اعوذ بالله من عيون الحاقدين الناضلين
والله يكافينا عيون الي بنظراته حسد

الله يرزقنا على النيه وحنا طيبين
مادام بين قلوبنا ميثاق والكلمه وعد

تقول أباسافر وابرجع لج على يوم الثنيين
تغيب يوم السبت واشتاق لك في يوم الاحد

*********************
الغيره الي تذبح القلب بشويش
تمكنت من خافقي وذبحتني

حاولت ألد القلب عنها وحتيش
قاومتها يومين .. واليوم جتني

لونك لهيت ورحت ماقلت لك ليش
لكن أخاف عيونك الي نستني

*********************
أجيك طفشانه واعود على ماش
ماكن قبل اجيك كنت اتهدد ..

ياما ذبحني الشوق واتعبني الجاش
ياكثر ماراعيك وانت اتصدد ..

إما (تجي) أو(روح) وأخذ الخبر كاش
هذي حلولي وانت كيفك وحدد ..

*********************
الحب مدري هو قوي؟! .. ولا أنا قلبي ضعيف!؟
بس الوكاد ان الهوى أصبح على قلبي قوي ..

إن رحت عني صارت اعيوني كما اعيون الكفيف
وان جيتني قلت اه ليتي من سوالفك ارتوي ..

*********************
الله يسامحك عشر ايام ماشفتك
ماقلت لي واحد غالي وخليته

ارسل لي الرد قلي ويش سالفتك
باب الوصل ياحبيبي ليه سديته

*********************
إن ضقت عيني من الفرقا تحارب لذت النوم
اسهر اسامر نجوم الليل واهل العباري

الضيقه اللي سكنت في داخلي قبل امس واليوم
خلتني اعيش بالذكرى ودمع العين جاري

*********

امشي بوسط القاهره وقلبي تركته بالكويت
كني على جمر الغضى من يوم جيت القاهره

هذي ثلاث ايام من عقب المفارق ماقويت
احس في نفسي تضايقني وعيني ساهره

ان كنت ياعمري نسيت انا تراني مانسيت
لازلت احبك ياحبيبي والمحبه طاهره

*********************
خلاص لاعاد تنشدني عن اخباري
كل المخبى وضح وانكشفت اسراره ..

ماضاق صدري ولا قللت مقداري
لازلت مستانسه واضحك وعياره ..

*********************
طبعك مزاجي وانا طبعي مزاجيه
لاتحسبنك مزاجي أنت بلحالك

احداث حبي معاك احداث (صجيه)
اسهر واعاني واعيش بليلي الحالك

*********************
الحريم الله بلاهن بالمقر الانتخابي
كل وحده مننا في بيتها جتها عزيمه !!

قلت برووح اتفرج عندهن واخذ كتابي
في مقرات المرشح مالقيت الا حريمه ..

قالت أمه بطلبج من قبل لا افصخ نقابي
نطلبج صوتج وحنا خابرين انج كريمه ..

انحرج لو قلت مقدر وأفتضح لو قلت مابي
مالي إلا اقول تم ووطلبتج قدر وحشيمه.

*********************
ياحبيبي ذبحك الشك والغيره
ليت حساد خلق الله تخلينا ..

ماني اب جاهل وماعادني صغيره
شفت من دنيتي هم يكفينا ..

خل كل على نهجه وتفكيره
الحقيقه تموتنا وتحيينا ..

