لايغرك حجب دمعي عن ظهورة

لاتقول أني سليتك .. ماسليتك

دايم أستر دمع عيني ستر عورة

والا أنا ياما تضايقت وبكيتك

أوله يوم الغلا فأربع شهورة

واخره في يوم جيت ولا لقيتك

أعتبر مسياري لجارك.. ضرورة

لجل أوقف موتري قدام بيتك

وأنتظر لي ربع ساعة.. عند سورة

ماخبرت أن دخلته.. ما أحتريتك

وأنت تأخذني على عميا مشورة

مسرف بي لارحم حيك وميتك

تحسب أني ناسي حبك ودورة

لو نسيت أبوي وأمي مانسيتك

الله اللي حط لك في العين صورة

والله أن يمحا نظرها مامحيتك

تلمحك روض يقلدني زهورة

ناعم لو أنك بتوكل كليتك

موج حبك في الحشا صفقه وفورة

والظنون تسد نفسي لأشتهيتك

وش تعللها عليه من الخطورة

يامعللها على ليتك وليتك

واحد من طاري أسمك طق زورة

وش يقول أن سمع لبيك وفديتك

عذره بمخباة لو يفقد شعورة

وأنت عذرك لارماك الله رميتك

لاتهز الغصن وتطير طيورة

أتق الله وأحترم مجدك وصيتك

وأن حداك مساير النفس الغيورة

مرحبا من واحدك لكمبليتك

أرمني فالنار من عميا مشورة

وأسرف أسرف لارحم حيك وميتك

القصيدة بصوت الشاعر

للاستماع و التحميل

7
7
7

الغالي اللي يبي مني دموع اعتذار

ما قال لي عن دوافعها ولا اسبابها

ان كان وده بموتي مت ذاك النهار

والا دموع الرجال اغلى من ارقابها

غبن الهزيمه يروح بلذاة الانتصار

الا الهزيمه بذل احباب لحبابها

لاوقفت سكتك وسنين عمرك قطار

اول ماتبدا من الطعنات تبدا بها

الجاره اللي تعملها بحسن الجوار

لاشدو البدو واطنابك على اطنابها

وانا كذا لاسدلت نفسي على الستار

في وجه ليل يسوق الشمس لغيابها

اعدد اسماي لجل ان مرها الانكسار

يضيع فيها والاخطاها والاصابها

والاترا اسمي حقيقي و اسمي المستعار

مامنه ثاني بأسمي الناس والقابها

لو ان للقب غير الذكريات اختيار

اللي توقف به الخطوه على بابها

ماكان خلاني اعرف قيمة الانتظار

والخوف من قول وداها ولاجابها

اكبر على الحزن لايجرح وقار الوقار

واقرا تعابير من حولي ولا القابها

الا احتقار النفوس و ماصعب الاحتقار

من عين تنبت سهوم البغض باهدابها

ياليت ربي ليامد البشر بالعمار

مايعطي العاشقين اعمار تشقا بها

يخصهم على سواهم بالعمار القصار

مايمدي الحزن يمكنها وينتابها

القصيدة بصوت الشاعر
للاستماع و التحميل

7
7
7

ياقصيدي وانت حملك مثل حمل السلاح
من صناعات لفض النزاع مطوره

خلق وجهك من حجا ضلع واشراقة صباح
دم تجمد في وريده ودم تفوره

من خلالك لي على الكون منفذ وانفتاح
ارسم احلامي على واقعه واصوره

الحصون اللي عليها منصات الكفاح
انشد اكبرهم من اللي بناه وسوره

سقت ذودك للمفالي وقاد من المراح
واعترض في دربها نابحه ومخوره

النجاح يشيل جرحه من اعداء النجاح
والمثاليه تعاني من المتهوره

والفتاوي تختلف شي حرام وشي مباح
وشي لو تقنع به العقل مايتصوره

نستمع لله اكبر وحي للفلاح
المساجد عامره والقلوب منوره

