الليل توه و باقي ع الصبح مشوار
الله يعلم يمكن نكون ميتين

أقدار تجمعنا وتفرقنا أقدار
خلها على الله أحسن نكون ناسين

يمكن يكون الوقت من حرته ثار
والا القدر والحظ دايم معادين

ويمكن يكون الليل من ضيقته جار
مسكين وحده يبتسم للعاشقين

الله خلق دنيا وخلق ناس كثار
ما كنت أدري في الهوى دربنا وين

سبحانه جمعنا وشابه بالأفكار
وصرنا أنا وياك ضمن المحبين

لا تزعلين أرجوك لو صار ما صار
إتعودي هاذي حياة المحبين

فرقى ووداع ونوح ودموع ونار
ما للحزن اخر على قلوب طيبين

مجبور أقول لك روحي والقلب محتار
خايف عليك عيون ناس معادين

وخلي القصايد عندك تكون تذكار
وإدعي لي بالخير مثل ما دوم تدعين

وإبتسمي دايم يا عسى أيامك أنوار
واذا ذكرتيني أبد لا تدمعين

كوني سعيده وإحفظي كل الأشعار
بالعكس لازم إنتي دايم تفرحين

قالت لي ما أنساك لو صار ما صار
لا تدعي الفرحه وإنت ميت حزين

يا كيف أنسى اللي من رموشه أغار
ويا كيف أنسى قلب عرفته من سنين

صاحت وثار القلب في داخلي ثار
ومن دون تشعر إحضنتني بالايدين

وسال الكحل من عينها وقلبي إنهار
ولمست يديني دموع طاحت من العين

وطلع علينا الفجر وبانت هالأنوار
وقالت لي شف كيف الزمن ماله معين

توك تقول باقي ع الصبح مشوار
سبحان ربي مر في غمضة العين

راحت وعيني تذرف الدمع مدرار
يا كيف وأنا إنسان مخلوق من طين

قالت فمان الله وقلت محتار
مع السلامه يا عسى أيامك تزين

وقعدت وحدي أرسم دموعي أشعار
وأحاول أوصف حال هالقلب مسكين

ذكرت كلمه قالها الخل يوم ثار
لا تدعي الفرحه وإنت ميت حزين

ليت ما كان في فؤادي للهوى والحب قيمه
والا انا مالي ومال الحب اصلن من البدايه

كنت ماخذها هوايه ما دريت انها جريمه
لين اهي صارت جريمه من بعد ما هي هوايه

ما دريت ان المحبه هالكثر والله عظيمه
لين ماربي بلاني وابتلشت بهالحكايه

ما كذب من قال ان الحب اسطوره جديمه
تلقى في حبك بدايه بس ما تلقى النهايه

ما ادري هذا الي اعيشه حب والا بس غيمه
مرت بوسط الصحاري فيها من كل حسن ايه

امطرتني بس خايف من عواقبها الوخيمه
خايف اني من بعد هالغيث ما احظى بالسقايه

مابي اتعود عليها مابي اللقاها نديمه
خايف انها بس تبي قربي ولها في النفس غايه

مابي اعشقها واللقاها على دروبي لزيمه
وانا قلبي منجرح من اول بما فيه الكفايه

لا ياقلبي لا تمهل دام خطواتك سليمه
مابي في الاخر اصرخ يا بلايه ويا بلايه

ادري فيها الزين كامل وادري يا قلبي وسيمه
والدليل القاها دايم كل ما اشوف المرايه

ما ادري هذا الصح والا روحي وعيوني سقيمه
اهي اصلن من عطاها في الهوى حق الوصايه

ماني ناقص اي غيبه من العواذل او نميمه
يكفي قالوا عني فارس احلام الصبايه

وانا والله مالي في دنيا الهوى والحب شيمه
لا اني فارس او اسير حلوات السجايه

بعد جرحي الاولاني ذقت انا مر الهزيمه
يوم ذاك اللي وفيته راح وما قدر وفايه

راح وخلى قلبي بعده والله ما يسوى له قيمه
من بقى لي يوم روح بس لله البقايه

طفله وهزت كياني واشعلت في القلب غيمه
واتركت قلبي وروحي يوم خانتني ضحايه

