ديوان الشاعر فالح بن قشعم

**ღ حلمي وجودك ღ** · 18-12-2009, 11:37 PM

بسمة الفكره

يالله انّي في ذراك .. امن الشعور الغابي
ومن تسوّل بعض الأنفس .. والفؤاد .. وشونه

لا أنكسر حلم الطموح .. وغلقّت الأبوابي
وضاق صدر الحق .. والمسلم تغيّر لونه

أحمني من زلةٍ تحدث عليّ أسبابي
ومن كدر وسع الصدور .. وعبرةٍ مكنونه

فاح طيب العود .. والطاري طرى وأنسابي
وأنسجم بيت القصيد .. لراعبيّ الحونه

وأسفهلّت بسمة الفكره .. ونال أعجابي
كل بيتٍ في قوام المترف المزيونه

جادلٍ من غيّها .. يحسب لها الف أحسابي
ومن عيون الحاسدين وحسدها مصيونه

درةٍ ماحافها الغوّاص والجلابي
من وراها السيف الأجرد .. والمشوّك دونه

ومن محاسنها تواضعها بحسن أدابي
ومن كرمها .. تكرم الليّ بيتها ينصونه

ومن ولاها لهلها .. تفخر بها الأجنابي
ومن بشاشتها تموت النيّه ال*****ه

ومن طهارتها وعفتّها .. لبست أثيابي
ومن تسامحها .. تباها كلّ نجم بكونه

وكلّ لون يليق في عود الشناق النابي
لا أطرقّه صفق الهوى .. عرّض هواه أردونه

السواد بطرفها .. تغضي به الأهدابي
كنّه موصى على نجلّه .. وحبّة نونه

والحمار بخدّها .. يعني هدوء أعصابي
وله نصيبٍ من شفاياها وفيه أنمونه

والبياض بوجهها يقرا عليه أكتابي
من سخط كيد الحسود ونظرته واعيونه

والخضار بموقها يفرح به الأعرابي
أيتزوّله ربيع بموقها يرعونه

طامحٍ شامت من الخطّاب والعزّابي
تصفق أصبعها .. لعشّاق الهوى وأفنونه

كثر ماجاها من العزّاب والخطّابي
شامت وشامت لشيخٍ شعبه أيحبونه

من ولاها له .. ولاها من غدر الأصحابي
ومن طمع حلم الطغاة .. وزمرةٍ مغبونه

مدّ جوده للبعيد يعمّ والاقرابي
كلّ دوله عمرّت من شيكه ومليونه

لين صار اسمّه مثل تضربّه الأشنابي
من تهقوابه بطيبٍ .. ماتخيب ظنونه

لأقبل اليوم العبوس .. وشنّت الأصعابي
حلّ عقدتها وحمّلها بحمل أمتونه

عشت ياشيخٍ غلاك بدم شعبك دابي
وكل شعبك بالولاء لك يعلنون العونه

صفّ واحد مانحيد .. وصفّنا ماهابي
دون جابر والكويت .. أعمارنا مرهونه

مايهيبّنا سوى المتكبّر الوهّابي
واحدٍ كرّم لحانا من مقّر الهونه

ومايزعزعنا تطرّف .. وأنحلال أحزابي
شلةٍ متشرذمه .. وأفكارها مجنونه

أتزوّل بالسلام .. وسلمهم كذّابي
وكلّ منهم نيتّه مدحورةٍ مقرونه

أيه يأرهابي .. تعال أبنشدك يا أرهابي
وش هدفك أمن الكويت .؟ وش تبي ؟ بحصونه ؟

كان قصدك زعزعة الأمن .. وشغب .. وأنشابي
والله أن تبطي .. وربعك .. ماتهزّ أركونه

الكويت أمحصنّه .. وأزنادها سبّابي
دونها ظلعٍ متين .. وقوّسٍ مسنونه

أن ضربنا كلّ سلبي .. ينقلب لأيجابي
وأن بطشنا نركي الجمره على غليونه

كلنا من دونها ستر وذرى وأحجابي
ومن يخون بديرته جعل السنين تخونه

شاعرٍ عن شعب جابر يعتبر نوّابي
وابن قشعم لاتكلم كلمته مضمونه

صفّ واحد مانحيد .. وصفّنا ماهابي
دون جابر والكويت .. أعمارنا مرهونه

**ღ حلمي وجودك ღ** · 18-12-2009, 11:43 PM

البديهه

لاتلحقين أقصاي .؟ يانفسي .. وأنا عقلي قنوع
والله فرق بين العقول ؟ وخصّها فالرابعه

