الهوا سكة متاهات .. وادروبه عذاب
عايق ٍ لايحيي العاشق .. ولا يذبحه

والهوا .. حس .. وشعور .. وموده .. وانتساب
يمنحه ربي.. ولاغيره احدٍ يمنحه

صاحبه يمشي مع الناس في مثل الظباب
في ضميره حكي .. لكن مايقدر يشرحه

وصاحبه يشيب ..لو كان في عزّ الشباب
المفارق يحزنه ... والمواصل يفرحه

ان ضحك عنده خليله ضحك .. وان زاد ذاب
يعتبر نفسه ربح .. بس مدري شمربحه

ياهنوفٍ صابت القلب باسهوم الغياب
مابقا لي غير ذكرى الغرام المنزحه

دام حجزش للحنايا .. ذهاب بلا إياب
ارقدي يوم الحشا لش .. فراش .. ومطرحه

واقربي واستطّش القلب .. لبّى الاقتراب
دام شرع الواسطه فوق شرع المصلحه

وارحمي من صابه البعد .. وارداه الصواب
كل مايخفي همومه .. عيونه تفضحه

شاعر ٍ يسبح خياله على متن السحاب
كل سهم ٍ من سهوم الغلا ازرا .. يطرحه

كنّ ليلي ليل طرق ٍ خلا منه الزهاب
قوم بقعا حدّته .. والنعايم تلفحه

كل مامسي وادفن الهم في .. جوف التراب
ماوعيت .. الا وهي في عيوني ممرحه

عاقبتني جعل مانيب عرضه للعقاب
كل جرح ٍ من سببها .. ترد وتجرحه

الخطا مني خطا .. والخطا منها صواب
والبلا حتى الزلل .. والسهو .. ماتدمحه

صرت أهاب مواجهتها .. وانا ماكنت أهاب
لعنبو جد الغلا .. ماحلاه .. وماقبحه..!!

ان نوتني .. ضيّعتني .. على اضفاف العتاب
مثل ماتضيع المروفه .. بوجه المذبحه

وان بغتني حاصرتني .. بما لذ وطاب
واجمعتني .. مثل جمع الخرز في المسبحه

اتعجب .. كيف تقدر .؟ .. ولله العجاب
البحر ماكل من خاض موجه يسبحه

والله ان مانيب من نسل مروين الحراب
الرجال .. اللي لاجاها الخطا ماتصفحه

كان ماخليتها ..مثل ظام ٍ في سراب
لين اذوّقها من الحب .. أمرّه واملحه

ولين تعرف صدق .. بأن الهوى .. سكة عذاب
وان ماهو يحيي العاشق .. إلا .. يذبحه

وسلامتكم

منقوله



تحياتي



اختكم \ الماسه كويتيه