مراجعات عبير ...
ابو سعود : لا لا .... مو وقته ...
الجد : الا وقته ...وكلام محمد صح ... على الاقل ترتاح شوي ...ومهما كان ترى الشباب يستحملون الحركه والروحه والجيه ..مو مثلك ...
ابو سعود :.. صلوا على النبي يا جماعه ..الموضوع مو خبط ولزق... ترى ما صار بينهم شوفه شرعيه ... ومنها نشوف رأيهم هما الاثنين ... وبعدين ...نفكر بالخطبة .....
ابو وائل : اذا على الشوفه .. وائل بالبيت خله يجي ويشوفون بعض .. وانتهينا .......
ابو سعود "متردد":... والله مدري..... بس مو وقته خطبه .. سعود بالمستشفى ...
الجد : اهم شي العقد ... يعني لما يطلع سعود ... نسوي حفله صغيره .. نكتب الكتاب ... وعشان يقدر وائل يطلع ويدخل بدون محد يتكلم عليكم ....
ابو سعود : خير ان شاء الله بشاور ام سعود .. وعبير واعطيكم خبر...
ابو وائل "طلع جواله":وانا بكلم وائل يجي...
الجد "مبسوط":..خير ما تسوون يا اولادي..

طلع ابو سعود الصالة ... وجلس على سرير عبير ... و نادا ام سعود اللي كانت بالمطبخ ...وطلعت بسرعه بس سمعت صوت ابو سعود ...
ام سعود "ماسكه الشاي": ... جاهز جاهز الشاي يابو سعود ....
"وتفاجات انه جالس عند عبير "... اخوك راح ....؟!
ابو سعود : لا لا ...بس تعالي اجلسي ... وطي الشاهي عندك .. ابيكم بموضوع كلكم ...
الجده : خير يا صالح وش عندك ...
ابو سعود "طالع في عبير":.. وائل بعد شوي بيجي ويبغى يشوفك عشان نتم الخطبه اخر الاسبوع .........
عبير "فاتحه فمها ..":هاه ........وين ........الحين الحين يعني اليوم ...!!!!
ام سعود "بزعل":وش تقول يا صالح الله يهديك ... وضع البنت ووضعنا ما يسمح اننا نسوي لا خطبه ولا شوفه ....
عبير : أي والله ولا انا مستعده ..
الجده : انت يعني موافق يا ولدي...
ابو سعود "تغيرت ملامحه للحزن": .. والله يمه انا تعبت ...لي اكثر من شهر مع اولادي في المستشفى ما صرت قادر اسوي شي ... اهملت شركة الشرقيه ..والشركه هنا ... والاوضاع ملخبطه ..
فاخوي محمد شار علي قبل شوي انه تتم الخطوبه على الاقل عقد القران ..عشان وائل يقدر يساعدني على الاقل اذا انا مو موجود بالبيت ...
ام سعود "تاثرت من كلامه":... معك حق يابو سعود ... خلاص سوي اللي تشوفه ...
عبير : كيف يعني راح املك واخوي سعود مو فيه ...
ابو سعود "ابتسم":ابشرك سعود بيطلع ان شاء الله بعد اسبوع ... "وطالع فيها باستفهام"... يمديك باسبوع تشتري فستان الملكه يا عروس ...
عبير "بزعل .. وتطالع في ارجولها": عروس ..برجل مكسورة اقصد رجلين ...!
دق جرس الباب..
ابو سعود "وقف": هذا اكيد وائل ...."لاحظ ارتباكة عبير"... يالله يا بنتي استعدي وعدلي شكلك ..."وطالع في ام سعود ...." .. لا تتاخروا.. خمس دقايق ...طيب ...
ام سعود :..طيب طيب ....
اخذ ابو سعود الشاهي...وطلع لمجلس الرجال ...

وائل جاي ركض ..والبسمه ما فارقته ....لما عرف من ابوه انهم يبغون يسوون الشوفه اليوم .... بعد ما فتحوا له الباب دخل مجلس الرجال ..
وائل "والفرح واضح عليه":..السلام عليكم ....
الكل : وعليكم السلام ...
....جلس وائل معاهم ..وهو ينتظر موعد لقائه مع عبير ....

عبير.... مرتبكه .. ومو عارف ايش تسوي ... مره امها طالعه لغرفتها مره شغالتهم ....
عبير"بصوت عالي ":... سينا .. وعلبة الإكسسوارات جيبيها لا تنسينها ...
سينا " وهي ترجع علبة المكياج":... تيب تيب ..ابير...
الجده : يا بنتي تراك ربشتي نفسك والشوفه كلها دقيقتين ... خلاص يابنتي مو محتاج كل هذا ... بسم الله عليك قمر ...
عبير :.. الا والله يحتاج .. هذي شوفه مره بالعمر ...
ام سعود .. ساعدت عبير انها تلبس التايور ..
عبير"وهي جالسه على سريرها ":..هاه حلو ... بس التنورة قصيره ...
ام سعود : ما عندك تنوره طويله ...
عبير "تهز راسه بمعنى لا "...
الجده : حلو حلو يا بنتي خلاص ...
سينا "جابت علبة الاكسسوارات":.. تفضلي ..
عبير "مدت يدها لامها ":..دقيقه سينا ... ماما ساعديني اجلس جنب جدتي ...
ام سعود :..انتظري اجيب الكرسي المتحرك ...
عبير "بسرعه":.. لا لا ....ما ابغى الكرسي باجلس جنب جدتي ..على الكنب ...
... عبير ..ما كانت تبغى وائل يشوفها وهي عاجزة ... وخاصة انه كان خاطب من قبل .... جلست عبير جنب جدتها ... وعطتها امها شرشف تغطي فيه ارجولها ...بشكل مرتب ... :... انا جاهزة ....

عبير .. لابسه بلوزه خضراء ساده كمها كت .. وتنوره نفس اللون فيها ورود حمراء كبيره ... لبست معاها سلسال اخضر .. وخاتمين واحد احمر و واحد اخضر ... وفكت شعرها ... مع روج احمر هادي .. وكحل ومسكرا .. طلعت مرره انيقه وجذابه ...

ابو سعود ...ابتسم لوائل بعد ما كلمته ام سعود بالجوال ..... وقف وائل بسرعه ... ومشى بخطوات سريعه ....
وائل "وكله لهفه":.. وين يا عمي عبير ...
ابو سعود "ابتسم": بالصاله ... "ضربه على كتفه".. روح عندها جدتك معاها ..
وائل "انحرج":... ط طيب ....