من يملك أحساس البديهه .؟ مايهزّه كلّ نوع
والفضل لليّ حطّ عرشه ..فالسماء السابعه

يارب .؟ أنا عبدٍ محمّل بالخطايا .. والوقوع
تخطي قدم رجله .؟ قبل تجني عليه أصابعه

لاضاق فيه الكون .. يممّ لك صلاته في خشوع
ويتبع رضى عفوّك .؟ لأنّه يدري إنّك أتابعه

مؤمن .. وهبتّه من عطاك ..ألهام ..وأحساس ..وطلوع
وماتسبح أفكار القصيد .؟ الاّ على منابعه

حتى كسبة بدقّة التصوير .؟ ماهز الظلوع
فالأوله . والثانيه . والثالثه . والرابعه

شاعر .. وليّ صهوّة خيال .؟ وليّ مع الواقع رجوع
ومنين .؟ ماوجهتّها .؟ حنّت أحروف الطابعه

ماني بأفاخر .؟ بس أحبّ أعلّم .. أصحاب البتوع
الليّ يجيدون الطعون .؟ ويطعنون السابعه

ياقوم .؟ ياصغار الجموع .؟ اللي تذرى فالجموع
وشلونّ أطاوع الألتفات .؟ وكلّ شرٍ قابعه

مدام ساميّة الخواطر .. في معانيي تجوع
تقبل عليّ .؟ وتروح من فيض المشاعر شابعه

تعلمواّ معنى القصيده .. والعذر ركبّه .. وكوع
والليّ بلش فالثالثه .. لايبتلش فالرابعه

**ღ حلمي وجودك ღ** · 18-12-2009, 11:52 PM

دمعة الوجد

ياقمر لوّ كان نورك على الارض انحدار0
00اعرف انّ الارض حدرك ونورك فوقها

لاتقول الجاذبيّه سبب فالانتشار0
00كلّ ضوحٍ من جنابك ..؟؟ يميّز ذوقها

بعد ربيّ قمت في دور .. تسيير المدار 0
00صار قسمك كلّ مايّه تعجّل سوقها

لا صفق موج البحر .. والزبد منه استذار0
00ساعةٍ فيها الروايح تحنّ احقوقها

استحليت الهداوه .. وحكماتك وقار0
00لا هدر موجٍ ولا الغرّ خلت بروقها

ومن مزاياك الحميده .. تحديت النهار0
00كل عينٍ ترجي الليل قبل يتوقها

خصّ لامنه انتصف شهر .. وانزاح الستار00
0واستباحت دمعة الوجد مجرى موقها

وغيّبت نفسٍ هواها يعديها الصدّار
000وهيجنت حدب المحاني على معلوقها

منك واهسها يشوفك بعين الاعتبار
000غايةٍ لوّ كان ماأنت بعلى طاروقها

ايتراواله .. مراسيل ضوحك له عمار000
ولاصحى من غفوّة الحلم ؟؟ كنّه يذوقها

ومن مواهبك الفريده .. على نورك تغار0
00كلّ نجمه .. تسبر الصبح قبل يفوقها

مأكتفوّ خطلان الايمان في شعيّ البكار0
00تحت ضوحك .. يمموها وتلّة نوقها

قوم عاشت لاجل تحقيق حلم الانتصار0
00لين صارت عشق والسيف الاجرد شوقها

لا أعتزوّ .. حاموّ على الموت قصّاف العمار0
00سربةٍ سهلٍ مناها وصعبٍ عوقها

ومنّ عطاياك الجليله .. براويز أبتكار00
0جلّ من صوّر جريد النخل واعذوقها

ابي اكون لك اقرب الناس وأغلى شي في حياتك
نور يسبر كلّ زافه ويعطيها ازدهار
000لوّ درى تمثال رمسيس ؟؟ شال عروقها

واقعٍ عيني تعيشه ..بحد الانبهار
000وهبةٍ مفتاحها ضاع في صندوقها

منزلك شامخ .؟؟ وضوحك على راس القرار
000ماتعيبك طلعت الشمس ..؟؟ وأنت شروقها

**ღ حلمي وجودك ღ** · 19-12-2009, 01:57 PM

شربتك ظما .!

