وش عاد باقي ياعرب مأخسرناه
بغداد راحت وانتهت بعد صدام

واليوم تونس تشتكي الظلم والاه
ظلم الرئيس اللي غدرها ولا دام

وش حيلة اللي مايكفر خطاياه
لأعرش يبقى له ولا ليله ينام

والقاهره تبكي دموع المعاناه
يومين صارت عندهم كنها عام

هذا مع حسني وهذا من اعداه
والمشكله في الشعب لإطاح ماقام

وهذا يبي ينهب وتفكيرة أعماه
مايدري ان الشعب للأرض خدام

وأن جيت للسودان يأكبر بلواه
مقسمه صارت إلى عدة أقسام

بالمختصر يعني مخطط وشفناه
واضح ولايحتاج توضيح واحكام

خذ المثل لبنان حزب الموالاه
بينه وحزب الله هجران وخصام

هذا مع أمريكا وهذا مع الشاه
لعبة مصالح واضحه عبر لعلام

ندري السبب ايران في كل ماجاه
احيان احسه فارسي مو من الشام

وما صار في صنعاء وكل ما رأيناه
إلا دليل الظلم في حكم ظلام

الشعب يشكي قسوة الظلم والاه
دام الرئيس وقبضته قبضة إعدام

وش عاد باقي ياعرب ما خسرناه
عادي خسرنا شعوب من أجل حكام