ايه انا قلت شعر ما بعد قيل زيه
صفقت لي قلوب وانحنت لي رقاب

والقصايد خذتني عن طموح البريه
لين ما صرت نجمة واعتليت السحاب

جايز الشعر يحلى .. لأمتلى نرجسيه
لكن .. النرجسيه فالمحبه ؟.. خراب

ذقت من طب عشاقي ثمانين كيه
ولا تعودت اضيق صدرهم بالعتاب

واقرب الخلق فيني ما خذتهم حميه
لين مالعين صارت من رموشي تهاب !!

صرت احس الطعون بخافقي سرمديه
وصرت ما عاد افرق بين خنجر و ناب

جيت للحب زهره .. والشعر مزهريه
قلت ما ودي أفتح للمعاناة باب

والا لو بأكتب لهمي ؟؟.. كتبت الوصيه
واجبر الناس يبكوني ل يوم الحساب

والا يعني تظني بأنهبل من شويه؟
لا ذكرت ان جسمي صار مثل السراب

لاذكرت إن شيبي ما تركني صبيه
لاذكرت ان دربي ما يدل الشباب ؟!

إكتشفت ان همي .. موطن الشاعريه
وإكتشفت إني بألقى راحتي فالعذاب

وإكتشفت ان شعري ما بعد قيل زيه
بس لا جاب حظ ... و لا كتب لي كتاب