تويت
جدتي حصيصه تقولكم تعالو ..~
السلام عليكم ~
مساكم الله بالخير والرضاء
الله حيهم شنبات وبنات عبير
أن شاء الله أنكم بخير وأموركم تمام
طبعا أكيد بتعرفون جدتي حصيصه وش تبي فيكم ..؟!
هذا الله يسلمكم كنا في بيت جدي والعيله كلها نايمه باإشتثناء شيبان العائله
عاد جدتي ماهو عاجبها وضعنا سهر للصبح ونوم للعصر .،وكنت نايمه أنا وخالتي وبنات خالاتي وخواتي
وجت تهاوش
~} أوب جديد هي دايم تهاوش عند النوم 
الهم قالت أنتن طول الوقت متجعفات ونايمات قومن
أنا من فتحت الباب حسيت فيها عاد يوم قالت متجعفات وأنا أموت من الضحك ~} أحد يضحك وهو نايم
المهم يوم صحصحت سألت جدتي قلت جده وش متجعفات ..؟!
وتبداء تقب من جديد
أنتن طول الوقت نايمات وحالتكن حاله لا أكل زي الناس ماغير تاكلون من هالدعافيس اللي مامنها فايده ....) قعدت تهاوش وبعد ماخلصت قالت معناها متبطحات ونائمات
ودعافيس : أي الشيبسات والبساكيت والاشياء هذي
( لها أكثر من معنى وتقال حسب الشي الموجود).،
فمن هالحادثه حبيت أن يكون موضوعنا هذا عن جميع المصطلحات الشعبيه القديمه اللي بدت تتلاشى واللي كانت تذكر ومازالت تقال عند جدانا وجدانكم
يعني كل واحد فيكم يدلي بدلوه وكل المصطلحات الغريبه أو المعروفه لدى مجتمعه .، منها نتعرف على معنى هالكلمات
ونشوف الأختلاف والتقارب بين بعضنا البعض
.،
وأنا راح أبدء ببعض اللي أعرفها وأسمعها
الهمام
يعني بسرعه ، وانجز الشي اللي تسويه ، ولا تصير ميت بشغلك
بليه أو ماخوذ
يقولها الواحد ، اذا مل من اللي قدامه ويبي الفكه منه
السحله أو الغضاره
اناء دائري ، يشربون فيه من اول المويه واللبن
جغمه
الجغمه هي ، زي الرشفه يعني بالشرب تنقال
أمرح
يعني نام وخمد ، فلان امرح عندنا ، يعني رقد ونام
الأطخم
بذاك الوقت ، المزايين يسمونهم طخمان
بالطقاق
يعني ، بقريح واللي ما يحفظك طس
مطفوق او مخروش
يعني يحب العجله ، وكل شي عنده بسرعه
دوك
يعني خذ الشي ، (دوك مفتاح البيت)
الحصير
وهو الفرش اللي يزين من خوص النخل .. ويسوى منها فرش للجلسه
ثوب الكرته
يكون مزموم مع الصدر وسيع يخقل
مسباح
وهو يكون زي السلسال حول الرقبه بس انه عريض شوي
القلاده
وتكون كبيره واكبر منهن كلهن
الرشرش
كبيير يكون على الصدر كله
الغوايش
ويجون يصفونهن بيديهن 12 حبه باليسار و12 حبه باليمين للناس اللي ربي مغنيها
اما الناس اللي على قد حالها يا ست في كل يد او اربع
الرحى
يطحنون به الحبوب من حبوب السنبل وغيرها
هذا اللي عندي اللحين
.، أبيكم تذكرون كل شي من أمثال .، مدح هجاء رثاء .،أدوت طبخ زينه أستعمال باي شيكل شي تذكرونه قوله .، ولا تخلون في جعبتكم شي
.،
طبعا للأمانه الفكره فقط منقوله لكن القصه الكلام والحتسي اللي فوق من جعبتي باأستثناء بعض المصطلحات اللي تقال عندنا لقيتها جاهزه وجبتها
.،
الهدف من الموضوع:
1/ إحياء موروثنا الشعبي
2/التعرف على بعض المصطلحات اللي نسمعها ونجهلها
3/نوسع صدورنا شوي .، وننشط قسم العام
.،
خيتكم الطخمه
/ مطنوخة جهينه 
دوكم هذي لكم
هيا أنطلقو على بركة الله
الحمدلله ما عاد فيه منه الان المهم اللي صار يا طولين العمر 
جلسنا نطالع ببعض كأن أمي وإبوي يضحكون علينا .. وقالوا لنا يعني إصعدوا (طلعوا لهم فوق ) 
إلى هذه اللحظة مو عاجبتني الكلمة يا ويلي إذا فيه حساوية هنا بنطق ههههههه
تعليق