للحزن بوجيه المساكين ساحات
تنطق لو ان الصمت هيمن على البوح

بسكاتهم تسمع للاوجاع صرخات
وبنطقهم تلمح علامات وجروح

يحكون لكن حكيهم ما له أصوات
حتى ولا صوتا من الحزن مبحوح

يبكون دم وينزفون ابتسامات
لوكان دم الوجه مخفي ومفضوح

في نهجهم هات أقبلت وادبرت هات
وان أملوا ما بالافق عارض يلوح

لويقدرون يترجمون المعاناة
قالوا . . لو ان القول ماهو بسموح

أوراقنا غصت بكثر الكتابات
من كثر شرحا مالقا صدر مشروح

نظلم ولا نعلم ونحلم بوقفات
في محكمة شرعا به العدل مذبوح

نحتاج وقفة من وقف خمس الاوقات
لحظة خشوع الروح مع خالق الروح

لو الوفا بالوجه يترك علامات
كم وجه شخصا بالردى كان ملفوح

شف هاليدين الطاهرات العفيفات
اللي تمد الطيب من غير مصلوح

صارت ملاعق للبطون الخبيثات
اللي تعج بريحة المكر وتفوح

الله ياليت الكواليس شاشات
ونشوف ما خلف الكواليس بوضوح

أحد يحب الذات ويعيش لذات
واحد عن اللذات بالذات مكبوح

من مات واسمه حي مامات لو مات
ومن مات ذكره مات لو كان به روح

قل للعيون اللي يديها قصيرات
درب الأمل له باب مازال مفتوح

الارض مثل النفس تجزع وترتاب
ماتنبت إن كان السماء علقتها

إن ما مشى بالوسم وديان وشعاب
ماتنفع الامطار لوغرقتها

ولو زان وجه الارض بزهور واعشاب
جتها الهبوب العاتية واصفقتها

المرجلة ماهي ب/في فتل الاشناب
أهل اللحى في هالزمان حلقتها

أسمع تصاريحا على لسان كذاب
كذبة طمع وأصحابها صدقتها

وسط البيالة ملعقة سمها ذاب
وأشوف ناسا حركوا ملعقتها

طبخة هوان وذل يطبخ بها غراب
مافيكم اللي ما يذوق مرقتها

أوراق غدر وحقد في داخل كتاب
والريح من يم الشمال طرقتها

العام ماخوذ(ن) من أطنابنا أطناب
واليوم بحرين السلام ورقتها

وان ما وقفنا صف في وحه الارهاب
البندق العوجا تثور فشقتها

وليا اتحدنا نشنق أرقاب الاحزاب
وليا اختلفنا ولمت مشنقتها

والحية اللي تخفي السم باللناب
صيداتها لاجا الظلام درقتها

دون الخليج ارواح/ واعمار/ وارقاب
للموت سكرة والنفوس عشقتها

بالمعركة تاتيك للموت خطاب
وان عينت سومات موت فرقتها

أهل الخليج عيون وشيوخها أهداب
بايمانها وبحبها طوقتها

خليجنا يلبس من العز جلباب
بشته سهوم الحقد ما شققتها

سفينة(ن)تبحر ويحسب لها حساب
بامجادنا صعب البحور فهقتها

وان ماغدينا دونها ستر وحجاب
سود اليدين الغادرات خرقتها

رد الشاعر زياد على فهد الشمراني

يافهد ياراعي الجزل السمين
جعل زينات المباني ماتهد

جازلي طرقك وانا حرا فطين
لي على العليا وهومتها جهد

خذ وانا ابن حجاب معناي الثمين
الحظيظ اللي بهالدنيا زهد

الضباء ياما اخلفن عقل الذهين
عاقبنه لين عانا وانلهد

كل علما تحسبه خافي يبين
لوتعاهدتوا على حفظ العهد

صاحبا مزيون والدنيا تزين
كل ما عرض بخده يافهد

كن في صدره ثمر حبات تين
وكن في فمه خلاصة من شهد

قدرة الله كيف هذا كان طين
وانخلق واصبح قمر وسط المهد

والسنين تراقبه عقب السنين
واضطهدني بري حال المضطهد

لا تبين طيحتك للعالمين
