اسعد الله اوقاتكم بكل خير





في رفحاء بالحدود الشماليه للمملكة العربيه السعودية... أيام الثمانينات هجريه عندما كانت رفحاء عباره عن بضعة بيوت من الطين
وكان السوق القديم ( سوق المشاهده) سوق يقصده الأخوه العراقيين نظرا لقربهم من
رفحاء ؟
وفي وقتها كان مبنى الحرس الوطني عبارة عن خيام معدوده لوبها قليل من الأفراد
ومن ضمن الأفراد (رسام العنزي) وصديقه ( العتيبي ) وكان العتيبي وقتها طفشان
وحالته النفسيه مترديه وواهس وطاري الفصل دايم على باله وخصوصا وأن العتيبي كان لم يمضي من زواجه سوى شهر واحد تقريبا وزوجته بالمنطقة الشرقيه وعمله في رفحا والطريق بينهما (ردميه ) وليس إسفلت والمسافه (800) كم ... وهذا مما يدفعه للفصل ويعكر صفو مزاجه ولولا مؤازرة العنزي
له لحصل ذلك ولكن العنزي كان يشد من أزر زميله .
ونزلا ذات مره في وقت الضحى إلى سوق رفحاء , وشاهد العتيبي شخص عراقي
كبير السن وكانوا وقتها يحملون السلاح وهذا الرجل يحمل بندقيته على ظهره (برنو) . كعاده شعبيه وكان يتبع هذا الشايب
بنت فارعة الطول ووجهها مكشوف شديدة البياض وفيها من مظاهر الحسن الكثير والكثير !!

وتذكرالأخ العتيبي الأهل وخصوصا أنه في الشهر الأول من الزواج وحن
لربعه , وقال : لخويه رسام العنزي .... ( لعن أباك يارسام ) شف ذا الخلق العجيب ياه . .... وأطال في النظر للبنت . فقال: له رسام لاتفضحنا .
أقول عين خير ويالله طلعنا من السوق هذي لو يعلم أبوها هلحين والله ألا يطلق
علينا النار هذولاء بدو وسلاحهم جاهز هاللي فوق ظهورهم !!
والعاز ياخذونه من روسهم ... قصده عاداتهم .
فعلى طول أخرج العنزي زميله العتيبي من المكان ورجعا للثكنه مكان الحرس
في خيامهما وهما مهمومين وخصوصا العتيبي ..!!
وهلحين العتيبي زاد همه هم وزاد حنينه وتولعه وشوقه , وتهيض بإبيات شعريه
خففت عليه شوي ... وقال: رسام والله يالعتيبي ماني (شاعر) من شان أرد عليك
وتبادر لرسام فكره بدل من الرد الشعري ؟
قال: إسمع يالعتيبي حنا في وقت الظهر وإذا جاء العصر شب لنا النار وسو لنا فنجان وسترى !
ولما صليا العصر شب العتيبي النار وعمل قهوه وقال: رسام رح يالعتيبي لخيمتك
وإذا ناديتك ... تعال .
ونادى رسام لرئيسهما بالعمل ملازم أول وعزمه وتعذر الرئيس وصمم العنزي على
أن يتقهوى رئيسه عنده وقال : يالله ولو أني أدري أنك تريد شيء فقال: العنزي والله
مابي لنفسي شيء بس تقهو عندي فنجال عالطاير ...؟
ولما تقهوو قال رسام والله اليوم رحت أنا والعتيبي خوينا للسوق وهيضته بنت
عراقيه شافها بالسوق وهوتعرف شباب وتوه متزوج وماكمل شهر نصف
وشاف من الصدر وفوق والباقي ما......! وأسند علي قصيده وأنا ماحفظتها
وقال : الرئيس وهو (روقي ) .
خله يجي يسمعنا إياها .... فنادى رسام لزميله وقال: قل : لنا قصيدتك !!
فقال :-

وجدي على أريش العين يارسام \\ وجد السجين اللي عليه النبتشيه
ماياصله ياكود هاف عليه أعلام \\ من البيت الأبيض وردوه السعوديه
ياغلق البنزين ثم عدل القسام \\ منوة غريب الدار بأرض خلاويه
يمشي من بلد رفحا على اخرنهاية الدوام \\والعصر كد عقب حدود النعييريه
يلفي عشيرا عليه الضلوع احيام \\ منوة العاشق عذاب الهواويه

فقال : الروقي ألا يمشي هلحين وليش باكر يروح شهر وشهرين والرخصه منك
ياعنزي ولايجي ألا وهو مرتاح

قال تعالى : ((وقضى ربك ألا تعبدوا إلا إياه وبالوالدين إحسانا..)) الإسراء الاية : 23 24 وقال تعالى : ((وإذ أخذنا ميثاق بني إسرائيل لا تعبدون إلا الله وبالوالدين إحسانا ..)) البقرة ، الاية : 83))
وفي الصحيح قال ابن مسعود رضي الله عنه سألت رسول الله صلى الله عليه واله وسلم أي العمل أحب إلى الله، قال: الصلاة على وقتها قلت ثم أي قال: بر الوالدين قلت ثم أي قال: الجهاد في سبيل الله ولو استزدته لزادني) صحيح مسلم.