وندري ان ماكل مذن بلال بن رباح
لو يقول الشمس حمره والارض مدوره

المهول لو خدعنا وخذنا بالصياح
واشتكى من رجله اللي مهيب تعوره

حيلة ما تمشى الا على الناس الصحاح
احبكتها عالم مهوله ومجوره

والطيور اللي تهاوى بمخلاب وجناح
لا تعشى صيدها واحد مادوره

مايحصل راحة البال واطلاق السراح
من تورطله بخمسة صكوك مزوره

فرد حمزه حسب تقرير دايرة السلاح
فيه واحد غير حمزه هو اللي ثوره

ياطير حزنك ماغير الصبح واليوم
وانا امس واليوم والصبح وقفيه

ياطير والله ماغير اطيح واقوم
طيحة خوي يدافع عن خويه

اجاهد النفس مثل الفرس والروم
فأشد واقسى الحروب العالميه

وادرى على خاطر غالي ومحشوم
من شرهته لايسندها عليه

والا ورا هالضلوع علوم وعلوم
لاحد مالانهايه سرمديه

ياطير ياللي صفقت الريش بالحوم
وانا برجلي طويت الجرهديه

انا من الظلم ميت وانت مظلوم
ارفع جناحك وانا برفع يديه

لله منادي بوجهه كل مظيوم
اللي يدير البسيطه والبريه

يزيد معطى ويكفل رزق محروم
والا تجي بالتساوي ذي وذيه

حظوظ تلبس بشوت وتنقل ختوم
وحظوظ ماتسرح الا في الرعيه

وين انت ياللي قدر فرقاك محتوم
ماشح بك غير الاوفاق الرديه

ياقسمتي والحياه احظوظ وقسوم
ياقمة الموهبه والشاعريه

يالوحة من سحاب ونار وغيوم
وإطارها وردتين ومزهريه

كني خوي السهر ومحارب النوم
من يوم ماصرت عني وانت ليه

بيني وبينك روابط حب وسلوم
شبت وشابت و وافتها المنيه

اخاف اجيها وانا مانيب معزوم
واجلس بليا فراش ومقدريه

اصبر واثابر واساوم وافرق السوم
وامدها من كفوفي حاتميه

والصبر محمود كن الصبر مذموم
لافقت من بعض الافكار الغبيه

ذكرت يامال فرقا العين .. ياقوم
اول هدية غلا واخر هديه

النظره اللي سهمها بأربع سهوم
ركبتها في ظلوعي لولبيه

غسلت وجهك من الشرهات واللوم
واقفيت حتى مارديت التحيه

القصيدة بصوت الشاعر

للاستماع و التحميل

7
7
7

انا غريب(ن) بعد رحت بلا وطن
سافرت عني والوطن سافر معك

واخطيت يوم اني تجاهلتك خطن
مايغفره قلبك نهار اودعك

سطيت وفراقك سطا واللي سطن
جرحينك اللي قطرن من مدمعك

يوم النعومه من حرير ومن قطن
تلبسك من سبابتك لا مفرعك

ماقلت ميدك ب(القصيميه) عطن
من كسرة السكر على راس اصبعك

وان غرك التلميح يالقلب الفطن
لديت عنك البال كني ماسمعك

ومكون الانسان من ظهر وبطن
انه تعلى بك تعالى ورفعك

لاعدن عيونك بصدري وقلطن
ماقلتلك من باقي ضلوعي دعك

وان جمعن عمري وعدن وغلطن
هن يعرفني كيف اجوعك واشبعك

مايعرفن اني غريب بلا وطن؟!!
سافرت عني والوطن سافر معك

القصيدة بصوت الشاعر

للاستماع و التحميل

7
7
7

فدوة عيونك يامحبوبي فديت عيونك
واحد لاقوم الدنيا ولاقعدها

خل سكينك تغلغل لين يكبر كونك
طعنتين .. وطعنتين .. وطعنتين .. و عدها!!

تل قلبي وأحطب ضلوعي وأنا ممنونك
خلها بيديك واحدها تلو واحدها

كل ماتليت واحد قلت لك ياعونك
كني أرفع معنوية ايديك واساعدها!!