دق وائل على الباب المقسم من جهة مجلس الرجال اللي يفتح على الصاله ... وجاه رد من جدته ...
الجده "بصوت عالي شوي":.. ادخل ادخل يا وائل ....
وائل "بس سمع صوت جدته ... ارتبك .. عدل شماغه بشكل سريع تنحنح ":... احم احم .... بسم الله ...

ودخل الصاله .. ونظراته تسبقه ... لمح ان جدته بس هي وعبير اللي موجودات ..ارتاح ان عمته ام سعود مو موجوده ... قرب اكثر منهم .. والابتسامه على وجهه...

في هاللحظه ... وقفت كل شي بالنسبه لوائل ... واخيرا ..عبير قدامه ... وقف شوي يتامل شكلها مع انه مو قادر يشوف ملامحها مضبوط ..لانها كانت منزله راسها وشعرها مغطي عليه .... تحولت نظرته لجدته ... وقرب منها ....
وائل "ركع يسلم على راس جدته ... تحولت نظرته لعبير ..اللي رفعت شعرها وطالعت فيه بشكل عفوي .. وماكانت تدري انه يطالع فيها .. ارتبكت ونزلت راسها بسرعه ...
وائل "ابتسم": ... كيفك يا جده ... طيب نسيتينا هاه...
الجده : الحمدلله بخير... لا والله ما نسيتكم ...بس انت عارف محد يجلس بالبيت عند عبير اذا صالح وبدريه راحوا عند سعود ..
وائل "وهو لسى واقف قدام جدته ..لف على عبير.. وبصوت كله حب ":.. كيفك عبير ..؟
عبير " زادت ربكتها لما سمعت صوته .. ": الحم ...د لله" ...

الجده : اجلس يا ولدي ..
وائل .. لف وجلس على اقرب كنبه منهم ... وهو يطالع في عبير ..
"اه يا عبير... يا زينك والله.. اشتقت لك ولسواليفك وهبالك .. ولعيونك ... "
الجده "طالعت في عبير لقيتها منزله راسها مره":.. يؤيؤ .. وش فيك يا بنتي ..كيف بيشوفك وائل ... ارفعي راسك "وتمسك بدقن عبير وترفعه "... لا تستحين هذا بيصير زوجك ...
عبير" حمر وجهها بزياده ... ورفعت راسها .. وبطريقه مرتبكه صارت تحط شعرها ورا اذنها "...
وائل ... متكي على الكنب وحاط يده على خده بطريقه قابظ كل الاصابع ما عدا السبابه على وجه ... وكانه مستمتع بمنظر عبير وهي خجلانه ...
الجده " وقفت ": بروح اجيب العصير ....
عبير "بهمس": ..جداه لا تقومين ...
الجده "سمعتها بس طنشت"..
عبير .. تابعت جدتها وهي رايحه للمطبخ ... وما انتبهت الا بصوت وائل ......
وائل "عدل جلسته وثنى ظهره وتكى على ركبته ":... كيفك اليوم احسن ؟!...
عبير " منحرجه ..":الحمدلله ...
وائل "ابتسم .. وبصوت واطي ":.. ليه منحرجه مني .. نسينا ما كلينا ....
عبير"انصدمت من كلمته .. وطالعت بشكل سريع فيه بعيون مفتوحه "
وائل "ركز بعيونها ...وغمز لها ":.. اشقت لك وربي .....
عبير "نزلت راسها بسرعه .. وابتسمت بحرج " ..
وائل "لمح غمازاتها ":.. لا انا كذا ما اقدر .. شكلي بجيب المملك اليوم ...
دخلت الجده ... وهي تحمل صينيه العصير... وقف وائل بسرعه واخذها منها ...وحطها على الطاولة ...
الجده : خذ يا وائل العصير....
وائل "شرب العصير":.. تسلم يدك يا جده...
الجده "كل شوي تطالع في عبير .. تبغى تعرف ايش صار بينهم .. وبعدين طالعت في وائل "...خلاص يا ولدي ... نقول تم ...
وائل "يرجع الكاسه على الطاوله ": تمين بعد مو تم واحد ..."لمح عبير وهي تضحك "... طيب أسالي عبير يا جده مو بس انا بتزوج ..
الجده "لفت على عبير ": ... هاه يا بنتي ... موافقه ..
عبير " شابكت يدها في بعض .. وبشكل متوتر صارت تلعب في الخاتم تلفه وترجعه.. ابتسمت"...
الجده "طالعت في وائل ..وابتسمت ": ..البنات يستحون ..مو مثلكم ..
وائل " يطالع في الخاتم اللي بيدها... وقف ":طيب ....انا بطلع مع انه ما ودي ...بس بطلع بكرامتي قبل لا احد يطردني ...
الجده : ما عاش مين يطردك يا ولدي ... ماله داعي هالكلام...
وائل :.. خليني بس املك يا جده بنقل عفش غرفتي هنا ...ههههههه " من شدة ضحكته طالعت عبير فيه ..طالع فيها .. وقرب منها .. ومد يده لها "...يالله اشوفك على خير عبير ....
عبير "بلمت تطالع في يده .. مدت يدها بتردد ... وبحركه سريعه من وائل ..سحب يدها .. وضغط عليها ... جلس شوي يتامل شكلها كاخر مره ...
وائل "يطالع في الخاتم اللي بيدها ... ومد يده الثانيه ... وسحب الخاتم من اصبعها بكل هدوء ...هالحركه خلت عبير تطالع فيه مو فاهمه .... ثنى جسمه شوي عليها .. وما زال ماسك يدها بيده الثانيه والخاتم ماسكه بيد ووقفه قدام وجهها":. ..تسمحين لي اخذه .. مقاس للدبله ... مع اني... "وطالع فيها فوق لتحت" ما تحمل الاحمر انا ...
عبير ... انحرجت ..من حركاته معاها ..وقدام جدتها بعد ...
الجده : خذه خذه ...يالله روح المجلس ....
وائل " فك يد عبير...بعد ما ضغط عليها للمره الاخيره ..وكانه يودعها ":.. أشوفك يوم الملكه ..

وطلع وائل ...من الصاله ... ونظرات عبير تلاحقه ... مو مصدقه ان اللي جالس يصير لها حقيقه ..كانها بحلم ...تحسست يدها اليمين ..ومكان ما مسكها وائل ... وتذكرت نظراته وكلامه ... حست انها بعالم ثاني ... لدرجه ان جدتها وامها يباركون لها وهي مكتفيه بابتسامه ...

