تطفى شموع وشمعة الحب تولع


أنا حبيبي يشبه الظبي الاتلَع ........ له نظرةٍ في حبة القلب صايبه


من نظرته مخطرعلى الروح تطلع ........ وهوه دواها وعوقها من سبايبه


يا خفق قلبي يوم قَفّا وودّع ........ خفق اشقرٍ ومعيد صيده كسايبه


خطرٍ على كل العراوي اتقطّع ........ جزعٍ رموعٍ في هواه وطلايبه


ويا لج وجدان الغريم المولّع ........ ويا حرّة الدمعه على الموق ذايبه


تطفي شموع وشمعة الحبّ تولع ........ والشمس تطفي نورها وهي غايبه


قبل الهوى عيني عصيّه ما تدمع ........ واليوم دمع العين تجري سكايبه


ناح الحمام ولو لنوحي تسمّع ........ وأنا أردّد من نشيدي عجايبه


وان ناح بأشعاري إذا ناح يسجع ........ بأصواته ألحاني تغنّي رعايبه


لي صاحبٍ حسنه غريبٍ منوّع ........ ما تدرك الوصّاف كثرة غرايبه


متجددٍ والعين منه ما تشبع ........ مهما تملّت في محاسن هدايبه


يا خشف ريمٍ في الخلا القفر يرتع ........ يرعى الكفايف خاليٍ في عشايبه


يذيّره ضِلّه حذورٍ مروَّع ........ في مثله القنّيص منواه خايبه


سراب وصلك مورد العذب يخدع ........ وانا الظّما أسقانيه من شرايبه


ما شفت طيرٍ طار إلا ووقّع ........ لو هو بلغ عند ارتفاعه سحايبه


أيّام حلوه مرّت ليتها لو بترجع ........ تحيا بها نفسٍ من الشّوق ذايبه




أحدى قصائد سمو الشيخ محمد بن راشد ال مكتوم