احترق من شان حبه وحبه لي حياه
واعشقه بجنون والعشق نوع من الجنان

لو يغيب سنين وشهور قلبي مانساه
صار اله في داخل القلب منزال ومكان

كن عشقه روض والروض يهنى من لفاه
تجتمع فيه الخزامى وزهر الاقحوان

يامر وينهى حبيبي وانا روحي فداه
الله اللي ميزه والمحبه عنفوان

سقت له صدق المشاعر وتاهت في هواه
وصاحت جروحي تنادي وتطلب للحنان

اشعر اني املك الكون في ساعة لقاه
واعترف بالحب واقول احبك من زمان

ون نطق ون قال احبك وقالتها الشفاه
اتلعثم وارتبك وقت ويحير اللسان

هيه يالمرسول خبر من غبني
علمه بأن الهجر زاد اهتمامي

قله انه لو يغيب اليوم عني
في خفوقي مكتسب كل احترامي

واعذابي كان الايام ابعدني
عن دياره واستمريت بهيامي

اتمنا بس وش جاب التمني
الاماني ما يمس بها الحزامي

جيت طالب للحنان وخاب ظني
لوعة الحرمان يدفعها غرامي

صابني رمشه وفي حبه فتني
يوم شفته ماقدرت اجمع كلامي

الله اكبر كان الايام اقبلني
واقبلت دونه جموع بزدحامي

اتصبر دام الايام اجبرني
فيه امل لو غاب له عشرين عامي

عسى رعد الحياء ينساق غيمه
ويرزم بالمطر في دار خلي


ويحيي قلب عروقه هشيمه
بعد ودان خيره يستهلي


ثلاث اسنين وجروحي اليمه
ودمع العين لفراقه يهلي


سهرت الليل و الغربه ظليمه
و لا به شي فالدنيا يسلي



شربت المر وضلوعي حطيمه
وشوفه ياعيوني ماحصلي


على جمر الغضى كني مقيمه
وبعده يحرق الروح ويتلي


حبيبي كنني بعده يتيمه
تبل دموعي الريضان بلي



غيابه يتعب القلب ويضيمه
وسمايه تنتظر نجمه يطلي

الحزن يمي ساق يمي ركابه
حكم القدر ماعنه صده ومجناب

صفقت كف بكف لا واسفا به
وماكان في عيني من الدمع صباب

دمعي نثرته مثل وبل السحابه
عند الوداع ودمعتي ماتت غياب

حزن الملا يلوح لي في غيابه
اجول بالذكرى على كيف ماطاب

سمعت في صوت النخيل انتحابه
اذكر ليا من شافني فز ترحاب

اشوف كل الدار عقبه كابه
كن المزن واقف ويبكي على الباب

البيت من عقبه تناسيت بابه
السور طاح وباقي البيت منصاب

غاب الفرح عن ناظري في غيابه
مات الصديق ومنزله يرجي احباب

سيارته صارت عليها الغرابه
يقطع توالي هالزمن ماله اصحاب

هذا طريق الحق كل مشى به
تفنى العزوم وطارد الوقت ماجاب

ياعز من جاه ولجى والتجابه
يلبس من البيضاء ليا قام جلباب

الصبر له مفتاح والوقت قاسي
مابين نار وغار والفكر محتار


ماكن حولي كل ربعي وناسي
كني وحيده والزمن صار غدار


لفت بي الدنيا بوقت قياسي
وحترت بين علوم وحلوم وافكار


وقدرت اقاومها بحلمي وباسي
بايمان قلب حافظا كل الاذكار


تغلبت نفسي على طرد ياسي
في قوة ايماني وعزمي والاصرار


يالله يامثبت جبال رواسي
يا عالم كل الخوافي والاسرار


إنك تجنبني دروب المأسي
وتحمي نفوس الخير من كل الاشرار


وتظفي علي ستري وستري لباسي
وانا عزيزة قوم في كل الاقطار


أهلي تميم العز نبعي وساسي
اللي يدوسون الصعايب والاخطار


وانا الاصيله دوم مرفوع راسي
ويكبر شموخي في معزه ومقدار

اسهر واعاني والخلايق ينامون
من سبة اللي في غرامه بلاني

يتل قلبي دون رفق ولاهون
مزع معاليق الخفوق وطواني

لاشفت زوله طحت قمت اطلب العون
وان صابني في سهم حبه رماني

قرم وفي فيه الوسامه ومزيون
اصله عريب بكل شي دهاني

قلبي بحبه صار مغرم ومفتون
وعيني لغيره تبتعد ماتداني

حبيب قلبي له محبه ومكنون
حبي خفى واعلنت حبي بياني

ماطاوع الحساد واللي يعذلون
حبي وحبه سامي بالمعاني

ياعزتي لي كان هو غاب تكفون
ضاع الامل بين الرجا والأماني

الحال ياهل العرف من دون في دون
الحب صعب مايجي بالهواني

والله لو جابوا بداله ترليون
واتبدلت احزاننا بالاغاني !