لأجل مأرسم شامة التنكيد بين جفونك
اتظاهر لك بعافيتي !! وأنا ماجدها

إنس مرة قلت لك مالي دخل في شونك
وأعرف أني معترف فيها وأنا جاحدها

الغني الله مابي جرد السنين بدونك
لو تصير أغلى سنيني كلها وأسعدها

لا تخاف .. القلب قلبك .. والطعون طعونك
والحنايا رهن رمح منك ياسيدها

أجرح .. أذبح .. سو ماودك ترى مجنونك
مايواعد طعنه الا جات في موعدها

تحرسك عيني عسى الله يحرسك ويصونك
يوم طيف من جفاك وغربتك عاودها

ما أستعيد الذاكره لين أتهجى لونك
كني أدور بوجهك حاجة فاقدها؟!!

وأن نزل شوفي على تفاحك وليمونك
مالي الا عظة شفاهي تحت ناجدها

وأن جذبت من اللحون اللي سواة لحونك
ودع الله ليلتك !! وأسهر ولا ترقدها

أنت ملهمني وأنا في الشعر ابن لعبونك
لاطلب منك الشهادة زور .. لاتشهدها

والله أن أهز خصرك قبل أهز شجونك
لا أنحنت روس القصايد .. وألتوى ساعدها

عادتي ماني بخونك .. وأن بغيت أخونك
قلت ميد الفاتنه لامن عطتني يدها

كن فن الشعر مستوحى من أصل فنونك
والفراهيدي بحور الشعر منك أوجدها

إنسي أسمك .. وأنسي أية عالم يعنونك
والبسي ثوب القصيده وأقعدي مقعدها

فدوة عيونك يارعبوبه .. فديت عيونك
شاعر لاقوم الدنيا ولاقعدها

القصيدة بصوت الشاعر

للاستماع و التحميل

7
7
7

يالله أنا نعبدك وأنت رب العالمين
كاشف غراتها عالم بأسرارها

وحدوك عبادك الخايفين الخاضعين
مملين في رجا جنتك عن نارها

صابرين وصبرهم يامعين الصابرين
مايضيع ورحمتك ماسدلت استارها

ضلت الناس الهدايه وحنا المهتدين
روسنا مايدخل الشك بين أفكارها

المواقف تختلف بين حين وبين حين
والاوادم في مقاماتها وأنظارها

في كبيرات المواقف كبار وحاظرين
وفي صغيرات المواقف تقوم صغارها

لاوقفنا في الكبيره ملينا كل عين
يوم مايغني عن غيابها حظارها

ياطويل العمر جيتك وأنا عذري سمين
وأنت من يقبل من الطيبين أعذارها

العذر يغسل ويمحى ذنوب المذنبين
والسما تغسل ذنوب الثرا بأمطارها

صار لي ماصار لي وأول المتسببين
الليال السود وظروفها وأقدارها

جملتني مره وفشلتني مرتين
وألبستني تهمة ماقدرت إنكارها

حط في هذيك طينه وفي هذي عجين
دون إذاعة ( منتوكارلو ) ودون أخبارها

بايعين الذمه منافقين مجاملين
و بيديهم ردوا الشمس عن مظهارها

مير ياليت المقادير وظروف السنين
ناس لجل أدعي عليها بقصر أعمارها

وأدعي الله يحفظك ياطويل العمر لين
الجبال اتصادم أحجارها بأحجارها

لنك أول جامعه عالميه للبنين
كل مايعلو بالإنسان بين أسوارها

مستمد من حياة الرعيل الأولين
طيب سيرتها وتاريخها وأذكارها

فيك من عبدالعزيز الذرا الصلب المتين
إستماتة نفسه وسعيها وإصرارها

للدرجات الرفيعه بعزم مايلين
أستوت عنده سهالاتها وأخطارها

ياعوين اللي ماخلت له الدنيا عوين
تشخص عيونه على المقبلات أبصارها

ماطرا لي لاتذكرتك إلا حاجتين
للظهور إحزامها والحلوق زرارها

وحلمك ومدات جودك نهر من ضفتين
وشجرة الزيتون بظلالها وأثمارها

تدري أني يوم أحطك على المتن اليمين
مايقلط في الرياجيل كود خيارها

شاعر ماغاب صوته وهو بينك وبين
السعوديه وراياتها و إشعارها

لا اعتلى في منبر الشعر بين المنصتين
عودت بعض القصايد على شعارها

والسلام وريحة المسك والعذر السمين
وأنت من يقبل من الطيبين أعذارها

يالله ذراك وحجاك وسترك الضافي
من معظلات السنين اللى تصادفني

العمر راح اكثره والصاحب الوافي
هبت رياحه بما لا تشتهي سفني

اللى لعينه مالدت عيني خلافي
قدام قدام لو راسي يخالفني

اوفى له من الوفا واصفى من الصافي
اقرب مايليه في عمري مناصفني

شهرة قصيدي لاخليت منه تنعافي
حتى لو الليل والبيدا تعرفني

الله يجبر عزا سنافي على سنافي
عزالله انه قصى حالي وكلفني

كانه رفيقي ولايدري عن الخافي
لو كان بعيونه الثنتين شايفني

على ذكر الوليف اللي جفاني
جزاه الله مثل اللي جزاني

الأسم اللي من الأسماء ذكرته
وماتت باقي الأسماء في لساني

حفظته عن ظهر قلب وبنيته
بضاهي به طويلات المباني

وإثر من عاش بأوهام الحبايب
يودي عشر ويرجع ثماني

أكذب ناس قالوا لاتمنى
ترى موت الأماني بالأماني

طعني بالفراق وصد عني
تركني علني وإلا عساني

وانا اللي من جنوبي لاشمالي
لعينه كلي إخلاص وتفاني

عطيته درس في فن التعامل
خلاصة علم الأحياء والبياني

وعلمته كذا حاجه وحاجه
يارب لم أراك إنك تراني

تبنيته ونبهته لدينه
وعلمته وش السبع المثاني

نقلته من مراحل لمراحل
حسب مايقتضي ظرف الزماني

وعلمته مبادئ الأبجديه
وعلمته تفاسير المعاني

وهو غير القراءه والكتابه
لنطق إسمه يبي له ترجماني

وأنا لم أسلبه مثقال ذره
ولم أجتاز حدي وإيتماني

ويوم أنه تبواء له مكانه
لابو جده عطاني.. وش عطاني؟

جحد وأنكر وخان الله يخونه
تناسى عشرة العمر ونساني

وذكرني كلام مانسيته
قريته في كتابي الأصفهاني

أعلمه الرماية كل يوم
فلما أشتد ساعده رماني

لقينا للتخلف في الوجيه البيض حبة خال
خسارة يالقلم والحبر والدفتر والاستادي

مابه شي تغير لا يزالون العيال عيال
نلبسهم مقال "سمول" ولا حجم ولادي

الا يالله دخيلك قفلت روس البشر باقفال
ولا به مدخل يوجد لها من جاي من غادي

لبو الغترة لبو الموتر لبو البيجر لبو الجوال
لبو التعليم والتدريس والتلفاز والرادي

ما فادتكم بشي ولا اثرت فيكم ولا مثقال
كما كنتم سوالفكم نفاق وشرك والحادي

وهل القرشين وريالين يعني إنا رجال اعمال!!
فقارى كلهم ما ياجدون الملح والزادي

كذب من بشر بمستقبل زاهر صدق من قال:
نصب العلم فقلوب العرب وتحدر الوادي

تريح يا مشجع لك فريق ما يجيب اقوال
هذا ماهو بذنبك ذنب من دخلهم النادي

لا تدعو للتطور والجهل تسعى به الجهال
ترى الممتاز في علم الجهل يضحك به العادي

هل النمة من القطب الجنوبي لا "قصير بلال"
عليهم من سخط ربي سواة الحبل منقادي

عساهم في ذهاب وفي انقراض وفي تردي حال
وشهر يالله بغراتهم في روس الاشهادي

اخذهم يا عزيز مقتدر يا عالي المنزال
على نار هواها صلف مجموعات وافرادي

وكبلهم باكاليل من الفولاذ والاغلال
عراة ما لهم بالمغفرة شفاع ومنادي

يحز النفس ما شفته من التقصير والاهمال
ولا يعبد وجيه الناس من لله عبادي

وانا شاعر واغير في السلوك اللي مهوب اجلال
ويرضى اللي على الدرب الصحيح ويزعل الغادي

اكافح بالعلاج امراض عصر اليوم لا تغتال
شراييني وياقف دمها عن مشة فوادي

ولا اسلم زمام الامر للدنيا على اية حال
مواطن لازم اسعى بالوفا والخير لبلادي