يايمه منتهي جيتك وطالب منك الغفران
اقبّل قاعة اقدامك واغسلها بدمعاتي

يايمه كل مافيني يناديلك انا ندمان
طلبتك قولي سامحتك وردي لوجهي بسماتي

انا ادري قلبك الطيب كسرته بصدمة النكران
غلطت وغلطتي هذي تعيّر كل غلطاتي

تشوفي الشيب يايمه ترى ماجا وانا فرحان
وربي اللي رفع ذاتك ونزل للردى ذاتي

فقدت الراحه من بعدك فقدت الطيبه والتحنان
بدونك راحتي غايه بيدينك هذي راحاتي

انا بعدك ولا حاجه انا بعدك ترى عميان
اشوف ولا اشوف اللي يوريني مسراتي

انا وسيد الشقى والهمّ من بعدك غدينا اخوان
يجيب هموم هالعالم ويرميها بمتاهاتي

صدقتي يوم قلتي لي تدين اليوم بس تندان
رميتك في بداياتي ورموني في نهاياتي

انا من شالك بايده ورماك باسفل البركان
نخيتيني وطلبتيني ولا حصلتي نخواتي

مثل ماهنتي بعيوني عليهم قلبي يمه هان
رموني وبعتهم فزعه وانا الدمعات فزعاتي

يايمه لاتضنيني انا من فعلهم زعلان
سواةً فيك سويته وسووا فيني سواتي

يايمه يالله ضميني ودفيني بهالاحضان
انا ادري فيك مشتاقه وهمك بس ملاقاتي

يايمه حيييييل ضميني ابي ارتاح انا تعبان
تعبت اهرب من ذنوبي ابيك اخر مسافاتي

ابسمع منك اي كلمه لصوتك مسمعي ولهان
ابسمع يمه بصوتك ابذكر فيها نشواتي

اشوفك ساكته يمه غفيتي والا انا غلطان ؟؟
غفيتي يابعد عمري تعبتي من مواساتي ؟؟

يايمه طالبك قومي اذا لي بعيونك شان
اشوف الموت بعيونك عساها تخيب هقواتي

تعالوا يابشر شوفوا انا محتار انا تلفان
انا امي مادري وش فيها انا مادري انا احاتي

شنو ؟؟ امي انا ماتت ؟؟ لا لا ترى غلطان
انا امي ماتخليني على حزني ووناتي

انا امي قلبها طيب ولايمكن تبكي انسان
انا امي ماتبكيني ولاتتمنى اهاتي

يايمه صح مامتي ؟؟ وصح الموت تو ماحان
اذا متي انا بعدك ابقضي وين ساعاتي

يايمه قومي يايمه وقولي الموت لا ماكان
انا جيتك وانا ناوي اببدي فيك جناتي

تركتيني ومتي ليه ؟؟ تركتيني وانا غرقان
ولا مسموح ياوليدي ولا تلعنك لعناتي

انا الجاني وانا المجني وانا المخطي وانا الندمان
وانا بيدي رميتك ايه وبعثرته ملفاتي

وجيت من الهنا مفلس وقلبي من الضنا خسران
تركتيني على ناري اعدد فيك زلاتي

ولاني مرضياً ربي ولاني تابع الشيطان
انا بعدك ترى مابين نهاياتي وبداياتي

يايمه منتهي جيتك وكلي مرتجي غفران
وشفت الناس تلعني وتحذرني من الاتي

منقول