وبهذه المناسبه أنقل لكم هذه القصه

التي تدمي القلب لحال رجل ربى عياله واحسن التربيه

ونكروا الجميل

وهذي قصة رجل وله ثلاث عيال ماتت امهم وهم صغار وعيا الاب يتزوج

ثانيه خائف على عياله من المره الثانيه تعذبهم وتشقيهم و المهم

الرجال رباهم وتعب عليهم وكان يطلع من الصبح ولا يرجع الى بالليل

ونوبات يتاخر كله هذا على شأن يوفر لهم الاكل وكان كل ماطلع

خلاهم عند جاره يلعبون مع عياله وواذا جاء من المقناص سوالهم

العشى وعشاهم وكان ما يتعشى الا اذا شبعوا عياله وياكل من بقايا

اكلهم.

ودار الزمن وكبروا العيال وزوجهم ابوهم وشاب الاب الطيب ولا عاد يقدر

على القومه والطلعه الا بالمساعده المهم قامن حريم عياله يتشكن منه

لا زواجهن الين اجتمعوا العيال وكل يقول للثاني خله عندك حتى اجتمعوا

على راي واحد انهم يطردونه الاب .مالقا غير جاره وعياله الاولين الطيبين

ورعوه وكرموه وطيبوا مكانه كأنهم عياله وقال الاب القصيده المذكوره

ودعوته المشهوره فيها المهم عياله ماتوا كلهم ولا واحد منهم خلف له

ولدوانقطع ذكرهم ونسلهم فحسبي الله عليهم ناكرين الجميل

والمعروف والعشره وعاقين الوالدين .

وهذه القصيده:-


قال الذي يقرا بليا مكاتيب = ياللي تقرون العمى من عناكم


يا عيالي اللي تشرفون المراقيب = تريضوا لي واقصروا من خطاكم


خذو كلام الصدق مابه تكاذيب = مثل السند مضموم للي وراكم


يا عيال لا صرتوا ضيوف ومعازيب = ترى الكلام الزين ملحة قراكم


وتروا السبابه من كبار العذاريب = وهرج البلايس ما يطول لحاكم


المذهب الطيب فهو مذهب الطيب = والمذهب الخايب يبور نساكم


يا عيال ما سرحتكم باللواهيب = يا عيال ما عمر المعزب ولاكم


ياما توليت القبايل تقل ذيب = من خوف لا ينقص عليكم عشاكم


وياما شريت السمن من عرض ما جيب = يفزقلبي يوم يبكي حداكم


وياما قطعت من الفيافي العباعيب = ندور من صيد البراري غذاكم


يا عيال دوكم لحيتي كلها شيب = هذا زمان قعودنا في ذراكم


قمت اتوكا عوج المصاليب = قصرت خطانا يوم طالت خطاكم


عطوني القرضه عليكم مطاليب = عطوني القرضة جزى من جزاكم


لابد يوم عاوي دوني الذيب = بالقبر ما افرق طيبكم من رداكم


ماني بفاضحكم بوسط الاجانيب = با عمالكم يدرون كل اقرباكم


لو كان تدرون الردي والمعاييب = صرتوا مع المخلوق مثل خوياكم


خوالكم بالطيب تروي المغاليب = ولو تتبعون الجد محد شناكم


وش علمكم يا تاركين المواجيب = حسبي عليكم هالردى وين جاكم


يالله عسى اعماركم شمسها تغيب = يعتم قمركم ثم تظلم سماكم



يا علكم في حاميات اللواهيب = ياللي على الوالد خبيث لغاكم


شفت الجفا والحيف والغلب والريب = بضلوعكم لا بيض الله قراكم


اطلب عسى نساكم ما تحمل ولا تجيب = ولا احد من الوغدان يمشي وراكم


اخسوا خسيتوا يا كبار اللغابيب = اهبوا هبيتوا يقطع الله نماكم

هو الفارس شالح بن حطاب بن هدلان نشأ بين أفراد قبيلة الخنافرة والتي هي فخذ من قبيلة ال محمد القحطانية

