بسم الله وعلى بركة الله ...ولاحول ولا قوة الا بالله
تم بحمد الله سدح هذا الموضوع سدحا مبينا نافعا غير ضار
نعود من جديد في هذا الصرخ الشامخ والقروب الجبار الكويس أوي ( أكوس شي في
الاكواس ) تمت كتابة هذا الموضوع في حي القدس حيث يقيم خالي سليم ابو فلقه
وعمتي هيله ام شظاف ...
مابي اطول عليكم.. ودي انكم تبحرون في موضوعي
ابحارا حتى لو كان هذا الابحار على مرابيع عماير مثل فلونه .
اترككم مع الموضوع ...وكلي أمل ورجاء بأن لا يتم تضليل الموضوع ثم نتفه واللي
يبي يسوي حركات الشميسي ذي موب ازين له خلونا حبايب يأم و يابو الصحف
اخشششششش بالموضوع
منذ نعومة اظفاري وانا متابعه جيده للتلفزيون واحب اطالع كل ماهو جديد وخصوصا
التمفيليات (( جمع تمثيليه وعلى قولة البزارين تمفيليه )) وتلقوني مسنتره عند كل
مسلسل تقول يعطوني راتب اخر الشهر على المتابعه والتسدح
من خلال هذه الخبره المكتسبه والمنبثقه (( ياعالم منبثقه فوق مستواكم وربي ))
من عدد انبطاحتي أمام الشاشه البلوريه وقدام كل مسلسل
وفلم عربي قدرت اطلع بعدد لابأس به من الملاحظات وخصوصا على الافلام
والمسلسلات المصريه ولا يهونون اخواننا الخليجيين ..
<<=--- وش عندك يالفرنسيroor
<<=-=-=-=- اه يالفرنسي
نبدأ بالمسلسلات المصريه
اللي من يوم يبدا المسلسل لين ينتهي والقصه معروفه
واحد يمشي بالجامعه وماسك الكتب يمر جنب بنت مزيونه همن يطقها بكتفه
مسوي مادرى ، وتطيح كتب البنت همن يسوي اخلاق وينزل يشيل الكتب وهي تسوي
مستحيه تقعد تعضض اصابعها همن يعطيها الكتب ويناظرها بنص عين يقول لها اسف وهي
على طول تخق يعني يشبكها ولد اللذينا سريع سريع
بعد التعارف يبدا يغازلها بقاعة المحاظرات بس موب غزل فاحش يعني يناظرها ويبتسم
وهي برضه مسويه تستحي وهي رايحتن فيها وعلى ماقالو الاخوه المصريين (( غرئانه
لشوشتها ))
همن عاد يبدون يمونون على بعض ويصيرون يفطرون ويروحون كوفي شوب
ومطاعم برا الجامعه ويشربون العصير هذاك اللي يصير فوق الكاس نص ليمونه ولا نص
بردقانه
(( طيب حطو ليمونه ولا بردقانه كامله يامال اللمبة ترا الكيلو بخمس طعش والله
يديم الرخص ))
همن عاد البنت تقول تعال اخطبني من اهلي مايصير وش يقولون الناس وهم يشوفونن كل
ابو دايم معك انا بنت حموله ولازم تجي البيوت من ابوابها ..embarassed
ويجيكم الولد يقال هذا مؤدب ويروح يخطبها من أبوها.. طبعا ابوها يوافق بعد الموافقه تبدا عاد المراجه ويصيرون
يطلعون مع بعض وطول المسلسل ماعندهم الا كلمتين وهي
(( بتحبيني ياعطيات ؟؟ بحبك أوي أوي يابرعي ))
ويسهرون برا لاخر الليل بحجة انهم مخطوبين وعلى قولتهم (( أرينا الفاتحه
))ككككككك همن تبدا عاد المشكله اللي ماتنحل أبد وهي ((^ الشئه ^)) وما
أدراك مالشئه تروح 25 حلقه من المسلسل وهم يدورون شئه همن اذا لقو الشئه
يعرسون وينتهي المسلسل .love
اما من ناحية ان الولد يتزوج البنت زواج عرفي ..عاد هذي تروح حلقات المسلسل يدورن على الولد طبعا هاج مايبي يتزوج لعاب والبنت ماغير ماسكه المغسله تطرش فيها ..
وبعدين يدرون اهلها ويالله عاد يدورن على الولد واخر حلقه يجبون راسه وغصب عنك تتقوز بنتنا ..
هذا بالنسبه للمسلسلات اما الافلام ياقلبي لاتحزن !!