الفهد يابو سعد يبقى فهد

سقا الله مكان كلما ضاق طول البال
تزيد الهموم وضيقتي لاتذكرته

مكان لعل الله من رايح الهمال
يعله يالين تضيق بالسيل خاصرته

الياقبل من المنشا قنوفه تقول جبال
وهبت هبوب بمطلع الشمس واعثرته

وركد ماتقول الاموقف على الاطلال
وبقايا رسومه غر الامزان خابرته

وصبت عليه الين ماكل وادي سال
وتحول بها خد الموشم وغيرته

وزبدها طفح والسيل من جالها للجال
ومن ماعلى جتك الشغايا محدرته

مابين الهضاب النابيه كنها سلسال
بجيد الهنوف اللي بترتيب ناثرته

وبعد تم له من عقب سيل ثلاث ليال
ورويت ووافقها دفا شفت باذرته

وقامت تزيد وكل يوم لها في حال
وصفا جوها عقب العواصيف كدرته

زماليقها لانسنس النود معها مال
وريح النفل فاحت بجوه وعطرته

بروض خلي ماجاه شاوي ولاوبال
ولامرته غير السحايب وباشرته

ماغير ام سالم تزعج الصوت والموال
تقل ماخذه صوت ابو نوره وحنجرته

تغني طرب وانا من الضيق والغربال
اسج القدم مع كل فج تخيرته

بجاله حكرت من اشقر البن لي فنجال
ومما يعدل خاوي الراس طهرته

بعيد عن اصحاب المصالح وناس المال
ورفقة صغير كثرت المال كبرته

يجامل الياجيته ولاقفيت فيني قال
والياجيت له بين الرجاجيل صغرته

وقمت ابدع بيوت نوادر من الامثال
ونسيت الهموم وكل طيب تذكرته

وتفاولت في باقي اليالي بطيب الفال
وانا كل همي عفو ربي ومغفرته

تدور الارض دوره كل صبح وليل باستمرار
وحنا ثابتين بفعل قوة جاذبيتها

وهذا حال دولتنا الفتيه قبلة الاقطار
يدوم الانتماء والجاذبيه مع قيادتها

وقادتها كبار وفاهمين الحكم وهم صغار
سياسية وراثه ماكسبتها من دراستها

مواقفهم تجي فوق احتجاج وشجب واستنكار
لهم قدره تعدى قدرة الدوله وقوتها

حرار من حرار وينبت الله منهم الاحرار
مثل ماينبت الله كل نبته مثل بذرتها

هم اسوار الديار وويل دار ماعليه اسوار
تمرجح باليدين وكل ماجت تجف .. دزتها

تقال به الرياح يسار ثم يمين ثم يسار
اليا هبت عليه باطنتها ولاتعدتها

مثل وقت مضى يوم انها تومي بنا الاخطار
حروب قبل مية عام قد ذقنا مرارتها

زمن بالقرن يولد من بعض ويموت خمس انفار
على عشرين عام اعمارهم تندر زيادتها

من اسباب الحرايب كل اعمار الرجال قصار
ومن زود الغباين ماتشوف البنت جدتها

ولولا الله ثم عبدالعزيز اخمد لهيب النار
ان كان الله واعلم مابعد طفيت شرارتها

لقى ذولا لهم ثار على ذولا وعليهم ثار
جماعات تطارد بالبراري من قرادتها

وكان اكثر مشاكلهم على العشب وعلى الابار
ضرورات اليا جت تطفي النيران شبتها

يصلون ويصومون ويقومون بحقوق الجار
ويدون الثوابت كلها باوقات حزتها

ولكن القتال يدور حامي والزمن دوار
ولافازت قبيله قامت الاخرى وتحدتها

رحمها الله من خلا الايدين الطايلات قصار
على الشرع الحنيف وناشز الاصوات سكتها

رحمها الله حارب ثلث قرن ولاشكى المشوار
على حمرا تقود الجيش طافحة سفيفتها

ثمان شهور بالعام بحراره والمظله غار
وباقي العام باجواء توقف الخافق برودتها

