لحتجتني حصلتني في دقيقه
وأنا ليا مني بغيتك تلعوزت

أدور الحجه واشوف الطريقه
واليا تعبت إبحجتي عنك ماجزت

حملتني أكثر من اللي أطيقه
وايست من (درب المحبه) وغرزت

أول علاقتنا علاقه وثيقه
والحين من فرقاك ماعاد ركزت

روحي وروحك بالموده شقيقه
أنت الوحيد اللي بفؤادي تمركزت

لو راح كلن منشغل في طريقه
تبقا معي غالي وفي خافقي فزت

وإن شفتها شبت بنفسي حريقه
بصبر ولثقال المواضيع ميزت

ماتدري إني بالمحبه رقيقه ؟
وماتدري إني بالبساطه تميزت ؟

وهذي الحقيقه ماتشوف الحقيقه؟
أموت وأحيا وأنت ما قد تنرفزت

وأصحى بضيقه واخر الليل ضيقه
وإعرف تراني من غرامك تلعوزت

اتصدق احيان اخافك حيل واهابك
واحيان أقول السلامه منك مضمونه

واحيان(ن) اتعب ليامن طول اغيابك
واحيان قربك يزيد الهم وطعونه

واحيان اصدق كلام(ن) قيل يحكابك
واحيان اغض النظر واقول: لعيونه

واحيان اقول اه ليت الحظ ماجابك
واحيان اقول إيييه ذقت الحب وفنونه

واحيان الاحظ كلامك زين واعجابك
واحيان مدري كلامك ويش مضمونه!

(حاله غريبه) .. اعيش الحب واحيابك
درست نوع الهوى حكمه و قانونه

جمعت فيه المشاعر وانقفل بابك
وأرسلت لك قلبي اللي باح مكنونه

صبرت ياصاحبي يامكثر اعتابك
ياليت حظ العرب بالسوق يشرونه

مليت اراجع واعاتب صفحة اكتابك
حتى عيوني بكت له يوم يقرونه

ومليت اهدي واراعي ثورة اعصابك
وأخاف ل سأل واقول (فلان) وشلونه؟

واخاف لأهل الحسد بالهرج تغتابك
الوقت قاسي وبعض الناس ملعونه

كافي طلبتك رجاءا واحسب احسابك
مافيه داعي اعيش العمر مغبونه

انا على كلمتي تممت ميثاقي
ولا انت ماتعرف الحب ومواثيقه ..

والله لو كان في صدرك غلا باقي
ماكان حطمت قلبي في معاليقه ..

ياما مشيت الدروب وماتعب ساقي
وياما خفوقي خذا بالشوق تحليقه ..

وياما مشيت وسعيت بدربك الشاقي
صبرت والحب من ربي توافيقه ..

وياما عطيتك وفا من داخل اعماقي
وحققت لك شي ياما صعب تحقيقه ..

وياما كتبتك قصيد بشعري الراقي
والناس قامت تغنى في طواريقه ..

وإن جيتك اقول عطني باقي اوراقي
اعرف ترى الوضع هذا اليوم ماطيقه ..

ذوق الهجر لأجل تعرف طيبة أخلاقي
واصبر على الصد حتى تعرف الضيقه ..

وانا بصارع حشاي وبقتل اشواقي
لو كان قلبي من اشواقه يبس ريقه ..