وائل ... قبل لا يدخل مجلس الرجال ...وقف شوي يتذكرها ... حس ان ملامحها بدات تختفي من خياله ..من شدة ما كان يحاول يتذكرها ضم يدينه على وجهه وهو ماسك خاتمها ... وغمض عيونه وابتسم بعد ما شم عطرها على يده ...صار يشم العطر .. وهو مبتسم ...
حس على نفسه ... عدل شكله ... واخذ شهيق زفير.. حتى صار طبيعي شكله ...دخل على المجلس ... وعلى طول وقف عمه سعود .. اللي بس شافت جاي يركض ..ويسلم عليه ...ارتاح باله ...وسلم وائل على جده وابوه .. وباركوا له ...

.................................

**عقد اللؤلؤ** · 16-06-2011, 09:40 PM

رد: أنوثة خياليه بالرغم من الملابس الرجالية

.................................

في المستشفى عند سعود ... عمر و احمد ......

سعود : جد يا احمد مسافر خلاص ...
احمد : ايه خلاص المفروض سافرت من اسبوعين ...بس عشانك والله تأخرت ..الا كل زملائي سابقيني هناك ...
عمر : ياليتك جيت عندنا الإمارات وتركت لندن ...
احمد : خلينا الحين من الكلام هذا ...انت متى مسافر للإمارات ..ترى مصختها هنا ...
عمر : وليه قاعد على راسك انا ..
سعود : ههههههه ليه ما تبغى تسافر الا حتى وعمر يسافر ...
احمد : ايه اجل انا ادرس وهو يطعس بالبر .. لا والف لا
الكل :هههههههههههه

دق باب غرفة سعود ........... فتحت الباب منى ... وارتبكت لما شافت عمر ....اللي كان يطالعها بنظرات احتقار ....
منى " طنشت وجود عمر ..وطالعت في سعود بابتسامه ":.. سعود وقت علاجك ....
سعود "يحاول يرفع راسه على المخدة ":.. هات العلاج ...
منى : اول اقيس لك الضغط .."استسلم لها سعود .. وهي كانت تحاول تكون طبيعيه قد ما تقدر ... بسبب وجود عمر .."..
عمر "تذكر حبه لها ..وانها ما تستاهل لأنها بنظره ما قدرت تحافظ على نفسها .. وبصوت عالي قريب من الاستهزاء ":.. أقول احمد ما تحس ان جو الغرفة صار ملوث ...
منى "رفعت عينها على عمر .. "
احمد "مو فاهم على عمر ايش يقصد " :.. اوما ملوث ...و وين بالمستشفى .....
سعود "كأنه فهم ان فيه شي بينهم .. وبصوت قريب من الأمر ":..عمر خلاص ...."بلع الحبوب ..."
احمد : اسمع كلام اخوك الكبير ...
منى :.. بالشفى يارب ...عن اذنكم .. ..."وطلعت من الغرفة ..."
وقفت منى على باب الغرفة بعد ما تكت عليه ...وكأنها حست من نظرات عمر انه ممكن يفضحها وخاصة انه الوحيد اللي قالت له عن سرها ..."دمعت عيونها ..وبصوت كله حزن"..يارب استر علي ... يارب استر علي ..انت الوحيد اللي عارف اني تبت ..واني كنت جاهله ...يارب استر علي ..."مسحت دموعها .. ومشيت رايحه للكافتيريا "....

اما في داخل الغرفة ........دق جوال احمد اتصال مهم ..استأذن وطلع برا الغرفة يكلم ........

عمر : يا حليلة احمد صار مهم اتصالاته كثرت ...
سعود "طالع في عمر بنظرات استفهام ": ..انت مين كنت تقصد لما قلت الجو ملوث ...
عمر :.. اه ... اكيد اني ما اقصدك ولا اقصد احمد ...
سعود: أجل مين تقصد الممرضه ؟!
عمر : خسارة فيها اسم ممرضه ... بتلوث سمعة الممرضات ... وانت بعد يا سعود كلم إدارة المستشفى لا عاد يدخلونها عليك ..
سعود "رفع حواجبه ": وليه ان شاء الله ..؟!
عمر : ضروري تعرف ؟ ... تراها ما تستاهل اننا نتكلم عنها اصلا ...
سعود : انت من جدك تتكلم ...ممكن اعرف ليه غيرت رأيك فيها مو كنت تميل لها ...
عمر : يعني ... ملت لها فترة ...بس لما عرفتها على حقيقتها بطلت " وحط رجل على رجل وبلا اهتمام "...مع انه كان بإمكاني اتسلى عليها ...بس طابت نفسي منها ..
سعود "بعصبيه":... هي وش تتسلى ما تتسلى ... هي بنت محترمه .. لا تتكلم عنها كذا ..
عمر "وبلا اهتمام":.. واللي محترمه ... تتزوج عرفي بدون علم أهلها ...
سعود "متعجب":..كييييييييف ؟! وانت من وين عرفت ...؟!
عمر : هي قالت لي بلسانها .... لما حست اني جاد وممكن افكر بالارتباط فيها ... اعترفت لي ..وتقول تابت ...تغلط وتقول تبت ..يا سلام ..
سعود : بس بس خلاص ..لا تكمل ... خلاص استر على البنت يا عمر ...دامها تابت ...
عمر : ايه اذا جت الوحده تتزوج قالت تبت ...تلاقيها الحين معاها عشرة غيره متزوجتهم عرفي...
سعود "بحزم":.. قلت خلاص ...أعراض الناس مو لعبه يا عمر ..
عمر : بس ..ال...."دق جواله "

>>>>>> امي يتصل بك

عمر : هذي امي تتصل علي ...."وقف "بطلع اكلمها برا ..وأشوف احمد.........."كلام سعود ما عجبه .. وما صدق يجيه اتصال ينقذه من المحاضره ..."
سعود : سلم لي عليها ..........
عمر : الله يسلمك ..."وطلع من الغرفة ".... الو و و....