ومع هذا وذاك يجهز الاسفار بالاسفار
تولى الفتنه الي فتتتنا لين فتتها

وخلانا على هالحاله الي تعجب الانظار
حكومتنا بعز وعزنا الله من معزتها

بديت بذكر علام الغيوب مفضل الإنسان
باحاسيس وعقل ولسان وأطراف يقلبها

على كل اتجاه مسخرة ما تقبل العصيان
ولا يبطل عملها النوم بأمر اللي مركبها

ومن فضله تفضل صاحب الفضل وعطانا إخوان
ملوك ينطلق نبع العدالة من مكاتبها

مثل فهد وولي العهد عبد الله مثل سلطان
وباقي الأسرة اللي جعل ربي ما يغيبها

تدير الحكم بالحكمة وبالسنة وبالقران
تراقب ربها سر وعلن ما أحد يراقبها

ولونا يوم نخلق ما لقيناهم لنا تيجان
لبسناهم لنا تيجان للروس وعصايبها

عيال الحاكم اللي كان بالدنيا وكان وكان
علومه عندكم واللي يعرف اسمه مغيبها

وأنا لو جيت أبسرد سيرته ما هوب بالإمكان
ولكن كل حفلة ذكر أبو تركي يناسبها

يناسبها ويعبق منه ريح الورد والريحان
ولو ما طب طيب بساحة الحفلة يطيبها

وأنا بأذكر قليل من كثير حول هذا الشأن
بشكل مختصر عن رحلة العودة وصاحبها

بدا راعي ذلول في شمال الشرق دون إيران
على سيف البحر من غرب راعيها يدربها

أبو عشرين عام ويعترض ويعزم العربان
وينشد عن دويلان الجزيرة وش يحاربها

وقالوا دولة الأتراك وإلا دولة الرومان
وأما بغير هذا يا معزي لا تقربها

ومشى بستة وصار عدادهم ستين في بنبان
بنفس الهجرة أو هم بالهضاب اللي تقاربها

وخطو خطة عجلة تعجل في فنى عجلان
ويا ما أكبر نجاح الخطة اللالله مرتبها

تفتح قبلها بيان تقفل بعدها بيبان
يجي مدروس فيها كل جانب من جوانبها

ونادى القوم ناداهم مناديهم مع الاذان
هاك الصبح والصبوح وفرحت الديرة بغايبها

ونزل عبد العزيز وطوحت بأخباره الركبان
فرح واستبشر اللي بين مشرقها ومغربها

وتنادوا للوقوف بجانبه كل أكثر الشجعان
هروب(ن) من حروب(ن) ما حد يحمد عواقبها

حروب المنهزم فيها خسر والمنتصر خسران
يوم تجتمع عند الله الأمة يحاسبها

حروب(ن) كان فيها سيد الساحة فرس وحصان
وسيف ورمح ورجال نزيف الدم يطربها

بيوم به تغيب الشمس بين العج والدخان
بفعل رجال ورجال لها تفتل شواربها

صهيل رغا ونين ثغا صياح نسا بكا ورعان
لو أمك طنبت بالصوت بأذنك ما تجاوبها

شريعة غاب مخلب ناب جايع يأكل الجوعان
ولدغة دابها أرحم من شقا لدغة عقاربها

ولا هو مشكل التوقيت شهر الصوم أو شعبان
ولا هو مشكل الموقع بيوت الله وطالبها

وحنا أولاد وأحفاد الرجال اللي هاك الأزمان
مشت في طاعة الله ثم طاعة معزبها

ولولا الله ثم شح المورد وقف الطوفان
ملكنا الأرض طول عرض والشمس وكواكبها

ولكنا توقفنا على الغالي من البلدان
وحموها رجال أبو تركي وسلمت من مصايبها

وصفوها وصار أعدا الزمان اللي مضا جيران
وكل يكره الفتنة كما يكره مسببها

وكل يعشق الحكم السعودي شامخ البنيان
مدام إنه على هدى الشريعة ما يجنبها

وعشنا في رغد وإيمان وأمن طاعة الرحمن
وواكبنا شعوب يستحيل إنا نواكبها

بدولة مالها عينة تعين ولا تريد أعوان
