الشوق قمة جنون العاشق المبتلي
وانا من الشوق في حبك فدائيه

في شوفتك غايتي .. وبغيبتك مقتلي
ياصادق الحب .. يا نبع الرومانسيه

الود .. والحب في وسط الحشا ممتلي
وكل المشاعر لجل حبك حقيقيه

أموت من نضرتك .. وأعيش لا قلت لي :
تفدا مواطيك الاسماء النسائيه

في خافقي معتلي .. وبهيبتك معتلي
وانا من الحب ياعمري شقاويه

البارحه ياحبيبي جيت وأكدت لي
واقنعتني بالكلام اشويه اشويه

وضحت كل المشاعر لين صرحت لي :
أنتي ملكتي الحشا 200%

واشتقت لك ياحبيب الروح واشتقت لي
وعيشتني بالحكايات الغراميه

يازين كلمة (احبك) يوم .. لمحت لي
وأتعبتني والمشاعر نارها حيه

الله ياحلوها من بعد ما صرت لي
وأنا من العام .. واخلاقي تجاريه

لاتحاقر شعوري وانت كلك شعور
لاتحاول تكثر لوعتي والعذاب

ابتسم لاتضايق صف كل الامور
خل عنك التغلي والزعل والعتاب

والله اني وفيه .. مالحقني قصور
وانت دايم تهدد بالجفا والغياب

والله مامن جديد وضاعت أفكاري
والشعر (يانوف) مدري ليه مليته ..

يمكن لأني تعبت وضقت بأسراري!!
ولا على شان عين اللي تمنيته ..

اللي (لهجر الحبايب..والجفا) ضاري
(يانوف) ليته يحس بضيقتي ليته

لايغرك قصيدن قبل عرفتك كتبته
ماهو ابلازم اتكون القصايد تجارب

صح بعض البشر لامن قرالي عجبته
بس شاربك يسواله ثمانين شارب

والله اني كل ربع ساعه اقوم
اتذكر غيبتك .. وارجع انام

شوف شالي صار هذا بس .. يوم
الغلا حطم فؤادي .. ياحرام

لاتذبح الشوق في قلبي .. وتثر بي
وانا بهالحب مبليه ومعذوره


حبك تغلغل على عقلي وسيطر بي
ولعبت بي لعبة الورعان للكوره


اجيك ماكني الا مضيعه دربي
واروح ماكني الا فيك .. مسحوره


تحتاجني ايه .. وادري ودك ابقربي
وانا بعد ودي .. ومانيب مجبوره

اسمع (لحون العود) في صوت نواف
في ذمتي إحساسها غير عادي ..

ابداعها بين من الصوت والقاف
حتى معانيها تهيض فؤادي ..

هذي القصيده صدق جابتني أكتاف
ياليتني ماوحيتها بالبوادي ..

***************
طبعي ملوله بالاغاني .. ولكن
مقطع ليا مني سمعته أعاني ..

يحرك اللي بين الاحشاء ساكن
واعيش من زود الوله جو ثاني ..

وأتعب واردد في لساني (الاماكن)
المقطع الثاني فداه الاغاني ..

*************
ابدي مع الاشواق وارجع مع متهات الظلام
واصدق احساس الشعور اللي يحطم حالتي

ان جيتني اطير مع وصلك وحبك والهيام
وان رحت عني احترق .. بين الممر .. وصالتي

************
ياصديقات المصالح والخساره
بينكن مافيه لو وحده وفيه ..

المخبى ماتخبيه الستاره
انتهينا وانتهت هالمسرحيه ..

************
يكثر البيوت اللي تجي واهسي وتروح
وهذي اشخبطها .. وهذي اسجلها

وهذي تحس بقلبي الغامض المجروح
وبعض البيوت اسج عنها وأجلها

********

أول ايام عيد الفطر جيتك اعايد
قلت بسبق واعايد من توده عيوني

قلت برسل لجل عينك جديد القصايد
قبل كل الجماعه ترسل ويسبقوني

ماخذيته من بلوتوث ولا جرايد
ابدع البيت من راسي الى تيلفوني

أنت ياللي غلاك ابداخل القلب زايد
ايه أحبك مدام الراس ثالث امتوني

****************
اوصل على حد (7) بيوت
وامسح بيوتي ولكني

أضيق واوصل لحد الموت
وأحس بالهم يسكني

غنيت محدن يرد الصوت
حتى الصديقات يبكني

الوقت لات المشاعر لوت
والله مدري ويمكني

كبرت ولا إن فات الفوت
مصيره الوقت يركني

******************
شريط الإهداء إرفع لي وأنا أرفع لك
وألاحظ إن المهايط زاد عن حده

يقول : والله من مبطي اتابع لك
وإن عودت للحقيقه دين وترده

***************
لا لا تحسب إن الكلام إن مر مايثر علي
انا بشر وإن كان مايثر علي ماني بشر ..

لاتعفس الموضوع واسمح لي واسمع مايلي :
ماهيب انا اللي احرث النيران واسعى للقشر ..

اعوذ بالله يالكلام الشين عندك ممتلي
الطيب ميت بين خلق الله والخبث انتشر ..