سعود رجع ينام على ظهره .. ويفكر في كلام عمر عن منى ..."البنت واضح عليها محترمه ... حتى كلامها مع الدكاترة والمرضى قليل ... معقول يطلع منها هذا كله ... والله صارت الدنيا تخوف .." قطع عليه حبل افكاره دخول وائل عليه ...
وائل ... دخل متحمس والبسمة مو مفارقه وجهه .....
سعود " متعجب منه": ماشاء الله وش هالنفسيه الزينة ....
وائل : معناه محد قال لك ...
سعود : يقولون لي ايش ...؟!!
وائل " يعدل ياقته ":.. احم احم ... شوفتي كانت اليوم ... لا لا ليه الكذب اقصد قبل "وطالع في ساعته".. قبل ساعه وربع ...
سعود : شوفتك ... انت ومين ...
وائل : مين يعني اختك ... عبير ....
سعود : والله ..."بزعل".. محد قال لي ... الظاهر أهلي نسوني هنا ...
وائل : اقول بلاش تنغص علي فرحتي ... قال نسوني قال ... انت بسرعه صير بخير .. عشان نملك ...
سعود "بعصبيه ": تملكو و و ن ؟!... والحين ... وش فيكم وش صاير ليه مستعجلين كذا ...
وائل : والله هذا شرط العروس واهل العروس ..ما يبون يسوون الملكه الا وانت بالبيت ... بسرعة ياخي ماصارت .. لك شهر ونص بالمستشفى ...ياخي نبغى نتزوج نتاهل نشوف مستقبلنا ....
سعود " بفرح ":.. والله تنتظروني .."وبخباثه".. والله عجبني المستشفى ..ابغى اجلس فيه زيادة ...
وائل "بخوف":تكفى يا سعود ..لا تطول ... والله اني مليت ...ابغى املك خلاص كفايه عزوبيه ....
سعود : على الاقل انت ملكت من قبل وجربت ...خل الدور على اللي ما جرب ...
وائل " تضايق .. ": .. جربت هاه ...اللي يسمعك يقول كانك مو الوحيد اللي عارف اللي كان يصير لي...."وكانه تذكر"... سعود ..
ايش رأيك تصير ملكتنا بيوم واحد ...
سعود : تقصدني انا ...وعلى مين ...؟!
وائل : على سمر ...والا نسيت ..؟!
سعود "بعصبيه ": وائل انسى الموضوع قلت لك ... ما ابغى أتزوج ... فاهم لا سمر ولا غيرها ...
وائل : انت اول قلت لي ان سمر رافضه ...بس انا كلمتها وما حسيت انها رافضه بالعكس .... بس اشوفك اليوم انت اللي ما تبغى .. فهمني ايش صار....
سعود : ايش افهمك يعني ...قلت لك اللي ببالي ..."بعصبيه"خلاص لاحد يكلمني عن الزواج ... تراي مو مستعجل عليه مثلك ومثل عبير..
وائل : لا لا يا سعود لا تفهمنا غلط ...تمت الشوفه .لاننا نبغى نستعجل بعقد القران ... "بحزن".. انت مو عارف حالة عمي صالح كيف ولا عمتي بدريه ...تراهم تعبوا كثير... وخاصة عمي صالح مشاويره زادت ..حتى انه أهمل كل شي يخص الشركات ...وكله عشانك انت وعبير ...
سعود "باستهزاء":.. وانت المنقذ هاه ....
وائل "ابتسم":... ما راح ازعل منك ... ولا راح تقدر تخرب علي أحلى يوم بحياتي ....
سعود "تضايق" :..انا ابغى ارتاح يا وائل ..ممكن ...
وائل :.. اوكي ارتاح بس نتكلم بعدين ...يالله مع السلامه يابو نسب. ..
طلع وائل من الغرفه ... وهو يفكر بكلام سعود... "سعود كان يبغى سمر ..ومتأكد انه الى الان يبغاها ...بس ايش صار حتى وغير رأيه ... سمر واضح انها موافقه عليه لما كلمتها ...يعني سعود اللي رفض .. "... لمح الدكتور هشام ..."بس هذا هو اللي يمكن يفك لغز سعود "...
وائل "وقف ينتظر يقرب منه ":دكتور هشام كيفك ..؟... "ومد يده يصافحه "...
الدكتور هشام "يصافحه":.. اهلين ... الحمدلله ... معليش مو متذكرك ...
وائل :انا وائل .. قريب المريض سعود صالح .. كيف حالته الصحية ...؟!
الدكتور هشام :... ايه تذكرتك ... لا الحمدلله وضعه الصحي ممتاز ... وكاتبين له خروج نهاية الأسبوع ان شاء الله... بس لازم من المراجعات المنتظمة ...
وائل "ارتاح ":..مشكور يا دكتور ... استأذن منك بس أروح أراجع حسابات المستشفى الخاصة بسعود ...
الدكتور هشام :... خذ راحتك ... مع السلامه ...

توجه وائل للإدارة ... وطلب كشف بحسابات سعود ... وتفاجأ .. بتحاليل ...مو متأكد من مصدرها ..مع ان لغته الانجليزية عال العال .ولكنه ..من الصدمة ..مو قادر يركز ...
وائل " يسال مدير الحسابات":... عفوا ...الدكتور عبدالرحمن ... هذا دكتور ايش ...؟!
المدير :.. أخصائي ذكورة ...
وائل "مصدوم .. ومتلخبط ":ايش دخله بحالة سعود ..!!؟؟.. . و و وينه ... اقصد مكتبه ..هو يعني ..
المدير : قصدك عيادة الدكتور عبدالرحمن ...؟!... بالدور الثاني ..
وائل "وقف .. ": .. تسمح لي اخذ الملف معاي نص ساعه بالكثير وأرجعه لك ...
المدير : معليش ...هذي مسؤولية مقدر ..
وائل "بعصبيه":.. قلت نص ساعه وأرجعه ... ماني ماخذ حقكم ..واسمي كامل عندك وتعرفني وتعرف عائلتي والشركه ..وتقدر توصل لي باي وقت ...
المدير "باستسلام":..طيب..طيب... بس لا تتأخر أرجوك ... لانها عهده عندي ...
وائل ..طالعه بكل غضب ..وطلع للاصنصير..وهو مو عارف وين يروح ... لحد ما ركز شوي ... وضغط زر الاصنصير على الدور الثاني ... مشى بخطوات سريعه ... باتجاه عيادة الذكورة ...
قابل الممرض ...
الممرض : عندك موعد ... والا أول زيارة ..؟!
وائل "يحاول يكون طبيعي ":.. لا انا ما عندي موعد ... بس حبيت اكلم الدكتور شوي ...
الممرض : طيب انتظر افتح لك ملف وأعطيك موعد ...
وائل "بين أسنانه": .. انا قلت ابغاه بموضوع يخص شخص مريض هنا بالمستشفى يهمني أمره ..
الممرض : دقيقه اكلمه وأشوف اذا بيسمح لك ....
وائل : وانا انتظرك بس ياليت تقول له الأمر ضروري ...

دخل الممرض عند الدكتور ...وطلع بعد دقيقتين ..وخبر وائل ان الدكتور ينتظره ...