عاش إلى سنة 1340ه وكان مثالا بشجاعته وامانته وصدقه وحسن خلقه وكرمه ووفائه وكان يحكم لحل المشاكل سواء كانت على مستوى فري أو قبلي وكان محبوبا عند قبائل قحطان والقبائل الأخرى المجاورة

وكان له أخ شقيق أصغر منه يسمى ( الفديع ) كان مثاليا بشجاعته وجرأته وإقدامة في ساحات الوغى لدرجة المغامرة بنفسة

وكان وفيا مع أخيه شالح خادما مطيعا له امينا محبا له تحمل كل المشاق عن أخيه شالح 0 وأصبح هو حامي ظغينتهم وكانت إبلهم لاتذهب للمرعى إلا وهو معها مدججا بالسلاح ممتطيا صهوة جواده وكانت القبائل الأخرى لا تجرؤ على الأقتراب منها مادام الفديع معها

وذات يوم ومع بزوغ الشمس وأخاه شالح جالس حول ناره يتناول القهوة التفت إلى الإبل وهي في مباركها قرب لبيت راها تعتب في عقلها ولم ير الفديع

فنادى شالح : الإبل تعتب في عقلها والفديع غايب عنها اين هو

فقيل له: إن زوجتك تغسل رأسه وترجله داخل البيت

فقام غاضبا وقال : الإبلحائرة في مباركها ولم تذهب إلى المرعى وأنت عند النساء يغسلن رأسك ثم أخذ من التراب ووضعه على راس أخيه

فقام الأخ البار خجلا من أخيه وأخذ يمسح التراب عن رأسه وهو يردد العفو يا أخي العفو يا أخي ثم طلب من زوجة اخيه أن تسرج جواده وتحضر سلاحه وذهب للإبل مسرعا

أما شالح فقد رجع إلى قهوته وجلس حولها وعندما أطلق الفديع عقل الإبل ذهب إلى أخيه يمشي بحذر وبخفة متناهيه من حيث لايشعر به فقبل رأسه وقبل مابين عينيه وقال في أمان الله يا أخي وركب جواده وتبع إبله

وعند غروب الشمس عاد الفديع مع إبله ثم أقبل إلى مكان أخيه في مجلسه عند القهوة وأخذ يصب لإخيه القهوة ويقص عليه أخبار يومه الفائت ويداعبه بالنكات المضحكة ويحاول أن يثبت لإخيه انه لايحمل في نفسه عليه شيء وانه لم يغنظ من حثو أخيه التراب على رأسه وكل همه رضا أخوه عليه

وفي أحد الأيام وعندما عاد الفديع بعد غروب الشمس وجلس عند أخيه كعادته 0لاحظ الفديع أن أخاه كثير التفكير وشارد البال فسأله مابه وما لذي يشغل تفكيره

فقال له شالح : ياأخي ليس بي شيء ألا أنني أفكر في حالتك لأنني أتعبتك في هذه الدنيا وأنت وحدك تتحمل المشاق عني 0 وكم اتمنى أن أبنائي كبار ليساعدوك

فقال الفديع : يا أخي أنا سعيد في خدمتك وكل ما أوده أن اكون وفيا معك وأن أنال على رضاك دائما ثم أنشد :

يابو ذعار اكفيك لوني لحالي **** واصبر على الدنيا وباقي تعبها

وان غم اخوه معثرين العيالي **** انا لخويه سعد عينه عجبها

وان جن مثل مخزمات الجمالي **** كم سابق تقزي ونا من سببها

كم خفرة قد حرمت للدلالي **** لبست سواد عقب لذة طربها

وان جيت لي قفر من النشر خالي **** يفرح بي الحواز يوم أقبل بها

افديك يا شالح بحالي ومالي **** يا فارس الفرسان مقدم عربها

يا متيه ابله بروس المفالي **** ياللي حميت حدودها يا جنبها

قال هذه الأبيات لأخيه فتأر شالح بها وأجابه بهذه القصيدة :


ما ذكر حي بكى حي ياذيب **** واليوم أنا بابكيك لو كنت حيا

ويا ذيب يبكونك هل الفطر الشيب **** إن لايعتهم مثل خيل المحيا

وتبكيك قطعان عليها الكواليب **** وشيال حمل اللي يبون الكفيا

وتبكيك وضح علقوها دباديب **** إن رددت من يمة الخوف عيا

ويبكيك من صكت عليه المغاليب **** إن صاح بأعلى الصوت ياهل الحميا

ننزل بك الحزم المطرف ليا هيب **** إن رددوهن ناقلين العصيا

أنا أشهد إنك بيننا منقع الطيب **** والطيب عسر مطلبه ما تهيا

بعد القصيدة السابقة الذي جادت بها قريحة شالح بن هدلان أردفها بقصيدة أخرى على نفس البحر والقافية 0000 لم يخف فيها الامه ولواعجه فقد جاوب الذئاب بعويلها ثم رجع إلى خالقه وطلب منه الفرج ولام نفسه وأعترف أنه هو السبب بتحريض ابنه ذيب

