بي ضيقة تغنيك عن كل الاعذار
ولوما كفاك الضيق..عذري ظروفي

أضيق..عادي بس لوصار ماصار
ما ضاق شعري عن فيافي حروفي

يامانكتب إبداع فنصوص واشعار
ولا فيه وصف قيل فالضيق يوفي

كل لقى له بين الاحلام تذكار
وانا على احلامي اصفق كفوفي

لولا تلاوة مصحف وذكر الاذكار
مأرتاح لين السم يشبع بجوفي

لو كان للطيب من الحظ مقدار؟
مأعلنت عن دنيا العجايب عزوفي

بأختار همي غصب لو كنت بأختار
وما للبلاوي سلوة عن كتوفي

بيني وبين النور مليون مشوار
ودروبي الظلما رفيقات خوفي

لا قلت باكر تنفرج ؟.. جدت اخبار
ما سرني سمعي ولا سر شوفي

كم من صبور واقف .. وراحت أعمار
وأدعي عسى الله لا يطول وقوفي

الأرض لا ضاقت بي وصبري إنهار..؟
..جلست اسولف للرمل عن حتوفي