ما غير الله سبحانه وكل إنسان هايبها

تعهدنا رعياتها وصناها عن العدوان
وحافظنا عليها واستفدنا من مكاسبها

فلا هامل ولا خامل ولا عاجز ولا كسلان
سوى قلة عدم توفيقها جا من سبايبها

تسير القافلة لو يقعد الداشر على الديران
ولا تترك زهاب لمن تخلف عن مراكبها

ولا نسمع وشاية من لعب في رأسه الشيطان
ولا نلعب مع اللي معظم أوراقه مقلبها

ولا نركض ورا اللي يلبسون ألوان تحت ألوان
على حفل القرادة يسبق الشبان شايبها

ولا نقرأ كتاب تبعد أهدافه عن العنوان
ومن شب الحريقة يحترق وحده بلاهبها

وحنا جنودكم يا سيدي حماية الأوطان
عيال جنود أبوك اللي توارثنا مذاهبها

ضباط تقدر قيمة الرتبة على الأمتان
رتبها العسكرية ما هي أكبر من مراتبها

تعلمنا على أيديهم فنون الحرب الميدان
نزيد أبها صلابة كل ما زادت متاعبها

وسبحنا بأسلحتنا في بحيرات من الغدران
تطب أجسادنا الماء وأسلحتنا ما نطببها

نفك البوصلة والخارطة وانثبت النيشان
على أهداف نقيس أبعادها من قبل نضربها

ودرسنا كيف نجزي راعي الإحسان بالإحسان
ودرسنا الدولة اللي تعتدي وشلون ندبها

ودرسنا كل درس إلا دروس الظلم والعدوان
علشان الملك من منهج التعليم شاطبها

عسى الله يلهم أهل الراحلين الصبر والسلوان

مدام أن الحياة أقدار والأعمار مكتوبة

وأنا باسم الوطن والتضحية والحب والإيمان

ابنعي سبعة في طائرة إنقاذ منكوبة

رجال باعوا الدنيا من أجل مساعدة غرقان

صقور طبحو وسط الخطر والنار مشبوبه

مهمتهم صعيبة موحشة ورجالها شجعان

ضباب وليل وبروق ورعد وأمطار ورطوبه

يعرفون إنها مستعصية ما هيب بالإمكان

ويدرون أنهم لو نفذوها شبه أعجوبه

ومع هذا مشو لمواطن صكت به الوديان

بكل اصرار ما دام الشهادة دربها صوبه

أقدم للفهد ولنائبه ولسيدي سلطان

عزا .. ولكل محبوب بكا لفراق محبوبه

واهني طاقم الترنيدو اللي ولعت نيران

وأقول باسم أبو خالد فدا ما هيب محسوبه

ألا يا سيدي منا لك الشكر ولك العرفان

على وقفاتك اللي كلها للخير مصبوبه

وأنا باسم الوزير ونائبه ورئاسة الأركان

أقدم لأهل الأبطال العزا .. وأقول مكتوبه

اعيش بحلمي وحلمي حقيقة مالها تفسير

اجامل نفسي ونفسي تعرف اني مجاملها

بغيت أضحك على نفسي واسوي للخبر تصغير

واثرني لو ضحكت السالفة ما اقوى اتحملها

عجزت أنسى عجزت اسلى عجزت أبدل التفكير

أصارع تالي همومي وانا بلشان باولها

اسبح واذكر الله واتبع التسبيح بالتكبير

واخر اسجد على أرض المسجد ونفسي مذللها

وأرتل سورة الحمد وتليها سورة التكوير

واحلل كل كلمة واعتبر وارجع واحللها

واراجع نفسي بنفسي واحاسبها على التقصير

واقول الله أكبر ما اقصر الدنيا وما اطولها

رحل طيارنا اللي من ثلاث أيام كان يطير

على طيارة بالجو شايلته وشايلها

عجزت انطق عزا الواجب وأنا أول فارس التعبير

ولا أدري كيف أعزي اسرته أو كيف أقابلها

ومع أني عارف أني لو تكلمت الكلام يحير

نطقت بكلمة وحده وضاعت قبل اكملها

الهي تجبر اللي خاطره متكسر تكسير

