ما عاد قصرت وادري لك علي حقوق
لنا مده وانا في حال وانت في حال
وجيت استجدي لعتمة خطايا شروق
ترى فاح العذر بصب لك فنجال
وتبختر يا وطن فيني وراسك فوق
ابشعر بك هنا في مهجتي تختال
تبعثر بي غلا ودي اللمك شوق
ابستطعم من شفاه الفراق وصال
كثر ما كان بي برد لدفاك يتوق
ابتوسدك حظن في غيبة العذال
وطن من رق عشقك ماني بمعتوق
تكبل به محبك وارتضاه اغلال
انا السباق لك في غفلة المسبوق
اذا حليت بك واختار له ترحال
انا عاشق ترابك هو بقى معشوق
سواك ابذر به احلام السنين امال
نخل كل السوالف والقصيد عذوق
تعال اخرف من اطراف الحكي موال
على جدار السهر علقت صوتي موق
يغني بس لا من ضقت دمعه سال
تنفستك فجر كان المساء مخنوق
يا اخضر بعد ما ليل اصفراري طال
سماك امسى لسان الحال وانت بروق
بعد ما لحت وش ينطر لسان الحال
سوى وبل مواعد له يباس عروق
عشان يبلله من صادق الهمال
يا مبحر بي من المعلوق للمعلوق
انا نهام واحساسي شجن يا مال
تبي تعرف اذا غنيت بك طاروق
من اقصاي اسمع اش ردد حمام البال
احبك .. ايه احبك ما تبي منطوق
اذا وطنت في ديار الكلام افعال
وطن يا والديني ما يجيك عقوق
عقب ربيت فيني للهجير ضلال
كأني من بقايا طينتك مخلوق
لذا لا يمكن سنيني تصير اطلال




قصيده للشاعر \محمد بن علي السعيد