وائل : السلام عليكم ... انا المسئول عن المريض سعود صالح ..صاحب هذا الملف .."وعطاه الملف على المكتب "... ممكن اعرف ايش مشكلته ...
الدكتور عبدالرحمن " طالع في الملف ": .. ايه سعود ...اللي عنده كسر بالحوض ...وش فيه ...
وائل : ممكن اعرف .. ايش الفحوصات اللي سواها ...
الدكتور عبدالرحمن "ابتسم": .. يعني انت داخل عيادة ذكورة .. والأوراق اللي قدامك توضح انها من عيادتي ... يعني تتوقع بتكون فحوصات ايش ...
وائل "بعصبيه بس ماسك نفسه":..دكتور رجاء ..لا ترد على سؤالي بسؤال ...
الدكتور عبدالرحمن :.. ماله داعي تعصب ..يا اخ ..
وائل : وائل ...معاك وائل محمد ولد عم سعود ...
الدكتور عبدالرحمن :.. يا وائل .. هذا موضوع حساس ... واللي يقدر يجاوبك هو صاحب الشأن اللي هو سعود ...
وائل "بتماسك": .. بس مو فاهم ايش دخل ..هذا بالحادث ...بالكسور اللي فيه ... الفحوصات هذي على طلبه ..هو طلبها ..؟!!
الدكتور عبدالرحمن :.. كسر الحوض ممكن يسبب مشاكل للرجل خاصة من ناحية الإنجاب ...وعلى هالاساس سوينا الفحوصات ..
وائل : وايش طلعت النتيجة ...؟!
الدكتور ". طالع في وائل بنظرات جاده ":... اتوقع شفت التحاليل ..
وائل "يحاول يكذب نظرات الدكتور ...": لاحول ولا قوة الا بالله ....طيب ... له علاج ...
الدكتور عبدالرحمن :..الطب تطور .. اكيد مافيه شي مستحيل ...
وائل "وقف ..":...مشكور يا دكتور .."اخذ الملف ..وهو طالع لف على الدكتور "... دكتور ..ممكن ما تخبر سعود اني عرفت بالموضوع ...
الدكتور :. أكيد ....
وائل ..ابتسم له ابتسامه شكر وامتنان... وطلع من العياده ... وهو يسحب رجله سحب ... وقف عند اقرب كرسي انتظار موجود بالسيب ... وجلس عليه ...فك أزرار ياقته ...ورجع راسه على ورا.. "لا حول ولا قوة الا بالله ... عرفت سرك يا سعود ..وياليتني ما عرفت ...الحين تاكدت انك تحب سمر .. اه يالدنيا ما تصفى لاحد ... اه يا سعود ... قدرت تضايقني باحلى يوم بحياتي ..بس للاسف مالك يد بالموضوع ...قضاء وقدر .. الله يصبرك ..."... عدل جلسته ووقف بثقل .... ورجع للإدارة بالملف ...سدد اللي عليه .... ولما كان بيطلع من المستشفى ...كان عنده شعور قوي مسيطر عليه انه يطلع يشوف سعود ..

..................................

في فلة ابو سعود ......... كانوا البنات مجتمعات عند عبير بمناسبة الشوفه ....
سمر : هذا اللبس اللي لبستيه ....
عبير : ايه ما فصخته لما عرفت انكم جايات ...هاه ايش رايكم ...
نجوى : مرررررره حلوو ..
شيماء : ايه مفتحك اللون الاخضر ...
عبير "تضايقت من كلمته شيماء":... ليه انا سمرا ..حتى ويفتحني يعني ...
سمر "تطالع بنظرات حقد لشيماء":.. لا ماعليك وربي قمرر.. وائل انخبل عليك ... رجع البيت طا ا ا ا اير من الفرحه ...
وفاء "قربت من عبير":... ورينا ايش عطاك هديه ...
عبير"مصدومة":... ما عطاني شي ...ليه لازم يعطون بالشوفه ...
نجوى "بتسرعها المعهود":.. ايه لازم وائل اعطى شيماء سلسال فيه قلب ..مررره روووعه كان ...
وفاء "بصوت واطي ":.. مو وقته يا غبيه ...نقطينا بسكاتك..
شيماء "ابتسمت ":.. ما عليك يا عبير..اهم شي السعاده بالقلب ...عمر الحب ما كان بالهدايا او الذهب ...
عبير "ابتسمت لها":.. ايه فعلا كلامك ...

....................................

في غرفة سعود ...
دخل وائل بتردد ... ولكنه حصل الكل بالغرفة أعمامه ..وجده وأولاد أعمامه ..وعمر ... الغرفة كانت مليانه .....
ابو سعود : ادخل يا وائل ...
عبدالله : جاء المعرس هلا والله ...
خالد : تاخرت على نسيبك ... جينا قبلك ...
سعود "بفرح":.. اصلا هو اللي بشرني قبل شوي .. قول لهم يا وائل ..كم لك ساعه عن الشوفه الحين ...ههههههههه
وائل "يطالع في سعود ... كيف يجي لك نفس تضحك وانت عارف بوضعك ..":..
ابو وائل : متى كتبوا لك خروج يا سعود ....
سعود : والله هو على نهاية الأسبوع هذا ...بس مدري ليه "وطالع في وائل ".. احس اني ما ابغى اطلع ... بقول للدكتور يمدد لي .. هههههههههه
الجد : اجل ما تعرف وائل ...بيجيب المملك هنا ... وبيملك ... ولا همه في احد ...
الكل : هههههههههههههههههههههههههه "الا وائل "...
سعود "لمح في نظرات وائل حزن ": .. وائل ... قبل شوي كنت
بتطلع ... ليه رجعت ... لا يكون تذكرت اني زعلان.. وخايف من عبير .... هههههه
وائل "بعد عمر واحمد من قدامه ..وقرب من سعود ...وحضنه "..
الكل : تفاجأ من حركته ....يطالعون في بعض ....
سعود " حس ان وائل .. عارف شي عنه ...حاول يطالع في عيونه عشان يتاكد .. وبصوت واطي اقرب للهمس ":...انت قابلت الدكتور هشام ...؟!!
وائل " طالعه بنظرات متوتره ":...
ابو سعود "بصوت عالي ":... وائل ... مريت على الإدارة ...امس كانوا يسالوا عنك ...
وائل "لف على عمه":..ايه ياعمي ...مريت قبل شوي ...و انهيت الأمور معاهم ...
سعود" حك جبهته بتوتر ...ورجع شعره على ورا ... ":.. يعني شفت الفحوصات ...فاتتني انك ممكن تشوفها ....
وائل "بنظرات جديه ":... صلي على النبي ... ما صار الا كل خير .. منت اول واحد ولا أخر واحد ....
عبدالله "قرب منهم":... أي والله صدق منت اول ولا اخر واحد .. يصير عليه حادث ...الله يستر علينا وعلى المسلمين كلهم . ...
سعود . و وائل ...طالعوا في بعض وابتسموا ... لان عبدالله مو فاهم شي ...." امين .."..

