من قال حنا نبي لك شي يالغالي؟
لا صرت كلما تكحلها.. بتعميها

حطيت عندك أمانه من ردى فالي
وازريت اقول إن حاميها حراميها

موروث طيبي وطهري وانصع اعمالي
ظنوك بانك على ماقيل راعيها

ياكثر ما خاب فيني ظن عذالي
وياكثر هقوات خابت قبل لأهقيها

ما شفت نخل وجا لي تمرها حالي
الا والاقي دسيس السم ساقيها

مدري تثاقلت اشيل الهم بلحالي...؟
مدري كتوفي علي اليوم وش فيها...؟!

طقيت انا كل باب شفته قبالي
ما غير باب الرذايل قلت مابيها

جنبت سمعي دروب القيل والقالي
ورفعت نفسي عن اللي هو يماشيها

عند الشدايد أحل معقد حبالي
واشد روحي على الضيقات وارخيها

والخير.. مهما جفوه الناس .. يبقالي
والناس ما تجفي الا من ترديها

جربت صمتي .. لقيت الموتة اشوى لي
والموت عيا على صمتي يعديها

وان صرت بنت فلانيب اصغر عيالي ؟؟
قد المراجل..وانا ابوها..واسميها !