قصيدة الشاعر فيصل الرياحي رحمه الله

((وصف الرجال ومواقفهم ))

يقول الرياحي :

يوم إستمرت لي بيوت القصيده=نبدا بوصف وكل وصف نجيده
وصف الرجال صعيب للي يريده=لكن أنا فالوصف مانيب بلشان


رجل معك بالحيل والحال والمال=لو مل بعض الناس ماهوب ملال
يمشي معك بالروح في لاهب اللال=لا ضايق باله ولا هوب زهقان


ورجل ليا منه بغى منك ضحاك=وإن خذ لزومه غاب عنك وتناساك
يبور بك تالي زمانه ويجفاك=نسي الجمايل يوم قفا والأحسان


ورجل رويغي ماتصيده محابيل=يمتاز فالمجلس برشف الفناجيل
ماقط ضالو في محله مشاكيل=ولاقط شكر له عن الزاد ضيفان


ورجل كريم ودائما مرحباني=يمناه تبذل كل يوم حساني
يملا بصنف الأبيضين الصياني=رز بها مزبور وأذيال خرفان


ورجل ربادي يفعل الزين والشين=دلو تجي مويه ودلو تجي طين
يواعدك بالسبت ويجي يوم الأثنين=لاهوب لاناسي ولاهوب غلطان


ورجل فقير وينفق الصبح والليل=بيته لعكفان الشوارب مداهيل
والرزق ياتي له من الله تساهيل=مايترك الماجوب لوكان فقران


ورجل غني لكن مايفعل الجود=يدس ماله فالمواضيع مرصود
ليامات عن ماله محاسب ومنشود=والمال يقسم بين وارث وطمعان


ورجل تعلق خافقه بالمساجد=تلقاه دايم فالمحاريب ساجد
يالله عسى أمثاله من الناس واجد=الدين رأس المال والرب رحمن


اللي مسك دينه وربه يخافه=عقل حكيم وقوة باللطافه
مؤمن قوي ماهوب مؤمن ضعافه=قاسي قساوة حق وليا قسوا لان


ورجل معقد غاطس فالحماقه=ماكنه إلا أبليس بين الرفاقه
في كل يوم قاطعين بناقه=أقشر ويلقى له من الناس قشران


ورجل يغامر مير مامن مخاريج=وأحيان يبلش ويتمنى المناهيج
حيث العلوم إلها سلوم ومداريج=والرجل قد قال المثل قلب ولسان


ورجل حسود ولا يبا الخير للناس=كنه على أبواب المواهيب حراس
علة نحر قاصر نظر خاوي الرأس=يستخدم الضحك المزيف بالأسنان


ورجل نموم يجمع الهرج دايم=بين البشر ضاري بنقل النمايم
كم غافل يرمي عليه الظلايم=عساه يذهب ضاريا بالتمحان


ورجل كذوب وكلمته ماتعدي=يجيب من هذا لهذا يودي
ولاينحسب قوله حقيقي وجدي=وإن جاء مجاله قالوا الناس كذبان


ورجل جزوع أ يات شيء يروعه=حمر له العين وتهامل دموعه
لوقلت وش رأيك ، تصافق ضلوعه=مقطوع يمنى فالمهمات جابان


ورجل صبور فالشدايد لياحد=مثل الجبل ثابت ولاهوب ينهد
في واجبه ماقط عن واجبه صد=يفوز بالسبقات في كل ميدان


ورجل نصوب رز عنقه على ماش=متكبر في كل مجلس وبكاش
أن فتح باب المجد يجفل وينحاش=وإن صك تلقاه إمتندم وخجلان


ورجل صميدع فالمهمات صامل=كامل ولاغير الله الفرد كامل
لياشاف ميلات الخطا مايجامل=يفرك على كبود المعادين خفان


ورجل معنى ماكسب حظه الخير=يقضي حياته بالعنا والمشاوير
ودايم يجيله في طريقه عواثير=مايحصل التوفيق والحظ تعبان



ورجل عنادي مايطيع النصايح=جويحة كان البشر به جوايح
دايم مكلح ضاريا بالكلا يح=وإن قلت له مخطي ، نفر منك زعلان


ورجل حليم وخاطره مايضيقي=له ناظر بين النواظر طليقي
وليا نطق ينطق بهرج حقيقي=مافي كلامه زود ، وزن بميزان


هاذي مثايل والمثايل دلايل=جملة دروس للقلوب الهبايل
ولاني بناطور على كل عايل=من ضاع جعله بين زند وصوان


لاشك فينا غيرة ماقدرنا=نسكت على نظراتنا اللي نظرنا
يالله لا تعمي بصاير بصرنا=ياواحد فوق المخاليق منان


المعرفه برهان والشعر له دور=نطرح مشورتنا لمن يقبل الشور
والعبد منهيا من الله ومامور=ولا يتفق في نظرة وحده إثنان


مابه إثنين بقلب واحد يعيشون=كل على رأيه وله هجس وظنون
أقولها والناس غيري يقولون=سبحان خلاق المخاليق ديان


الله خلق ماشي وزاحف وطاير=سر الله أعظم من جميع السراير
وحنا على نوعين ، وافي وباير=والحق حق وماعدا الحق بطلان


لوحضر الأنسان كامل إحساسه=بعقل ود رس كل الوقائع دراسه
أقل شيء يشيب ويدوخ رأسه=ويقنع من ألف الكيلو بربع فدان


ومن لا قنع لابد يقنع بيومه=ليا مات لو بريال محد يسومه
ماعاد معه إلا صلاته وصومه=يوم القيامه بين مالك ورضوان






مع تحياتي انت الغلا