قصيده
دقه وتسكيرة


رجم الهوى اللي لعن كوثر جماهيره
عز الله أنه مايستاهل تعب ساقي
أتعبتها في مراقيه ومشاويره
ذي جرتي نازل .. وذي جرتي راقي
لبيه يا (ساره) .. ولبيه يا (منيره)
في مهبل الناس مدري ويش أنا لاقي !!
صدر الشمالي عليهن فك أزاريره
اللي من ادم وحوا مابعد ضاقي
جن المدينه على غفله من الديره
وتورطن بالرومنسيه والأشواقي
مايكتبن أساميهن بالطباشيره
بيعلمنك عن الموضه والأذواقي !!
وجيههن طالعات من الكوافيره
من كثر الألوان كنها (سبحة عراقي)
مافيه داعي أجاملهن بتكشيره
وأقول مشتاق .. لو مانيب مشتاقي
ماهن بكفو السهر .. والحزن .. والغيره
ودموعي .. وشعري الموزون .. وأوراقي
(كرت أحمر) و (باب طياره) و (تسفيره)
في (قلعة الوادرين) و (بألف طقاقي)
الهندي و وايته !! والعود وبعيره
هذا مدور ذهيب !! وذاك سواقي
لو ما أنصفتني سنين العمر الاخيره
ماطبقت عيني أحداقي على أحداقي
قفلت سيرة علاقات .. وبدت سيره
اللي عليها الكلام وهقوة الهاقي
أبرك ضيوف الهوى !! وأغلى مساييره
ريحانة تقطف اللهفه من أعماقي
ماهيب من قوم : (ابو دقه وتسكيره)
من قوم : (لاحاسبت ماتاخذ الباقي)
لها على الزين تهليله وتكبيره
أنعم من الورده اللي فأول الساقي
مهيب أميره لكنها جنب الاميره
ذات الحسب والنسب والمستوى الراقي
من (أغنياء الرياض) ومن (هواميره)
شركات أبوها بضايعها فالأسواقي !!
يومي لها الغصن وتغني عصافيره
والأمر ينقاد لرضاها وينساقي
غيداء سهم عينها من قو تأثيره
مخسر سوق الأسهم عند الإغلاقي
البدي والهيكل اللي ماتبي غيره
(أصطب) و (أستبنتين) و (قير علاقي) !!
مازين أخلاقي الطب بعقاقيره
لولا عقاقيرها مازانت أخلاقي
من قبلها الحظ من جفره لدحديره
لين أوعزت للزمان وحرر وثاقي
وأعتضت عن قوم : (ابو دقه وتسكيره)
باللي : (ليا حاسبت ماتاخذ الباقي)



مع تحياتي انت اللغلا