على غزوته المشئومة وبعد ذلك عزى نفسه بركوبه الهجن وانه يتقدم بها على أعدائه حتى ينيخها على مقربة من البيوت الكبار ويتخطى الأطناب ويكسب الناقة الحائل التي تهاوي الجمل وتجعل منه خليلا لها

ثم أخذ يوصي جماعته بأن يختاروا النسب الجيد المناسب ليأتيهم الأولاد الشجعان النجباء وقال لهم ان بنت الرديء تأتي بولد همه أن يشبع بطنه ويجد ملذاته 00 رديء الهمة ميت الأنفة تافة الفكر والرأي

وهذه القصيدة

ذيب عوى وانا على صوته اجيب **** ومن ونتي جضت ضواري سباعه

عز الله اني جاهل ما اعلم الغيب **** والغيب يعلم به حفيظ الوداعة

يالله يارزاق عكف المخاليب **** يامحصي خلقه ببحره وقاعه

تفرج لمن صابه جروح معاطيب **** وقلبه من اللوعات غاد ولاعه

إن ضاق صدري لذت فوق المصاليب **** مانيب من يشمت فعايل ذراعه

صار السبب مني على منقع الطيب **** ونجمي طمن بالقاع عقب أرتفاعه

ياطول ماهيجتهن مع لواهيب **** ولاني بداري كسرها من ضلاعه

وياطول ما نوختها تصرخ النيب **** وزن البيوت اللي كبار رباعه

واضوي عليهم كنهم لي معازيب **** إليا رمى زين الوسايد قناعه

أضوي عليهم واتخطى الاطانيب **** واخذ مهاوية الجمل باندفاعه

أبا انذر اللي من ربوعي يبا الطيب **** لا ياخذ إلا من بيوت الشجاعه

يجي ولدها مذرب كنه الذ يب **** عز لبوه وكل ماقال طاعه

وبنت الردي ياتي ولدها كما الهيب **** غبن لبوه وفاشله بالجماعه

يا كبر زوله عند بيت المعازيب **** متحر ي متى يقدم متاعه

بقي شالح بن هدلان حزينا كظيما يسهر أيامه ولياليه , ولايفارق نار قهوته 0حيث يسلي نفسه ويداي جراحاته بانينه واهاته

وذات ليله وهو ساهر مع أحزانه 0 كان هناك شخص من قبيلة قحطان يسمى الهويدي قد ضاع صقره وأخذ يبحث عنه ويسال رافعا صوته كلما مر بنار قطين مناديا ( من عين الطير )

فعرفه شالح وسكت عنه أول مرة ثم عاد إليه مرة ثانية مارا ببيته 0 بعد أن مر بنيران الحي وسأل عن طيره ثم استمر بسؤاله مارا بكل نار يراها 0وعاد إلى شالح للمرة الثالثة فناداه شالح والهويدي لا يعرف أن النار هي نار شالح بن هدلان 0 وعندما عاد لكز هجينه بعقب رجله وجاء مسرعا ظنا منه أن المنادي يبشره بصقره

وعندما اناخ هجينه واقترب من المنادي تبين له أنه الأمير شالح بن هدلان والد ذيب 0 الذي لازال يصارع أحزانه فأعتذر الهويدي لشالح وأقسم له بالله أنه لم يكن يعرف أن هذه النار هي نار شالح 0 ثم قبل جبينه معتذرا وطالبا السماح فأذن له بالجلوس حوله وأخذ شالح يصب القهوة ثم قال هذه الأبيات

إن كان تنشد يالهويدي عن الطير **** الطير والله يالهويدي غدا لي

طيري عذاب معسكرات المسامير ****إن حل عند قطيهن الجفالي

إن جا نهار فيه شر بلا خير **** وغدا لهن عند الطريح اجتوالي

أن دبرن خيل وخيل مناحير **** وغدن مثل مخزمات الجمالي

على الرمك صيده عيال مناعير **** وشره على نشر الحريب الموالي

يضحك ليا صكت عليه الطوابير **** طير السعد قلبه من الخوف خالي

خيالنا وإن عرجدن المظاهير **** وزيزوم عيرات طواها الحيالي

غيث لنا وإن جت ليالي المعاسير **** وبالشح ريف للضعوف الهزالي

يسقي ثراه من الروايح مزابير **** تمطر على قبر سكن فيه غالي
0000000000
هذي قصة الشيخ شالح بن هدلان واللي كتبها الامير محمد السديري رحمه الله من كتاب ابطال من الصحراء