علم اللي ينتظر يوم الرجوع
انتهينا لا جدال ولا وداع

انتهت كل المشاعر والدموع
وابتدا جو التشائم والصراع

كنت احفظه بين قلبي والضلوع
واعشقه واموت به حتى النخاع

لكن اللي صار في يوم الربوع
دمر الاشواق والتفكير ضاع

*********************
يانوف انا من ضيقتي جاني هبوط
راسي ذبحني لين مارحت الطبيب

يقول لي : يابنت من كثر الضغوط ؟
واقول لا والله من جرح الحبيب

*****************
الساعه في بعدك يوم
واليوم بأزماني

اسال نفسي وانشد دوم
ليته ماخلاني

وأغني بصوت محروم
من صادق وجداني

حبيتك تنسيت النوم
ياخوفي تنساني

*******************
ماعاد لك عندي مكانه وقيمه
قصة غرامك قربت عالنهايه

اخذ الورق عني بليا عزيمه
ولا بحذف اوراق حبك ورايه

****************
زعلت من نفسي علشان نفسي
ماكنت احسب اني لجرحك ضعيفه

البارحه سهرت والبال عمسي
هذي حياتي .. والليالي مخيفه

من كثرت التفكير عييت لأمسي
وقفت بين المشكله .. بالنصيفه

اقول مره : اتركي الهم وانسي
ومره اقول : القلب ماهو بكيفه

*****************
اترك كلام الحب سولف لي عن احساس العيون
هي مثل عيني لا ضمت شوفك تبين افموقها ؟

اي والله اني اعشقك واموت بك حتى الجنون
مجنونة بك والقصيده واضح منطوقها

لو قلت لك يغلا البشر أمون ولا وما أمون؟
مشاعري لا جات لك بانت عليك احقوقها

****************
انت غير بخفة اسلوبك
يابعد عمري وياروحي

ياعساني دوم محبوبك
يادواي وسبة اجروحي

***************
كتمت الشوق في صدري هنيا
وأحس ان المشاعر ماتبيني

يجيك الشوق من هذي وذيا
بدا من قلبي وبين بعيني

تولعت بغرامك ماعليا
لعبة ابحسبة الاشواق فيني

ترى الشك يذبح قلبي الهادي المجروح
وحتى دموعي لا تضايقت اخششهن


انا غيرتي مره وقلبي عليك ايفوح
اخاف العذارى من السواليف تربشهن


لو إنك على فالك تمشى تجي وتروح
وحتى لو إن الغيد دايم مطفشهن


يجيني شعور وياخذ القلب قبل الروح
يدمر هجوسي ودوك الاشعار فتشهن


تلاقي لمشاعر غيرتي بالقصايد بوح
ليا من قريت القاف بإحساسهن عشهن


طلبتك عشان الحب يالغالي المملوح
ليا عرضا دربك عشاني تطنشهن

الله له الشكر .. والعرفان .. والمنه
وماني على المنه اللي منك مجبوره ..


خيبت ضني وكل راح في ضنه
خلاص بانت لي الاوضاع والصوره ..


جيتك على الطيب والاحسان والسنه
وخليتني بين خلق الله .. مقهوره ..


صديت حسب الرضا اللي هن يبغنه؟
خل الأمور الخفيه عنك .. مستوره ..


العين تضحك لكم والقلب .. لكنه
ماقل قدره لو انه قال : مشكوره ..


وانا على كلمة اللي مالنا عنه
أمشي على حكمته وامشي على شوره ..


ابوي جعله يعيش ويدخل الجنه
ويديم درب مشينا في سنا نوره ..

اليوم غير الأمس والقابله غير
خلاص ببدي مع بداية طموحي


ماهمني لو يتعبني المشاوير
بمشي واقوي عزم روحي بروحي


مستقبلي يفرض علي المقادير
والخطوه العدله تقوي صروحي


خلاص ماينفعني ايات تأخير
العمر عدى والطواري جروحي


دراستي ماجات من دون تبرير
الحين وقت الجد ماهو مزوحي


بحمل امتاعي وابمشي على خير
بعد شهر تبدي مسيرة طموحي

الله يخليك لي وجعلي افداك
ياللي غرامك تمكن من فؤادي


وشلون أخليك ولا كيف ابنساك
ياروح روحي وياغاية مرادي


ان غبت عني افكر واتحراك
ياصاحبي والله انك منت عادي


اي والله اني احبك موت واهواك
ويزور طيفك خيالي في رقادي


طلبتني خافقي ومديتلك .. هاك
وزينته بجوري ونرجس وكادي


وأموت من غيرتي واتابع اخطاك
واعاتب اسلوبك باسلوب هادي


واهديت لك وردة منشان عيناك
(وطال انتظاري) .. يغنيها (عبادي)

كلام الشوق لامنه طرالي
يوردني على حوض المنيه

وقلبك ياحبيبي لا صفالي
أضمه عند خفاقي هنيه

أعيشك حب في عالم خيالي
وأسوق النفس لحسابك هديه

عقب حبك فقلبي مابقالي
سوى ذيك اللحون السامريه

أغنيها بقيفاني لحالي
ولالي عن غرامك مقدريه

تعال وشوف ويش اللي جرالي
انوح الليل مثل الراعبيه

اتوق امن الوله ياراس مالي
وحبك باقي ونذر عليه

وتبقا ياحبيب الروح غالي
غلاك ابخافقي مادمت حيه

(حالك) تغير ولك مده ووضعك غريب
(حالك) ظلام الليالي وأصبحت معمعه

(ماشي) بدربك ولاحتى لصوتي تجيب
(ماشي) على كل حال وروح لا تسمعه

(روح) اتبع اللي توده كود جرحك يطيب
(روح) التفاهم ذبحني والزمن يقمعه

(قصة) غرامي وحبل الود مابه نصيب
(قصه) ولاتفكر انك ترجع و تجمعه

(حره) بكبدي من اسباب الهوى يالحبيب
(حره) وموقي من الضيقه ذرف مدمعه

(مره ) حياتي ومن عقبك خفوقي صويب
(مره) معه وانت بعض احيان منتب معه

(غيره) وضيقه وقلبي من فراقك كئيب
(غيره) همومن كثيره بالحشا موجعه