رعى الله ليلٍ حطّ بأقصى الحنايا درب
وسيّس جداره في فؤادي وأنا لاهي

سرابي وانا بيني وبين المواجع حرب
ونصر أحتلاله ... جزءْ من سجّة الساهي

سبب حربها .. فرقاك يالمستهيم الذرب
تسببت فيّ ( نكسيّ ) وأنا قبلها راهي

الاّ حسبيّ الله .. ليت مالك بقلبيّ قرب
ولا عشت فيّ جوّك على شان ما أباهي

تسيّدة كرسيّ الغلا .. عاد قلبيّ طرب
وعطيتك عهودٍ .. رسمها ( وجهيّ . وجاهيّ )

تنحيت وجهي شرق .. وأهل المودّه غرب
ولا كنّ عنديّ من شواريديّ الاّاهي

شربتك ضما .. وأثر الولع مايبيلّه شرب
سوى رشفةٍ تبطيّ مثل رشفة ( الشاهي )

وحسبتك بجمع وطرح وأخر نتيجه ضرب
ولقيتك مناوي مالها عنديّ أشباهي

مثل حلم ليلٍ واقعيّه مجازر صرب
نتايج حصيله تخلف .. الأمر . الناهي

عشقت أنعزالي يوم شفت الليالي جرب
مرضها .. عنى فكري . وصوتيّ . ودوّاهي

فلا أضنيّ أنسى كون تنسى ( الذويبي . حرب )
ولا أظنيّ أدله . لاطرى عودك الزاهي

بقايا غرامك ... درب وأنا لحالي درب
بخليك ؟؟ لاكن .. لاتجيني وأنا ساهي

**ღ حلمي وجودك ღ** · 19-12-2009, 02:02 PM

عظم الله أجرنا في ملكنا .

لا اله الا الله الوالي ولاغيره عويني
واحدٍ ماله شريك ونسأله من كلّ سيّه

نستغفره من سهوّ الأنفس ونرجع تايبيني
من خطى جلب الذنوب الليّ تحملنّا خطيّه

ونسجد لوجه الكريم اللي خلقنا مسلميني
وخصنّا الدين الحنيف وقادنا محمد نبيّه

والصلاة أزكى على خاتم جميع المرسليني
صفوة الخلق الرسول الهاشمي خير البريّه

يالله عنّا صبر طيّب يامعين الصابريني
في فقيد الأمتين الليّ فذمتّك ضحويّه

جعل علمٍ صرحّت فيه المحطه مايزيني
ضيّق صدور الشعوب الليّ لبو فيصل وفيّه

المليك الليّ لشرع الله حكم دنيا وديني
حامي البيت العتيق وحاميٍ نجد العذيه

المليك الليّ لشعب المملكه حصنٍ حصيني
للوفي خزنه وللعدوان مابه مرحميه

حاكمٍ ماله شبيه ولوّ خلق منّه أثنيني
أستقر الشرق الاوسط من هناك الى هنيّه

فالمواقف يعجبّك فعله وله عقلٍ رزيني
وفال***** يتعب أعقولٍ هقاويها مديّه

وللعداء ياقوم ياهتلر وطيشة موسليني
وللصداقه بيت عزّ ومرحباه وشاذليه

ترفع البيضاء لبو فيصل عشير الغانميني
يوم بار الجار جاره والخوي همّل خويّه

ساعةٍ كلٍ تبرى وأعتذر عذرٍ مشيني
قام ابو فيصل وقف وقفةٍ فيها حميّه

رحّب بشعب الكويت وفالهم سمن وسميني
وعقبها قاد الكتايب والفصايل والسريّه

حررّ اقيود الكويت ورد كيد المعتديني
وقال انا لاهل الكويت اليوم والصبح وقفيّه

وقفته تغنيك عن وقفة عيون الطامعيني
من عربنا والشعوب المسلمه والاجنيه

عطّر الله قبر أبو فيصل فقيد الأمتيني
وأسكنه جنّات عدن الليّ منازلها هنيّه

ليه مايرثيك قلب وليه ماتبكيك عيني
وأنت في هذا مقرّ وقرةٍ في شوف ذيّه

حكمة الله فالعباد المؤمنين الصالحيني
وعظم الله اجرنا في حاكمٍ مافيه زيّه

والعوض في راس ابو متعب اكعام العايليني
حاكمٍ رايه سديد ولا أحتمى الموقف بليّه

حبّ عبدالله زرعه الله بقلب الطيبيني
و حيّ ابو متعب ومنهو مثل ابو متعب ياحيّه

بايعك شعبك وحب الشعب في قلبك رصيني
وكلنا من دون عبدالله قواعد عسكرية

والولي العهد تجديد الولاء حبله متيني
ومن محبتنا لسلطان الكرم نغلي سميّه

عشت ياسلطان ابو خالد ملاذ المعسريني
سعد منهو ضامته بقعاء ولا له مقدريه

دام عز المملكه على مدارات السنيني
والله يخلي هل العوجا لها والنار حيه

وعطّر الله قبر أبو فيصل فقيد الأمتيني

وأسكنه جنّات عدن الليّ منازلها هنيّه

**ღ حلمي وجودك ღ** · 19-12-2009, 02:07 PM

. الابرقه .

