أميرة شوق .. يا سيدي .. و شوقي بان من بدري
وانا من يومي .. يا هذا ..أسير كل من حولي

إذا اغتريت في حالي .. لي اسبابي .. و لي عذري
بعمري ما قصدت الغير .. و لا عزيت مهبولي

يجيني قاصدين الخير .. بعض من حرفي وعطري
و أنا بنت الكرام اللي .. أفز لناس .. من طولي

كبر نفسي على نفسي .. و قدر الغير من قدري
و لا فيني قساوة قلب .. و لا لي طبع معلولي

صحيح إن الفخر فيني صفة وإحساس من صغري
وإذا زاد الحكي والهرج لساني سيف مسلولي

و لكن هذا ما ينفي .. عفافي .. طيبتي .. وطهري
و لا يلمس حلا ذاتي بكلمة جارحة و قولي

أنا ياللي تبي تفهم .. سبب إصراري .. و كبري
أنا بنت البلاد اللي .. كساها الدان و اللولي

جرى هالبحر في دمي .. مثل ما الدم بي يسري
صعب ينساق تفكيري .. لكلمة حب معسولي

و لا تنفع معي حيلة .. اذا ما النار .. في صدري
و بركان الوله طاغي على قلبي و مغلولي

و تفدا ضحكتي الدنيا .. و نهر الود لي .. حصري
كما غصن اللبان يميل و زهر الحب مبلولي

أميرة شوق .. يا سيدي .. و شوقي بان من بدري
وانا من يومي .. يا هذا ..أسير كل من حولي

إذا اغتريت في حالي .. لي اسبابي .. و لي عذري
بعمري ما قصدت الغير .. و لا عزيت مهبولي