كنت اظن انها حليمه ما دريت انها لئيمه
تاخذ وتعطي معايا والا حتى مع سوايه

اجرحتني جرح مؤلم باقي في قلبي وصميمه
قلت بعد هالجرح توبه واطلبك ربي الهدايه

ما دريت ان المحبه هالكثر والله عظيمه
لين ما ربي بلاني وابتلشت بهالحكايه

كنت ما خذها هوايه ما دريت انها جريمه
لين اهي صارت جريمه من بعد ماهي هوايه

خلاص يعني الأمل فيك مفقود
وأنا اللي كنت أحسب شعورك عشاني

حاولت ياما لكن الباب مسدود
الله يعوض حبي شوقي وحناني

كنت أحسبك في داخلي دوم موجود
مهما أروح بعيد إنته بكياني

كانت محبتنا أبد مالها حدود
كنت بحياتي دنيتي والأماني

وأنا بقربك عالمي كان محدود
كنت أحسب اللحضات ويا الثواني

ما أمل من شوفك أنا كنت أبا زود
وكل ما أشوفك قلت ربي عطاني

دايم أقول مثلك في هالكون معدود
كنت أحلف إنك إنت إنسان ثاني

كنت الأمل كنت العطر كنت الورود
كنت اللي أشكي له وأقول له أعاني

من كثر ما حبيت عيونك السود
كتبت لك أشعار وأهديت أغاني

ليش الألم ليش الجفا ليش لصدود
بذمتك يعني صار غيري بمكاني

كفي بيبقى لك على طول ممدود
ابعد ليالي بس ارجع لي ثاني

صدقني تلقاني مثل أول وزود
بالعكس يمكن زاد فيني حناني

أكذب على نفسي أقول يمكن يعود
ومرات أصدق وأعترف هو نساني

حاولت ياما لكن الباب مسدود
الله يسامح حظي اللي رماني

ان مت أنا في يوم بوصيك يا دود
لو زار قبري والا انه بكاني

قل له يحبك ويعترف كان محسود
ولو كان عايش كان قال لك عشاني

لا تبكي دموعك ولا تنثر ورود
جيتك تكفي يا عسى تكون هاني

وقول له أمانه يروح عند ناعم العود
ذاك اللي خلاني بدونك أعاني

قل له يقول لك إنت بالحب موعود
دامه أخذك مني أكيد ما بيعاني

لأني أعرفك زين ما تكذب وعود
طيب وفي حساس راعي معاني

كنت بحياتي انته بس اللي موجود
كنت مستعد أموت وتبقى بمكاني

من كثر ما حبيت عيونك السود
أهديت لك عمري والعمر فاني

الا انت ماتوقعتك تخون
ليت كل الناس خانوني معاك
كنت أظن إنك وفي مخلص حنون
ما حسبت حساب غدرك أو جفاك
كنت وحدك ساكن بوسط العيون
لا وربي ما سكن عيني سواك
كنت أبادلك المحبه والشجون
وقلبي بيدينه مفاتيحه عطاك
كنت في دنياي أجمل ما يكون
كنت دايم أرتجي وأطلب رضاك
ليش كل هذا التجافي يا فتون
بعت من حبك وبعيونه شراك
كنت ما أزعلك وكلهم يزعلون
كنت أنا بالنسبه لجروحك دواك
يا حسافه كيف عشرتنا تهون
كيف تنسى اللي دقيقه ما نساك
كنت أنا وياك صحرى مع مزون
لو عطشت القلب من دمعه رواك
وصرت أنا العطشان أطلب منك عون
ليش تحرمني في عزالضيم ماك
قلبك بكيفه يخون والا يصون
هذا عمرك وإنته أدرى بمستواك
بس شجاوب كل منهم يسألون
أحسن أسكت تدري الكذب يعداك
القهر إنك على قلبي تمون
لو طلبت إحساس قلبي قلت هاك
والقهر إني أحبك وبجنون
يا حسافه ضاعت أيامي معاك
ليش خيبت بمحبتنا الظنون
ليش ما بادلت من حبك هواك
ليش كنت تحلف بحبي ما تخون
وإني في عينك أنا أجمل ملاك
كنت أظن إنه العواذل يكذبون
كان قلبي وكل إحساسي فداك
ما هقيتك يوم يالغالي تخون
ليت كل الناس خانوني معاك