ابو خالد : يا عمر كلمت امك عشان تحضر ملكة وائل وعبير ....
عمر : لا والله لسى ما كلمتها ....
ابو عبدالله : انا بكلمها خلاص ...هذا زواج ولدي على بنتي ..."ابو عبدالله فرح بملكة وائل على عبير... وخاصة ان شيماء اللي رفضته .. وكان يتمنى لو يطلب وحده من بنات أخوانه ... والحمدلله صار اللي كان يتمناه .."

................................

**عقد اللؤلؤ** · 16-06-2011, 09:41 PM

رد: أنوثة خياليه بالرغم من الملابس الرجالية

................................

اليوم التالي .........

سعود صحي .. على صوت ممرضه فلبينية ....
الممرضه :.يالله قووووم ... انتي ما تسمعي ...
سعود "فتح عيونه بصعوبة ":... ياربي ... وش عندك تبربرين فوق راسي من الصبح ....
الممرضه "تعلي صوتها" :.. عشان تاخذي الدواء .. قومي ...
سعود "بعصبيه ":... الحين انتي مين سلطك علي ...
الممرضه "تعطيه العلاج ":.. خودي ...
سعود "معصب": .. وخري عني لا اصكك بكف ... ما ابغاك ولا ابغى شي منك .. ولا عاد تدخلي عندي ... وين منى ..؟؟!
الممرضه : .. ايش منى ....؟
سعود : سستر منى وين ... هي بس اللي تدخل غرفتي انتي لا فاهمه ...
الممرضه : انتي كدا بعدين موشكله ..
سعود "عطاها ظهره ..وطنشها "
عصبت منه الممرضه وطلعت من الغرفه ....

سعود "يفكر في كلامه ":...انا ايش قلت لها ... ليه سالت عن منى ..؟!.. "عدل راسه ..وحط يده على جبهته "... او و و ف كله منك يا عمر ..خليتني افكر فيها غصب عني .... بس والله فكرة مو شينه .. هي ناقصه وانا بعد "بحزن" ناقص ..
دق الباب ودخلت منى ....
منى "بقلق واضح ":.. الممرضه "نتالي".. تقول انك رافض تاخذ العلاج .. خير سعود .. ايش فيك ... انت تعبان ؟
سعود"يطالعها بنظرات كانه أول مره يشوف جمالها ونعومتها":..
منى "حست ان نظراته غريبه مو مثل كل مره":.. سعود ..سعود ..رد علي ...انادي لك الدكتور ..!؟!..
سعود "هز راسه بمعنى لا ... وابتسم ":..ممكن تعطيني العلاج انتي ..
منى "حاولت تطنش نظراته وابتساماته ... عطته العلاج .. والمويه ":..بالعافيه ..
سعود "بنفس النظرات":الله يعافيك من كل شر ...... اقول منى ..
منى "مدري ليه عندي احساس ان عمر قال له ":.. نعم سعود ..انا عندي جوله مع الدكتور هشام ياليت بسرعه اذا تبغى شي ...
سعود : انتي سعوديه صح ..؟!... طيب ليه كاشفه ...؟!
منى "ابتسمت باستهزاء":.. المدير عايز كدا ..."بحزم" وبعدين انا لي اكثر من شهر ونص ..ما سالتني ولا تكلمت معاي .. بس يمكن عمر اثر عليك ... ولا تقول لا لانه واضح عليك ...
سعود"ابتسم":.. والله صرتي تفهميني ...
منى "بجديه ":.. سعود انا بنت ناس ومحترمه .. واللي صار لي صار عن جهل حتى لو كان قبل سنه ... "دمعت عيونها".. وانا متاكده ان ربي راح يستر علي .. لاني تبت ولاني مظلومه ..
سعود : لا لا تفهميني غلط ..."سند راسه ..وطالع فوق" يا منى ..اهلي تعبوا كثير معانا انا واختي ...تدرين ان عبير بتملك على وائل ..عشان يساعد ابوي .. وبصراحه حتى انا ودي باحد يساعدني ...
منى " تمسح دموعها":... قصدك ممرض او ممرضه من المستشفى ..
سعود "رفع حواجبه":.. لا ..ابغى زوجه طول العمر ... "حاول يتكلم بسرعه لان نظراتها بدت تربكه .. وبحزن".. منى انتي الوحيدة اللي تعرف بحالتي ... وانا بعد اعرف بوضعك ... خلينا نجتمع يمكن يقدر كل واحد يعوض الثاني عن النقص اللي فيه وتطيب جروحه ..
منى "مو مستوعبه ":...
سعود"ابتسم لها ":.. منى فكري بالموضوع .. لاني محتاجك ...

بدون ولا رد طلعت منى من عند سعود .. وهي تفكر في كلامه .. يا ترى هل فعلا سعود قال لها هالكلام عشان يختبرها والا هو صادق .. "تنفست بصعوبه ... ولكن بدت ابتسامه على وجهها ".. عمري ما فكرت في سعود .. بس بصراحه هو انسان خلوق جدا ... "فتح باب الاصنصير ... وعمر بوجهها هو وخالد واحمد وعبدالله"...

