الغيب عند الذي من فوق كرسيه
سبحانه اللي خلق وأبدع بتكويني

اللي أمرني بتوحيد الأولوهية
الهي اللي يموتني ويحييني

أخضع له الراس .. وأبكي .. وأرفع يديه
يالله برحمتك يوم العرض تحويني

عبدك ضعيف .. وعظيمات معاصيه
ما غير رحمتك يا رحمان تنجيني

أدعوك بالسر .. وأدعوك بعلانية
يمكن يأمن (ولي صالح) وتهديني

ابليس مغوي .. ونفسي جات مغوية
ودنياي يا خالق دنياي تغريني

كم شلت فوق النعش .. جثة ومطوية
ودفنتها والتراب يلطخ يديني

وكبرت وأول سؤال مر طاريه
متى عليه يصلون المصليني

وليا طلع صبح غد .. ومالت الفية
يعرض لي ابليس وأيامي تمنيني

حالة ضياع وقلق ... وأشياء مخفية
وترميني الناس .. مدري ليش ترميني

مع أن دايم خطا نفسي حواليه
والناس مالي وراها شي يعنيني

أجنح مع السلم .. والعالم عدائية
والله حسيبي على قوم تعاديني

ماهو مكفيهم أني صرت مارية
للهم والضيق ..واللي بيني وبيني

بيه بلا .. والبلا .. ما أعرف وش بيه
ولا لقيت الدواء .. والبحث مضنيني

واللي نفع به دواه .. وعلتي زيه
ماهو بشرط الدواء نفسه يداويني

لن العلل ترتبط بأسرار نفسية
نفسي .. وأنا أدرا بها .. والله يعافيني

تغفى عيوني ... وجنبي فوق جنبية
من كثر ما اعتدت ألمها .. ما تصحيني

مرت ثلاثين .. وجروحي كما هيه
وأنا نفذ كل صبري .. يا ثلاثيني

مجنون يا وقت .. وأفكاري جنونية
أحسبك تبرا جنوني وأنت تبريني

وأن زاد بريك .. لي الله ثم من ليه
ألا أنت يا صوت راشد يوم تاتيني

ترمي عن الصدر .. وأتنفس .. بحرية
يا من وجودك على الدنيا مكفيني

اخوي ... وحزام جنبي .. ناري الحية
جناحي اللي يعوضني .. جناحيني

عندي من الوقت وظروفه حساسية
وأشري بخاتم ذهب .. خاتم بلاتيني

ما طحت يا ابو فهد والنية النية
لكن ليا طحت مثلك مايخليني

عساك تبطي .. يا أبو كف نداوية
وأنا عساني قبل لا أرثيك ترثيني

فان مت قبلك فهذي أكبر امنية
وأن عشت بعدك تبي تكثر سكاكيني

كلمة على خاطري .. من وقت مكمية
سريتها والغلا يمك مسريني

مار أطلب الله يخفف عني شويه
الهم يا بو فهد ولع شراييني

يارب عطني رضاك .. وروح مرضية
وخذني على باب بيتك باخر سنيني

على صدى صوت (ماهر) وقت فجرية
أرتاح مع صوت (ماهر) لو يبكيني

وليا ركعت .. وتغشى البرد رجليه
أمهلني أسجد لوجهك باكية عيني

صح السانك ي مطلق