انتي اغلى شي عندي وانتي في عمري امل ..
. وانتي قلبي وانتي روحي وانتي كل الأمنيات

انتي الحاجه الوحيده الي منها ما امل ..
. بأختصار انتي بصفاتج جامعه كل الصفات

يوم اشوفك اشعر ان الهم من قلبي رحل
... واقعد اتأمل حلاتك يحفظ الله هالحلات

يا حلو منك السوالف يا حلو منك الغزل ..
. أشعر اني بين ايدينك بين موتي والحيات

والله يوم انك معايه انسى شي اسمه ملل ..
. في وجودك صارت الساعه مجرد ثانيات

ما احتمل بعدك عن عيوني ابد ما احتمل ..
. ما اقوى بعدك لو دقيقه يا بعد كل البنات

حبي لج يا اغلى ناسب والله انه م الازل ...
شقي صدري شوفي قلبي ناقش اسمج وب ثبات ..

حافره بعروق قلبي وثابتن مثل الجبل ...
من قديم الوقت والله وانتي اغلى الغاليات

اغلب الوقت وانت ساكت وانا يذبحني الفضول
ودي لو اني في بالك بين فكرك والخيال

كل ما ودي اسولف انتظر يمكن تقول
ومن كثر شوقي وحنيني طار من بالي السؤال

يا حبيبي حس فيني اكتسى وردي الذبول
غير حزني والمشاعر ما بقى عندي اي مجال

يعني كل هذا تغلي والا بس طبعك خجول
حرك بقلبي المشاعر وانفعل يابن الحلال

كل ما تقصر دروبك كل ما دربي يطول
وكل ما راحت همومك صارت همومي جبال

انت لو تعرض حلولك بقبل انصاف الحلول
لكن انت دوم ساكت وهذا هو أبسط مثال

----------------------------

اغلب الوقت وانت ساكت وانا يذبحني الفضول
ودي لو اني في بالك بين فكرك والخيال

كل ما ودي اسولف انتظر يمكن تقول
مدري سكوتك دلع ولا خجل ولا دلال

يا حبيبي حس فيني اكتسى وردي الذبول
كلما جيتك يميني يصد قلبك للشمال

يعني كل هذا تغلي ولا هو طبعك خجول
حرك بقلبي المشاعر وأنفعل يا أبن الحلال

لاتخليني في حيره بين اقول وما اقول
مد لي ايدك دخيلك بادر وصالي بوصال

أنته لو تعرض حلولك بقبل أنصاف الحلول
لكن أنته دوم ساكت تكفى بس عطني مجال

أحمد العياف وينك ما دريت
ضاقت الدنيا عليه في قطر

سافر الغالي وأنا وحدي بقيت
من بعد ما راح يا ثقل السفر

جيتك أشكي وأنا عمري ما شكيت
أخفي الضيقة ولو همي ظهر

ايه انا دورت مثله ما لقيت
ما أظن مثله بشر بين البشر

مثل طيبه لا حشى ما قد رأيت
مثل طبعه والله يا أحمد ندر

لو يسولف في سواليفه سليت
ويوم يسكت قلت يا رب الصبر

والله لو أهديه عمري ما وفيت
قالها الفنان خالد وبقهر

خبروه اني على وصله حييت
مهما أكتب ما يوفيه الشعر

عندكم بالمنتدى مشارك وليت
يوصله شعري ولو حتى شطر

نك نيمه لونه أخضر لو دريت
من شذاه يفوح نك نيمه عطر

إيه أحبه وأعترف إني هويت
وأعشق ترابه وأنا كلي فخر

من غلاته أحسب إني في الكويت
والبلا يا خوي أنا وحدي بقطر