عمر "قطب حواجبه ": .. اوووف لسى ما نظفوا المستشفى من التلوث ...
احمد "وهو عارف عن منى كل شي من عمر" : الله يرجك .. انت وهالتلوث ...ههههههههه.. بس بصراحه اليوم كشششششخه ..
منى "طالعت في عمر بقهر" :..حسبي الله ونعم الوكيل .."ولفت تنزل من الدرج ودموعها تسبقها "...
خالد "يضرب احمد على كتفه ":.. اخرج اخرج من الاصنصير.. وبعدين كم مرة قلت لك لا تقول الله يرجك ما يجوز ..تفهم والا ما تفهم ........"ومشيوا كلهم متجهين لغرفة سعود"
عبدالله : وفر وفر ضحك يا احمد بنشوفك بالليل وانت مسافر...
احمد "بزعل":.. يؤؤ ليه تذكرني يابو نسب خلنا ننبسط ...
عمر "يكلم عبدالله": ياخي ارحم الولد .. وعطه شي من ريحه خطيبته ...تراها سبع سنوات مو بسهله....
عبدالله :.. وش اعطيه يعني ... ينتظر محد قاله يدرس برا ..
احمد : جينا للوي الذراع ...هاه هاه تراني ما احبه ...
خالد: تراكم ذبحتونا باحمد ونجوى ... صاروا عرسان الموسم ...فكونا من البزارين الله يرحم والدينكم ...
عبدالله :..هههههه .. ولا يهمك تسمح لنا نقول خالد ومنال ...
خالد "ابتسم بدون تعليق"...
عمر : ههههههه شوفوا الابتسامه .. والله شكلي غلط بينكم انا عزابي وانتو تجرحوا مشاعري ...
احمد"باستهزاء" : اخطب ومين ماسكك ...
عمر "باستهزاء": ماسكني نفسي ..
احمد "باستهزاء": ما تضحك ..
عبدالله : يا ا ا ا صبر الارض ...اسكت انت وياه بيجيني جلطه من ثقاله دمكم ...
خالد "يدق باب غرفة سعود ":..عشان لا تلومني اذا قلت لك بزران ..

دخلوا على سعود اللي يفكر في منى .... سلموا وجلسوا عنده ... بسبب سفر احمد الى لندن بالليل ..حبوا يجتمعون ..
سعود : وين وائل ..؟!
عبدالله : يوووه مشغول بالملكه ... مو فاضي ...
خالد : أي يوم انت طالع يا سعود بالضبط ...
سعود : الأربعاء ان شاء الله ...
عمر : حتى امي واختي طيارتهم الأربعاء في الصباح ..
سعود : احس اني عمتي تعبت قبل أسبوعين كانت هنا ... عسى بس مطولين..
عمر : لا طيارة العودة يوم السبت ... عشان اتابع تقديمي هناك .. صار فيه مشاكل ...مدري من وين جتني...
خالد : تنحل تنحل ان شاء الله .. لازم يصير كذا عشان تحس بقيمة الجامعه وتشد حيلك ...
عمر "بتعجب":.. تخيل ارسلوا لي ايميل من قبل شهر ..يقولون تم قبولك ... والحين يقولون صادف الكمبيوتر خطاء اثناء تسجيل بياناتك ..الرجاء مراجعة الجامعة قريبا ...
عبدالله : غريبه والله ....
سعود : الله يعين ...الا اقول شباب تشربون شي من المستشفى اطلب لكم شي ....
خالد : اخاف نطلب .. وتجيبه لنا التلوث...ههههههه
عمر :هههههههههه ..
سعود"فهم عليهم انهم يقصدون منى ":..ماله داعي هالكلام .. وبعدين فيه ناس ثانيين للأكل ...
عبدالله : صجونا ذولا الاثنين تلوث تلوث ..وش فيكم ...
خالد : خلهم عنك بزران ...
عمر : والله هذولا البزران اللي مو عاجبينك ..ترى نعرف اكثر منك .. وبعدين تراني اقصد الممرضه السعوديه اللي قابلناها عند الاصنصير...تدري انها ..ت ز
سعود "قاطعه بعصبيه":..عمر امسك لسانك ... لا تتكلم بأعراض الناس .ترى مو لعبه .. "حاول يغير الموضوع".. متى طيارتك يا احمد ...
احمد : الساعه 11 بالليل ...
سعود : تروح وترجع بالسلامه .......

......................................................بالليل الساعه 8 ونص..
ودع احمد .. أجداده وأعمامه وأولادهم ... كان متأثر مره لانه بيبعد عنهم ....بس اكثر شي خفف عنه ... هدية نجوى له اللي كانت عبارة عن دبدوب صغير ماسك قلب احمر .. كتبت عليه بخط يدها "لا تنساني يا احمد ..انتظرك ..N"..
...طبعا وفاء لما عرفت قد ايش أخوها وده بشي من نجوى ..شرت الدبدوب واصرت على نجوى تكتب له شي على اساس انه منها .. عشان أخوها يرتاح ويخف شوقه ويقدر يركز على دراسته هناك .. ...

.....................

في فلة ابو وائل ....

يوم الثلاثاء ...سمر .. تكلم عبير عشان يستعدون للملكه... وتشوف ايش ناقصها ..
سمر "على السرير ونايمه على بطنها وقدامها ورقه ":... الكوافيره وحجزناها ... والفستان واكسسواراته خلاص ... والكوشة ..
عبير : أي كوشة ..لا لا مابغى ..اصلا مافيه مكان نحطها فيه ...
سمر : طيب طيب خلاص بلاش كوشة ...

وائل ينادي سمر ..بصوت عالي ...
سمر : عبير هذا وائل يناديني تنتظريني والا تقفلين ...
وائل "دخل عليها غرفتها معصب ":.. انتي ما تسمعيني وانا أناديك ...
سمر"ماسكه الجوال وتطالع في وائل بغيظ":.. لا لا تخافين يا عبير وائل مو معصب بس يحب يمزح ...
وائل "هديت ملامحه ... وبصوت واطي":..هذي عبير ..
سمر : لا عبوره ....هههههههه
عبير "وقف قلبها وهي تسمع وائل .. يقول اسمها بكل لهفة .. و واضح انه هدي لما عرف انها هي تكلم":...سمر خلاص كلمي وائل واتصلي على بعدين ...
سمر : ايه اكلمه هاه ...خفتي من عصبيته ....هههههههه
وائل "يرفع صوته بتعمد عشان تسمعه":..الا فديتها تعرف الذووق مو مثل بعض الناس ...
سمر : رجعنا ..رجعنا لتهزئ... هذا وانا منظمه حفلكم الميمون ..
عبير: خلاص سمر روحي يالله ..حتى انا مشغوله ...يالله باي ...
سمر : باي ..."قفلت الجوال .. وعدلت جلستها ..وطالعت في وائل "... هاه وش عندك بعد ...
وائل "بحماس":.. تعالي غرفتي بسرعه...

وطلع من غرفتها .. وتبعته سمر .. وبس دخلت تفاجأت بفستان لونه احمر على سرير وائل ....
سمر :وا ا ا ا او .. وش هالفستان ... حق مين ...."قربت تلمس الفستان وتتفحصه.."

كان عبارة عن فستان لونه احمر .. بدون اكمام من فوق جايه قصة الصدر بشكل مثلث تنربط على الرقبه بحبال على شكل ظفيرة ... ..والظهر نصه عاري ... وماسك على الجسم من فوق ويتوسع من تحت .. على شكل سمكه ... ومن تحت على شكل ورود من نفس الفستان حجم كبير... ومعاه ورده من نفس الفستان اكسسوار للشعر ...