ماريد انا غيره وغيره يولون
على غرامه قد عطيته ضماني

كانه تغلي ياهوى البال قلي
وكانه صدود اللي طرالك وقفيت


لرضاك كلي جيت واجفاك كلي
كانك عقب ذاك الغلا ذاك صديت


وكانه تغلي خل عنك التغلي
تعال صارحني على ماتماديت


والله لو ان الحب لعب وتسلي
يمديك يالغالي بحبي تسليت


مير الهوى سلمه ماهو بالتخلي
سلمه وفا واخلاص من غير تشتيت


تذكر كلامك يابعد كل ملي
وش غيرك عقبه وبالصد باديت


ياللي لمعلوق الضماير تتلي
تليت خفاق المعاليق تليت


وابعدت عني وانتهجت التبلي
صدقت انا لك بالمحبه ووفيت


مير انت يالغدار م نتاب حلي
ماني مسامحتك ولا لك تمنيت


ابعد ف مان الله مابي التسلي
عمر الزمن مايجمع الحي بالميت

فصيدة / الشاعر ناصر القزلان



ان كان للشعر التميمي سفيره
بنت تمثلنا بكل الميادين

من غيرها هي شاعرتنا الاميره
اللي قصايدها تهز الملايين

مثل الرعد لاحن توحي هديره
على النقاء والعز والمنهج الزين

شيهانة في راس هضبه عسيره
ماحولها الا الغيم بين الشياهين

مادوجت مثل الغنم بالحظيره
يديرها سرحان والناس غافين

باشعارها تقدح معاني خطيره
ماهي سواليف الغنج للشياطين

قصيدها من راس ماتستعيره
ماتشتريها من حراج المواعين

يوم الشعر بلواه صارت كبيره
يزبن على الحوراء ويلقى العناوين

يلقى جزيلات البيوت الشهيره
دوك اسمها يختال بين الدواوين

بنت لها في صفحة المجد سيره
هذيك ( حوراء نجد ) بنت السلاطين

تاج الشيوخ ونعم ذيك العشيره
ال المعمر راجحين الموازين

مركز قوى في وسط شبه الجزيره
من يفتح التاريخ يلقا البراهين

امجادهم سطوه وشيمه وغيره
مكانهم حاجب تعلا على العين

يوم الملاقا بالسيوف الشطيره
والحكم باقي في يديهم له سنين

الطيب فيهم مايحاسب وزيره
بالجود والرحمه وحب المساكين

حل المجال وقلت كلمه قصيره
لاطالب فزعه ولا مشتكي دين

لكن كلمة حق وسط السريره
كتبتها من قلب حشمه وتثمين

تصيب والا جعل بالامر خيره
وادخل على الله من عيون الحسودين

هذا زهر شعري لفاكم عبيره
جمعتها من ورد كل البساتين

اهديتها لعيون بنت ستيره
الوافيه بنت الرجال الوفيين



،،،،،،،،،،،


قصيدة الشاعره الحوراء بنت نجد مجاراة الشاعر ناصر بن قزلان..






يا مرحبا عد المزون الغزيره
ترحيبة من خافقي تقضي الدين

من صدقها تجبر قلوبن كسيره
ومن حلوها مثل النفل والرياحين

تخص زيزوم الامور السفيره
ناصر ولد عمي عذاب المعادين

ياعزوتي يامن لكسري جبيره
ياعضدي ان تاهت علي العناوين

ياسيفي البتار وقت المغيره
ويارمحي ان صارت هقاوي وتثمين

خصيتني بالشعر وانته خبيره
وعزالله انك تاج كل الموالين

شعرك مثل وردن شذاه وعبيره
في داخل الحوراء عمرله بساتين

ياولد عمي لك مشاعر جديره
تعجز على غيرك وقولك براهين

في سلمنا تبقى الكبيره كبيره
والشعر اله نقاد ماهوب تخمين

والعفو بالتأخير يابن العشيره
وضع السفر يحكم علي بقوانين

مشغولت مابين ديره وديره
مسافره ماكنت فارض الحرمين

واليوم جيت وحيرتي غير حيره
حيره عساي ارقى بردي لغالين

لانك ومن يعلم خفي السريره
احرجتني في رد طيبتك والدين

لعل سيف الطيب يشهد جفيره
وارضيك لنك من له الطيب يدعين

طيفك لفاني يوم خلق الله امسو
وسهرت ليلي والسماء كلها ديم


امطر علي وهات لاصرت لي جو
روحي لك المضياف روحك معازيم


في طلتك مانيب محتاجة الضو
ليلي شتاء ممطر وانا بالدفا اهيم


معاك احس بمتعة الديم والنو
وتغني افراحي شموع وترانيم


كل شي بوجودك خيالي ومحلو
وطعم الحياة مغرق بشهد تسنيم


كن الحياة بغيبتك بور وخلو
وعنوانها هم ومذله وتحطيم


من منبع اشواق الغلا اقدع ورو
واشرب حناني واحمني لوعة الضيم


يا اطهر ذنوبي ماتبي بالحشا سو
مالك سوا حب ومهابه وتسليم

يالعاصمه فزي على شان سلطان
خلي طوارف نجد ينبت زهرها

ومع فزتك حبي على راس سلمان
في غيبته عينك تداعى سهرها

بقدومهم فرحه وتوديع الاحزان
كل النفوس انزاح منها كدرها

والمملكه بحظورهم شانها شان
حقيقة ماحد بربي جبرها

والمزن جادت في لذيذات هتان
لين الريوف افنت مدايد دهرها

والقاف غنى له بعذبات الألحان
صعب المعاني لجل عينها سبرها

سلطان مسعد كل جايع وظميان
عز الموالي والمعادي دحرها

ياحظنا به يوم شرف للاوطان
إي والله انه لليالي قمرها

وانه برب الكون ما مثله انسان
والشاهد ان القاع غطرف زهرها