**<<((تجي يا رب ))>>**



على الموعد بلهفه جيت ..لا مانع ولاتأخير..
لفيت من العصر هايم مع أن الموعد المغرب..
وجتني بس أنا ما أدري شعرت الجيه هذي غير..
وهي تقرب من عيوني ..شعرت أن الممات أقرب..
وقلت الله يهونها..عسى في جيتك لي خير..
أنا من شفتك أقبلتي وأنا خايف ومستغرب..
على كثرالحكي ما أدري كانه خانها التعبير..
قالت لي جمل وأشياء لا تكتب ولا تعرب..
هدت فجأة تطالعني وأنا في حاجه للتفسير..
لجل نحكي بهدوء أكثر سألت الحلوه :وش تشرب..
وصاحتبي أنا أحبك ولك في هالحشى تقدير..
وتدري أن المثل فينا وفي أحساسنا يضرب..
صحيح أنك "وفي" وأنك "بريء" من تهمة التقصير..
ولكن هذي عوايدهم من أيام وزمن يثرب ..
تكون البنت لابن العم ..ورغبات الكبار تصير..
وتدري الاقربون أولى مع أنك للخفوق أقرب..
وتدري للقدر كلمة لعادات الأهل تأثير..
لذا أرجوك تتركني وأنا من دنيتك بهرب..
شعرت بحكيها كنه قصاص وأمر بالتعزير..
شعرت الدنيا ضاقت بي من المشرق اليا المغرب..
مشت خلت وراها طفل مايدرك وش التدبير..
يحسب أن الغرام أشعار شاعر وأغنية مطرب..
ضحكت وما قدرت أني ألاقي لضحكتي تبرير..
من اللي بوقتنا مره ضحك من لدغة العقرب..
رفضت أستوعب اللي صار ولا استسلمت للتغير..
ثمان سنين أجي نفس المكان حزة المغرب..
برغم أن ثمان سنين جروح وكلفتني كثير..
أنا لليوم أجي وادعي.. تجي يارب ..تجي يارب..

أتمنى إنها تعجبكم
ودمتم '