ماهمني في حياتي اكسب الشهره
انا لي امال معروفه مباديها


وصلت درب الأمل والناس منبهره
ورضيت في حاضر الدنيا وماضيها


أنا حياتي بعد فرقاك منقهره
الله يسامح خطا نفسك ويهديها


يوم المشاعر علي طرياك مزدهره
تركت نفسي تصارع مع هقاويها


خليت روحي من الأشواق مدهره
ماقلت لي هالاماني كيف اخليها


العام انا كنت بين المجتمع زهره
والحين بنت و عنا الدنيا مكفيها

المشكله حفظت حبك بين قلبي والضلوع
وايقنت بان الحب لايمكن يجي فيه اخشرى

لو كنت تنشد عن غلا حبك تجاوبك الدموع
تشهد عيونن فوق خدينن بها دمعن جرى

ولو غبت عني يوم او يومين او حتى اسبوع
اموت واحيا بين خلق الله ولا شخصن درى

واسأل واقول الله ياعمري متى يوم الرجوع
واليا تطمنت برجوعك زان ليلي والكرى

تعال نسهر في ظلام الليل مع ضي الشموع
تعال داو الجرح دام الجرح توه مابرى

تعال نجلس بأول السهره الى وقت الطلوع
يوم ان كلن مع ظلام الليل باشواقه سرى

تطري على بالي واقول البعد عن وصلك يلوع
تطري على بالي ولا غيرك على بالي طرى

ان غبت في يوم الثلاثا ضقت في يوم الربوع
اسأل نجوم الليل وينه عن عيوني ياترى

من زود شوقي والغلا ياصاحبي اضما واجوع
من غيبتك شفت التعب وبشوفتك شفت الذرى

باب المحبه دخلته من سبايب غلاك
والحين ياليتني عديته وما دخلت


تغيب عني شهر وانا اتحرى نداك
ولا انت ماشي بدربك مارجعت وسألت


لا تحسبن قلبي الطيب كرهك ونساك
لاشك انا في غرامك ماقدرت و فشلت


احيان افكر وش الي صابني من هواك
واحيان من كثرت التفكير دخت وقفلت


العام انا وانت والاحساس كله معاك
واليوم لا والله الا ياغلاي إنظلت
لهيت عني معا هذا وهذا وذاك
وانا من اسباب صدك للمصيبه وصلت