وين انت لك يوم غايب يامصبّ الوريد
ماتدري انك لاغبت أزعل وأعصب علي

أضيق لاغبت يامطلق ولا عاد أجيد
أرتب أصفوف ضيق الصدر والليّ يلي !

محبتّك كل يوم وكل ليله تزيد
وغلاك ماله وصيف ولا شبيه وحلي

صحيح مجنون وتعايي وراسك عنيد
لاقلت ماذا بلك !! بتقول لا ذاه لي !

لكنّ لاكبرت الدعوى وقرب البعيد
عينت لك فرجةٍ يدله بها المبتلي

أثقل من طويق وأقسى من صليب الحديد
وأحلم من الحلم وأسمك مجد ماينجلي

يعني بعيني لحالك بيد والناس بيد
الناس شلقة اجيوب وحضرتك بنتلي

أيجابي أغياب ابوفالح جديد القصيد
وسلبي غيابه مواجع قلب ماهو خلي

وانا بعد غيبتك ماني على ماتريد
أعدل العوج وأكعم ضربة العايلي

من كثر ماأجحد صواديف الزمان الزهيد
من غير لا أعلم لقيت الها معي فايلي

تنقضّت من جديد وجيتها من جديد
وهي من اخر لفت .. وأنا بديت أولي

مامنّها الاّ الجروح وسجةٍ ماتفيد
ترعى كدر مرتعٍ ضيقه ماهو ممحلي

امضحيّه فالصدر وامعشيّه .. والاكيد
انها تربّ الضلوع اللي لها منزلي

وانا يامطلق على ظنّك وعزمي شديد
شفني على الأبرقه شامخ وانا اخو علي

الله خلقني كذا وأسمي لشخصي رصيد
ولا أعترف بالتبوع اللي ماتسوى طلي

ابلشتهم من بعيد .. بفكرتين ونشيد
وشلون لوني قريب .. ومحتزم يالشلي

عقلي بعيني كبير وراي مثلي سديد
وأعرف متى مطلعي وأعرف متى مدخلي

امخاطبة ناقصين العقل ماهي بجيد
اكبر خطى يرتكبه العقل فالجاهلي

اسمى تحياتي وشكري واردد وأعيد
امتوّجه يانجوم الرابعه وأعتلي

عرفت منتس مالا كنت اعرفه من جديد
وعرفت باني كبير .. وعالمي ممتلي

**ღ حلمي وجودك ღ** · 19-12-2009, 02:09 PM

يقول الحزين

يقول الحزين اللي مع الحزن صال وجال
000000000000وبدى مرقبٍ عدّاه قبل المسيّاني
انا كنت اعذل الليّ يقول الرجم غربال
000000000000خرافات بدوٍ مالها قاصي وداني
رقيته بعد مامال فيّ العصير وطال
00000000000ولقيت وجهي للهوى غير مامداني
تهاوت مراميس المواجع عليّ بالحال
000000000ولا أحتلت فالأول ولا أحتلت فالثاني
اكن المواجع وأنقل الحمل لامن مال
0000000000ويحس بوجعها واحدٍ جاه ماجاني
وجودي ليا لديت في باقي الأطلال
000000000وعرض لي من الماضي تشاكيل والواني
تغيّبت من واقع حياتي وأنا لازال
000000000على قيدها واظروف وقتي تحدّاني
تشقويت في قلبٍ خوافيه ماتنقال
00000000000وتذريت من عينٍ تبي بوح وجداني
وشكوىّ لغير الله عيبٍ على الرجال
0000000000خصوصٍ ليا من صار طيّب وله شاني
يحلّ العقود الليّ مايلقالها حلال
000000000000ولايتقي لاصار للعلم نيشاني
هاذي والله الليّ عللّت بي وانا ماأحتال
000000000000اغيّر فسَلم ابوي واسلوم جداني
ربينا على قوّ العزايم وطيب الفال
0000000000ويلين الحديد وقاسي الراس مالاني
لوّ ان الزمان ايحدنا والظروف اثقال
00000000000تبسم حدينا كنّ ماكاينن كاني
تلاميذ مجلس طيب من عادنا جهّال
0000000000000ولاغيرتنا العولمه والتمداني
ولانقول في هذا ولا في هذاك اجدال
ت0000000000بسّامنا مطلوب في بعض الأحياني
نساير جميع الناس من مختلف الأشكال
0000000000وقناعتنا فعقول ماهيب فلساني
والى صد من بعض المواقف رديّ الخال
000000000000نبيّن ولافينا جبانن وخوّاني
تعديبنا الشيمات من مجلس الانذال
00000000000ولانتبع المقفي ولانزعل العاني
نعشق المراجل عشق وايل لبن هذال
000000000وانحب الظفر حب الهواجر لقحطاني
جميع الخصال الطيبّه جات بأسترسال
000000000على مرقبٍ مبداه ماهو بيخفاني
بديته حزين وكل مافيه ضيقة بال
000000000وحوّلت منّه كنّ ماكاينن كاني