على فقد الشهيد اللي يبر أمه وياصلها

شهيد له شهادة من شهود انه من أهل الخير

على اكمل وجه يدي واجباته ما يهملها

توجهت ودعيت اللي له التصريف والتدبير

عساه يحلله منها وهي منه يحللها

عسير اللي بك امير القلوب اشتقت للجية
ابا ابل العروق اليابسة من ريح مطراتك

ابحيي فيك روح ميته واشواقها حية
على جوك على ضوك على نوك وغيماتك

على ذيك الجبال الشامخة والشمس والفية
على ذيك البروق اللامعة من بين لمعاتك

على شيخ وقف لك وقفة ما هيب عادية
وقف لك وقفة تبنى عليها كل وقفاتك

يلبس جسمك القابل ملابس فن سحرية
وهذا اللي تميزتي اخيرا به على اخواتك

لبستي ثوب وشماغ خضر زاهي وطاقية
واشوفه ينقش أكوات يقولون انها أكواتك

جلب لك كل سواح الخليج مع السعودية
وصبر شوي والباقين عديهم بمخباتك

اخذتي خالد وهي سيتك ان كان لك سيه
امير ما يعوضنا بداله كثر حسناتك

اشوفه طول الغيبة واشوفه قلل التيه
كأنه ما يشوف من الرجال الا رجالاتك

صحيح انك تحبينه صحيح وبالميه ميه
ولكن لو سمحتي قللي من كثر شرهاتك

قرابة ثلث قرن المسألة ما هيب بشوية
على مثله بمثلك وانتي ابخص في حساباتك

وانا ما اقول ما انتي قد لا والله مثنيه
ولكنا نبيه لمثلك يسوي بها سواتك

عطينا خالد الفيصل وخوذي خالد زيه
وخوذي خالد وخالد وخالد قدر حاجاتك

وخوذي خالدين من الخواليد السنافية
وخوذي زود كل الي قبضها من معاشاتك

مانبي الا رحمتك يا مجيب السائلين
رحمة(ن) من عند رب الملا والا فلا

نحمد الله ونتوكل عليه ونستعين
الاله الواحد اللي على الكون اعتلا

يا فهد يا راعي الفعل والعقل الرزين
ما نبي غيرك مليك ولا نبي فيك بدلا

حرب من عهد الصحابه وعهد التابعين
جارهم ما كد توذا ولا عنهم جلا

من تبايعنا وحنا بالعهد متجودين
كل ما تزداد الاخطار يزداد الولا

وان دعانا داعي الحرب حرب وحاضرين
وان دعانا داعي السلم للسلم عملا

وان نصانا عاقل القوم يلقا عاقلين
وان بلانا جاهل القوم يبلا بجهلا

ماتفرقنا الليالي ولا طول السنين
وكل قوم تقبل التفريق ما فيها حلا

المزيني لا نخانا كلبونا من مزين
والجميلي لانخانا كلنا صرنا جملا

بيتنا وسط العرب لا يسار ولا يمين
من جنوب الليث بالغرب لاطراف العلا

يا بو نايف يا هلا بك ووعد الحر دين
يا هلا باسم النحيت وليتها تكفي هلا

تستحق المدح والتقدير يا ذرب اليمين
غالي الله يجعلك ما تزيد الا غلا

كاتب معك زملا من الرجال الطيبين
واتجهت لقمة المجد من دون زملا

ودنا والله بتاج ومقص ونجمتين
ما تقف عنك الرتب ما دام متنك ما امتلا

وانت منت لحرب بس . مار اقول الله يعن
لكن اعمل قدر ما تقدر على دفع البلا

حسب توجيه الملوك الطيبين الطاهرين
اعمل اللي يرتضونه على رووس الملا

كان ابو نايف طموحه يقود الناجحين
لو يسلونه بقولة كان جدك ما سلا

استقيت العلم هذا من اخوياه الاولين
جبت قول اهل العقول وعفت قول المبتلا

قلت هو وش نجحه ؟؟ قيل بر الاقربين
قلت اجل ماهو ذكي وعبقري ؟ قالو بلا