" وحده من ثنتين"
1- اما ان الفلم يصير كله مراجه وكلام فاضي ويكتبون لك قبل يبدا الفلم لايحق
لأقل من 18 سنه بالمشاهده (( ليه مايناظرون ؟ )) طيب دامكم عارفين ان الفلم
مارج وفيه لقطات غير لائقه وخارجه على القانون ليه تعرضونه "" عجايب""
2- او ان الفلم يجيك مخدرات وعصابات واكشن على بالهم راضعين مع حقين هوليود
وتبدا عاد هنا إبداعات المخرجين ويجيبون لك اصوات تفحيط ومطاردات ومره
من المرات جايبين مطارده بالبحر يعني لنشات تلاحق بعض وحاطين صوت تفحيط !!! خير
ان شاء الله كراتين حنا يعني ؟؟ ولا تجيك مطارده بوسط الديره والسياره اللي
تنطرد مرسيدس وسبحان الله وبقدرة واحد أحد تطيح السياره من فوق جبل واذا طاحت
بالارض تنقلب بيجو ! ( اللهم لا اعتراض ) ..... يعني المنتج عجز يدفع خمسين
الف جنيه زياده ويخلي الفلم ناجح ومافيه نصب .
كل هذي كوم وسالفة المباحث بالافلام المصريه كوم ثاني ...... يعني تكلف
الشرطه واحد من المباحث بمراقبة مجرم ..... يجيك ابو الشباب اللي هو المباحث
يشتري نظارات شمسيه
ويبدا يلاحق المجرم من مكان لمكان واذا قعد المجرم بمطعم
تلقاه يجلس بالطاوله اللي جنبه وطاق النظارات الشمسيه بالليل ومعه جريده شاقها
من النص مسوي يراقب المجرم خخخخخخخخخخ الشرهه ميب عليهم والله .... الشرهه على
السطل والسطيله اللي منسدحين على بطونهم و يتابع هالخرابيط
-=-=-=-=-=-=-=-=--=-=-=-=-=-=--=-=-=-=-=-=-=-=-=-=-=-=-=-=-=-=-=-
[] المسلسلات الخليجيه [][
-=-=-=-=-=-=-=-=--=-=-=-=-=-=--=-=-=-=-=-=-=-=-=-=-=-=-=-=-=-=-=-
كان ودي اكتب عنها بس اختصارا للوقت ، والجهد ، والايدي العامله ، ابختصرها
بكلمتين وهي بصراحه ماغير استعراض فلل وقصور وسيارات واذا تكلمنا عن المسلسلات
السعوديه بالذات ابعرف شي واحد !! الحين ليه زينب العسكري تمثل كل
الادوار يعني تجيكم بمسلسل واحد هي الام والبنت والعجوز ومابقى الا تصير
الاب !! قضو الممثلات يعني ؟ ولا هي لها كل شي مثل نظامنا ايام الابتدائي اذا
فيه حفلة امهات ..
يعني
((الأوله هي القران والأوله هي الانشوده وبعد هي الموضوع وكمان هي المكرمه والمثاليه .... بختصار الأوله هي كل شي ..تقل مابه في المدرسه إلا هي ))
ولا تجيكم ممثله بغض النظر عن من هي ؟؟ وتكلم وحده على بال امها ان ذي لهجتنا
وتقول
وشفيكي ؟؟ وش اخباركي وينكي ؟؟ شفتي اخوكي ؟؟ احسن لكي لا ترفعين راسكي
مادري وش قصتهن مع كي كي كي كي كي على العموم
يالله يارب لاتحرمنا من تلفزيوننا الحبيب ... اللهم احفظ لنا وزير الاعلام ..
يالله يارب يرجعون ايام عدنان ولينا اصرف من هالمسلسلات ..ولاتهون هايدي
وسنشيرو .
.:: الفوائد والاستنتاجات ::.
* اذا جا فلم بالتلفزيون على طول البس البدلة ام خطين (( خط البلدة )) وكنادر
ام حبال واطلع الشارع العب كوره مع عيال الحاره اصرف لك . واذا انتي بنت روحي سبعي مواعين البيت اصرف لك .. منه تكسبن امك بدال ماتجلسين تشفين خرابيط ..واذا
خلصن المواعين دقي على بنت خالتك وقليلها تعالي ..
* حاول انكم ماتنسدحون قدام التلفزيون لانكم اذا انسدحتم اكيد تبون تخش جو حتى لو كان
الفلم شين ... وهذا اللي حنا مانبيه يصير الجماعه..
* حاول انكم ماتنسدحون قدام التلفزيون لانكم اذا انسدحتم اكيد تبون تخش جو حتى لو كان
الفلم شين ... وهذا اللي حنا مانبيه يصير الجماعه..
تعليق