ياشاعرات الصحافه والمكاييج
دمرتوا الشعر واحساسي يصيحه

غمازه ولبس وعيون مداعيج
ماتتركون الصحافه مستريحه

ياحبكن للأضائه وال لجاليج
اسلوب فنان بإشعال القديحه

وسياره اسبور .. والجوال (إن قيج)
واتدورون الجرايد والمديحه

هذي على قرمزي وهذي على بيج
وقلوبكن سود ووجيهن قبيحه

الوضع ماعاد يسمح زود تهريج
خذو النصيحه من الناس الصريحه

اليا تذمرت زاد الوضع تأجيج
نعالج الجرح ونغط الفضيحه

للشعر هيبه وبحروفه مخاريج
احساس مرهف ليا ثار القريحه

وانا ليا ضقت سجيت السواهيج
مشيت حسب المبادي والنصيحه

ضاقت علي المعاني والمناهيج
والهم يالله عن قلبي تزيحه

ولاصار في شكوتي لله تفريج
يالله تجبر عزى الشعر وتبيحه

خل المعاتب لا تعاتبني وان
متحطمه الظلم مايرضاه احد والطعن بالميت حرام

ضاعت مواثيق الغلا بعد الجروح المؤلمه
تحطم الحب الحقيقي من سواليف الغرام

وانهيت قصه من كتاب الحب والدمع اختمه
واراجع الدرس الشقي .. واعانق اسلوب الهيام

وادرجت في سوق الغلا سهمي وضيعت اسهمه
سقت المشاعر من رصيدي وانتهى حلو الكلام

الله يبيح الحب يوم الوقت خانه واعدمه
والله يسامح من نثر دمعي وخلاني حطام

ياهمي الي بالحشا مبطي ومليت اكتمه
اسهر معه في ليلي وعين المحبه ماتنام

لي حلم طول الوقت مللني وعييت افهمه
دارت دواليب الزمن واقفى وخلابي وشام

اشكي على نفسي وفي نفسي بليله مظلمه
واجاوبه بالدمع والمعنى مفاتيح الخصام

ياصاحبي لابد قلبك في حياتك تلزمه
اما يبين بالغلا ولا على الدنيا السلام

هذا قراري واتخذته وانت شوفه واحسمه
ليتك تجي حسب النظام ولا تجي عكس النظام

لاتشتكي لي يوم صدري فاض وانتك انسمه
وانا مع جروح الزمن خذلت معنى الانهزام

الي تركني بتركه .. والي حشمني بحشمه
والي يعاملني بطيب القلب يبشر بإحترام

لكن من يقسى لزوم اني اجي واعلمه
واكتب من جروحي قصايد وانثر المعنى وسام

والقلب لو ما ينجرح ماينزف الشعر اقلمه
والشعر لو مانبدعه مايرتقي لأعلى مقام

ياليتني ماعرفت الحب (يادانه)
حقيقة الحب ظالم والزمن قاسي

سافرت للقاهره مانيب فرحانه
لاشك احاول ازيح الضيق وعماسي

طفشانه وضايقه حدي وتعبانه
والشوق يمشي معي من راسي ال ساسي

ان كان يحسب ليا سافرت شفقانه
لا والله الا فراقه ضيق انفاسي

اليوم ثالث وانا لازلت عمسانه
واحاول ابدع شعوري وأكتب احساسي

اليا سمعت الغنا مانيب طربانه
عساه ماهوب عني داله وناسي

غلاه في ضامري ومسيس اركانه
قلبي من اشواق حبه طاح متواسي

ولع فؤادي وضعت بغابة اوطانه
حسيت بني قويه وانكسر فاسي

ان كان بالتضحيه .. ضحيت من شانه
وأطب بالنيل لجل الحب رواسي

وان كانها بالوفا مانيب خوانه
وإن كنت اجامل بحبه فدوته راسي

اليوم ليه ثلاث ايام ولهانه
فرقاه تذبح فؤادي والزمن قاسي

لاتقول ان الدلع للبنت قيمه
وش يفيد ان كنت باسلوبي خجوله

التهنوص والدلع موضه قديمه
أي بنت اليوم تتقنه بسهوله

البنات اشكال والدنيا سقيمه
فدعه وشينه ومزيونه وهوله

في الطبيعه ماهي ابنت وسيمه
زينها معدوم من يوم الطفوله

اسمها شيمه وغيرته ل ريمه
ماعليها من الكلام الي نقوله

ودها تطلع مثل طلعة حليمه
لو تلف الكون ماتقدر تطوله

ولا انا مانيب بالدنيا حكيمه
لو مشيت الحب في عرضه وطوله

نوض برق ساطع في وسط ديمه
بنت بدو رابيه بين الحموله

لو تكلمت وكتبت بكل غيمه
بشر الدنيا عن الغيث وهطوله

يامعيشني مع الحب وجحيمه
يامخليني مع الشوق واصوله

دون شوفك عشت بالدنيا اليمه
انت حبك باني بالقلب دوله

من غرامك كل وادي قمت اهيمه
واتكلم مع هوى الشوق ورسوله

وأتكلم في مواضيع عظيمه
وانت خلك في مواضيع الرجوله

كل ما مريت من ذاك الطريق
كن قلبي قال للضيقه : هلا

وأتذكر واتهيض واستضيق
واخفي العبرات عن كل الملا

يازمن ماعاد بالدنيا صديق
ويا هوى ماعاد بالدنيا غلا

كيف ينساني وانا اغشى وافيق
من غرامي كيف ماعنده ولا

ولعي يانار في قلبي حريق
لوأموت القلب عنه ماسلا

ايه له هيبه وله منسب عريق
ايه له قلبي وعن غيره فلا

قلبي اللي من سبب هجره غريق
في بحر حبه تعذب وابتلا

لويصير الوقت في عينه بريق
دنيتي عقبه ولا فيها حلا

ليه لا مريت من ذاك الطريق؟!؟
كن قلبي قال للضيقه : هلا ؟!؟

لاصرت كذاب مالي بالغلا حاجه
لاشك هذا سبب ماسببه فعلك ..

الحب ضيعت مدخاله ومخراجه
وزليت في حقي ومليت ارقع لك ..

صكيت قلبي بمفتاحه ومزلاجه
لاتفكر اني بعد هاليوم برجع لك ..

صحيت من عالم العشاق وازعاجه
وريحت عقلي من التفكير في زعلك ..

وقطعت حبل الوصل لو أنت محتاجه
وان شفت حالك ذبل ماجيتك.أفزع لك ..

يمكن يجي يوم بالشارع ونتواج
(انسان عادي) من الشارع (اوسع لك) ..

خلاص ماعاد لك عندي ولا حاجه
خذها (قرنتي) وبالتوقيع اوقع لك ..