وائل "بفرح":..يعني صدق حلو ...عجبك ...
سمر : مو بس حلو.... الا فضيييييع ... جونان ....... "طالعته بنص عين".. هذا الفستان مو لي صح ... لعبير...
وائل "ابتسم وحرك حواجبه بحركه سريعه":.. ايه لها .. تتوقعين يعجبها ...
سمر : اكيد بيعجبها ..بس ... بس احنا اتفقنا على كل شي ... حتى الفستان ...ترى الملكه بعد بكرة ...
وائل "بلا اهتمام":..ماهمني فيكم ... اهم شي عبير تلبس هذا الفستان لو طلع عليها مناسب ..يعني اقصد المقاس ..."وكانه تذكر شي ..بسرعه وهو طالع من الغرفه .. وبامر"... البسي الفستان بسرعه ... اشوفه عليك ...
طبعا ما أعطى أي فرصه لسمر انها تعترض ...لبست الفستان .. ودخل وائل يشوفه عليها ...

وائل "يقرب منها ويتاكد من الخصر ومقاس الصدر":.. مناسب صح .. اصلا جسمكم قريب من بعض كثير ...
سمر "فتحت عيونها فيه":هب عليكم يالرجال.... هذا وانت شفتها ربع ساعه قلت كذا لا وبعد وهي جالسه ..والله انكم تخوفون ..
وائل "مطنشها":..خلاص فصخيه لا تقطعينه ..
سمر : يكون في معلومك ترى عبير ما تبغى تلبس في الملكه شي عريان كذا ...
وائل "بنص عين":وليه ان شاء الله ..."تذكر لما شافها يوم ملكته على شيماء ولابسه قصير" يعني هي ما كانت تلبس ..
سمر: الا تلبس بس تقول قدامك تستحي...
وائل"ضحك":.. طيب مو مشكله قولي لها وائل ما بياكلك ... واذا تبغى البس نظارة شمسيه لبست ...ههههههههه
سمر :ههههههههه ..يالله اطلع خليني افضخ ...

.....................

يوم الاربعاء في الصباح ... الكل كان مشغول كثير.... وخاصة ان وقت ما بيطلع سعود و وصول العمة نوره وبنتها ...والاستعداد لملكة وائل وسمر اللي بتكون بكره ...

عمر .. صحي بدري وراح المطار عشان يستقبل امه واخته ....
اخذهم معاه في سيارته ...وراجعين بيت اخواله ....
عمر "يطالع في المرايه في شوق ":...شوقه وش فيك هاديه على غير العاده ...
شوق "تطالعه بنظرات توتر":.. ولا شي ...
نوره " بتردد":.. مافيها شي بس ما نامت مضبوط امس ...
عمر :ههههههه هذا كله فرحه انك بتشوفيني ...
شوق "لفت تطالع في القزاز ..ومطنشه كلام عمر "....
عمرم..شك في اخته انها مو على طبيعتها ...بس توقع انه إرهاق من السفر....

....................

سعود .. كانت منتظر جيه منى له عشان يعرف ردها قبل لا يطلع من المستشفى .... وبعد طول انتظار دخلت منى ومعاها الدكتور هشام ...اللي أعطى نصايح لسعود وكتب له علاجات جديده... و وقع على ورقة الخروج ....وطلع من عنده ..وبقيت منى مع سعود....
سعود "طالع فيها بشوق":.. منى ...وين الغيبة ... لك يومين مختفيه ما شفتك ..!!.. فكرتي ...؟!
منى "منزله راسها":... سعود ... انت شخص أخلاقك عاليه وكل بنت تتمناك .. بس
سعود : بس ... بس ايش ...انتي مو موافقه علي ...."رفع بصره لفوق".. بعذرك يا منى .. كل بنت تتمنى الامومه أكيد ...
منى : لا لا يا سعود ... مو لاني اعرف بحالتك ... السبب مني انا ..ما ابغى بكرة تتأثر بكلام اللي حولك عني ...
سعود : قصدك عمر ...
منى " دمعت عيونها":... ايه عمر ... ما توقعته يطلع كذا ...قال للكل عني ... بس ما اقول الا حسبي الله ونعم الوكيل فيه ...
سعود "بعصبيه":.. ما عليك عمر هذا شغله عندي .. كذا مرة قلت له أعراض الناس لا يتكلم فيها ...بس عنيد.....
منى : انا بطلع ....
سعود "يحاول ما يطالع فيها":.. منى انا ..انا محتاج لك يمكن اكثر مما انتي محتاجه لي... فكري بالموضوع مرة ثانيه ومن كل النواحي وانسي عمر ..."طالع فيها "..توعديني ...
منى " من نظراته ما قدرت الا انها تقول ":... ان شاء الله ...
سعود: اتمنى تحضري بكرة ملكة عبير... راح تكون فرحانه فيك ..
منى "ابتسمت ": بحاول ...

دق باب غرفته ...ودخل وائل ............
وائل : سلام يابو نسب.... هاه جاهز ........
سعود "بفرح":...هلا وائل ... ايه جاهز ...
منى ... طالعت في عيون سعود وهو يطالعها ابتسمت له بشكل غير هالمره ...وخرجت من الغرفه وتركتهم لوحدهم .....
وائل "يطالع في سعود بنظرة استفسار": .. نظراتكم لبعض مو عاديه ...خير وش عندكم ...
سعود"بحرج":... يؤؤؤ منك ما تفوت شي ..
وائل : لا تقول انك تفكر فيها ....يا سعود وسمر ...نسيتها معقول ..
سعود"بزعل":.. والله يا وائل لو مو ظروفي ما يفرقني عن سمر الا الموت ... بس انت عارف ...خليه يكون فيه شخص واحد ما ينجب بالعائله مو شخصين ... حرام ادمر سمر وهي صغيره ..واحرمها من طفل ..او اتعبها معاي بالعلاجات وغيره ...
وائل : يعني الممرضه ما راح تتعب ....
سعود "نزل راسه": هي عارفه كل شي عني ... وراضيه.... بس عمر هذا مو ناوي يتركها ...
وائل : ايش دخل عمر ...
سعود "شال اللحاف عنه ":.. بعدين اقول لك .. خلينا نطلع الحين الحين ..
وائل "يمسك سعود":.. وين وين ..انا كلمت الاستقبال يرسل لنا ممرض بكرسي متحرك ...انتظرهم ...

أنوثة خياليه بالرغم من الملابس الرجالية..كامله

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget