لا ما تذكرتك ولا يمكن اذكرك

انا الى مني نسيتك نسيتك

لو كنت احبك بخسر الحب واخسرك

هويت هجرانك كثر ما هويتك

ياليل عمري راح عمري وانا اسمرك

حتى بهروبي من سوادك سريتك

مشاعري نسمة ربيع تعطرك

وتفرش دروبك بالندم لا جفيتك

لا تنتظر مني على حزني اشكرك

يا عبرة عيوني قنعت وبكيتك

ابذكرك لا من نسيتك وابعذرك

وابذكر اني بعد ماذكر نسيتك

ابد والله سمعت بطاري عيونك وجيت اغليك

يقول القلب سلملي عليه ويطلب وصالك

حبيبي وش تقول بعاشق قصة غرامه فيك

نسا الدنيا ومن فيها وجا ينشد عن احوالك

حبيبي جيت لمصافح مواعيد الفرح بيديك

وجيت اعطي يمينك حب ماتدريبه شمالك

اشوفك واسمعك قبل اعرفك واشتاقلك وابيك

واحس امال عمري من عرفتك تشبه امالك

انا ماعشت قبل اعيش بإحساسك وقبل اجيك

حبيبي جيتك بقلبي ولو ماجيت لك جالك

احاسيسي كريمه وانت تستاهل كرم غاليك

ترى لوماشرقت شمسك وصل رحت اتبع ظلالك

يقولون العرب دار بلا مغليك ماتغريك

واقول انك بليا حب كنك عايش لحالك

انا لاجيت اسولف عن شعوري قمت اسولف فيك

وانا ادري رغم كل الشوق ما مريت في بالك

دريت ان الغلا مثل القدر يرضيك لويبكيك

ولاينفعك بعلوم الغلا عمك ولاخالك

ما بين الحلم والواقع يصيبك حظي ويخطيك

متى تصبح نصيب اللي وقف باماله اقبالك

ولاتزعل من اللي لازعل منك رجع يرضيك

ولا تطري كلام البعد فال الله ولا فالك

انا لوماتذكرتك غلا جاب الغلا طاريك

تعيش وتسلم لقلب على كف الغلا شالك

اطالع وجهك المشرق امل وعيوني تناديك

واقول الله ثم الله لا يحرمني وصالك

مادام مابه شي يربطك فيني

تلقين من يشغل فراغك بدالي

يومين تجفيني ويوم تبيني

ياهونها عندك جفاي ووصالي

أجاملك على الأقل جامليني

أما اسألي في غيبتك أو تعالي

لاتذكرين الوصل بس اذكريني

اقسي ولكن اسألي كيف حالي

ليه احسب سنين الجفا من سنيني

مادام ماكل الليالي ليالي

اغليك وانتي بالغلا تجرحيني

المشكله مايجرحك غيرغالي

اسف على ماصار بينك وبيني

وان قلت احبك قولي اني خيالي

رمشي جرح قلبي قبل جرح عيني

هذا معك حبيبتي ماجرالي

لاحلم لاحنين يربطك فيني

بالله قولي لي معك وش بقالي

انا ما اعيش معك الحب اعيش الحب كله فيك

انا وان كنت عنك بعيد لكن معك واحيابك

تعيش بكل احاسيسي وتفكيري واعيش اغليك

تحسد الحب لو تسمع حديث الروح بغيابك

تزاحم في الخفوق قلوب يسري نبضها بيديك

انا كيف اختصر فيك الشعور بحضرة احبابك

سكنت ارض الغياب وكل سيره للوفا ترويك

عيونك موطن وغربة عيونك موطن اغرابك

احبك لو تسافربي على درب التعب وامشيك

حبيبي في زمان البعد قلبي اصدق اصحابك

احبك جرح ما يبرى عسى بعض الألم يرضيك

ولون بالرضى عيني وسيل دمعة عتابك

حبيبي في ظلام الشوق كل النور ما يضويك

انا صفحاتك البيضا وانا اصدق حرف بكتابك

فرشت العمر لأيامك اسابق ليلتي واجيك

وعرفت ان الغلا خطوه وانا واقف على بابك

جفون الغيم لو تمطر دريت ان الثرى ضاميك

ودريت اني بلا موعد زرعت الحلم باهدابك

خالي مشاعر لو تعاملت بشعور

الصدق يبحث داخلك عن حقيقه

تشري فرح لحظه ولو تندم دهور

همك تكون سعيد بأية طريقه

عديم شوف وتنتظر طلعة النور

حملت نفسك فوق ما لا تطيقه

خلك حزين الدمع ودموعك سرور

رفيق دربك تجرحه بالدقيقه

راحت حياتك بين هاجر ومهجور

غديت مثل اللي عدوه صديقه

يصرخ جمالك من فعايلك مقهور

رسمة خطا تحمل معاني رقيقه

للعذر حد وبعدها ما انت معذور

بعدين ما تنفعك دمعه وضيقه

غرورك وللا نظرتك نظرة غرور

يحزني انك ما عرفت الحقيقه

هلي جديلك واكسي الصبح بالليل

اسود عيون الليل والا عيونك

صوتك قصيدة حب صوتك مواويل

اذوب بين انغام حسنك ولونك

تعطري بالود يا نفحة الهيل

واستقبلي حلم يداعب سكونك

حبيبتي والوصل عرس القناديل

الله يخون اللي يفكر يخونك

لا تحملين هموم ما يعشق بخيل

قلب يصون الحب لازم يصونك

على دروب الشوق يا مهرة الخيل

جيت اعشقك بجنون واعشق جنونك

عذبت سمعك بصوت الحب يا منادي

يا للحزن كيف دمعك يبكي عيونه

وعكرت صفو القلوب وجوها هادي

ذكرتها بالحنان وعشت من دونه

مشتاق شوق المطر لمعانق الوادي

ومحتاج حاجة غريب الروح لشجونه

أسير الإحساس مثل البلبل الشادي

غرد حزن والملا طربان للحونه

ميلاد صوتك يصادف يوم ميلادي

يا شاعر الحزن خذت الليل من لونه

الحب صوتك يزف الريح للكادي

يرقص على نفحته ويعانق غصونه

الحب دربك وحزنك شكل ابعادي

الحب منطق وقمة عقله جنونه

قلب يعيش الغلا لا يمكن يعادي

لو يصبح الموت عشقه حاول يصونه

ومن عاش عمره وفا ظن الوفا عادي

لو حس بالحب مره حرم يخونه

اسمع صدى صوت قلبك للهوى ينادي

ينطق لك الصمت ويلبي لك سكونه

يا صباح النور يا نور الصباح

قال قلبي قبل عيني لك هلا

ياحبيب الروح ياسيد الملاح

مرحبا بك يا بعد كل الملا

يوم برقك في سما الامال لاح

نلتقي والصدر بالحب امتلى

لو شربت من البحر يصبح قراح

انت يامخلوق من ملح وحلا

من تعثر في نظر عينك وطاح

لويشوفك حلم ما عنك سلى

ياحبيبي والفرح لارحت راح

انت رغبة خاطري والافلا

المحبه يا بعد قلبي سماح

والرضى لك والمشاعر والولى

الوصل لوطالت ايامه شحاح

وكل عاشق لو تبسم مبتلى

ياحبيبي ماتدوم الا الجراح

وانت حتى جرحك افراح وغلى

شي طبيعي نختلف ونتفارق

اللي غريب إنا بيوم اجتمعنا

أغراب لو ذابت جميع الفوارق

يا للأسف ورى الشعور اندفعنا

تطيح شمس وغصن الأيام وارق

وتموت كلمة شوق وتعيش معنى

ما لاح بعيوني للامال بارق

نتبع سراب ضاع منا وضعنا

البعد راحتنا لو البعد حارق

بعد المواصل بالجراح اقتنعنا

ما تسعف الغرقان صيحات غارق

عاجز وعاجز كيف بس اجتمعنا

عندي شعور اني اعرفك من سنين

ما انتي على قلبي وعيني غريبه

بعيونك الحلوه تضيع العناوين

لا تسأليني كيف شفتك قريبه

شفت الفرح يابنت في حلم قلبين

وبعيون قلبي شفتك اجمل حبيبه

في ليل شعرك ليل ماشافته عين

كنه يحذر عاشقه من نصيبه

وش ينقصك والزين خلالك الزين

يا للي جمعتي بين رقه وهيبه

القلب صار قلوب وانتي محبين

غلاك ضاقت به صدور رحيبه

الوصل وصلك والجفا يوم تجفين

لقيت فيك الشوق قبل التقي به