**ღ حلمي وجودك ღ** · 19-12-2009, 02:10 PM

((الوجعه المدميه))

أتلى العهد في فؤادي يوم خليته
وقفيت وأعيوني الثنتين يبكنّه

شرحت وضعي على صدري وفليته
ولقيت صدري من الليّ صار له حنّه!

أسرف بي الوجد والطاروق شليته
وشعاير الصوت في صدري لها رنّه

مستاجعٍ من يدي والحال بريته
والوجعه المدميّه ماهي بمنكنّه

الله يسامح صبي عيني وراعيته
خلاني أبدّل السجّات فالونّه

مايلتفت لوّ تعمدتّه ولديته
الاّ على اللي تجيب الشبط .. فالكنّه

عفريةٍ حبّها العذري تقهويته
وكيّفت الأحساس من هيله ومن بنّه

كل مادعاني بعال الصوت لبيته
وأنقاد من غير لافضلٍ ولامنّه

أجيه واليا وصلته ماتعديته
جيّة رفيقٍ رفيقه مبطيٍ منّه

أسج في عالم أسلوبه وأتاكيته
وأقول من لاعشق مثله ياعنكنّه ؟

ماذاق ملح القبال .. الليّ تحاليته
ولا أغرته كلمةٍ معسولها جنّه

أمشاهده .. لا أنكسر خصره ورديته
وميّل بليلٍ حريره يعجبك فنّه

ينسيك طعم الحليب الليّ تغذيته
وتسج مع عالمٍ فالحب منجنّه

والحب لولا متاهاته وتنهيته
ماصوتوّ للقلوب وجات مستنّه

قلب الهواوي خضر .. والولف راعيته
ومن حبّها له تدكه رفق وأتحنّه

تصبح بشطّانه .. وتمسي بزاويته
وكل عرق ينبض خطا .. مسئولةٍ عنّه

أقفو بها الليّ شببهم ماترجيته
وأسلوم الأجواد مثل الفرض والسنّه

راحت سنه كامله لاجا .! ولا جيته
وحبّه على ظنيّ .. وحبيّ على ظنّه

أقفى وجرحه بقلبي ماتشاويته
وأقفيت .. والبعد جرحٍ ماأقدر أكنّه

مايوجع الرجل .. ويحرّك تناهيته
الاّ ليا من فقد له قطعةٍ منّه

**ღ حلمي وجودك ღ** · 19-12-2009, 02:13 PM

( قدّر الله بعبده وماشاء فعل)

لاتقول الصبر ماله مع العاقل ميول
000 الصبر لولا المطاليق ماكب الزعل

وماتزعزع كبوة الحظ رجالٍ يقول 000
قدرالله ..بعبده ..وماشاء فعل

وأنت ياصبري تعاني شقى الاربع فصول
000 بين ياوجدي ؟ وشفي ؟ ويسقى ؟. لا أشتعل

كلّ جرحٍ يحيي الذكر يالطرف الخجول 000
لا أنفعل ريّح ثواني ؟ وعوّد وأنفعل؟

لاتصوّر وسع طرفٍ تلبسه الخمول
000 احورٍ سوده تغطيّ مقاديم الشعل

راح في سجّة خيال البدايه ؟ عرض .طول
000 قبل لايبني خيارات ؟ عل اوّ؟ لا ؟ لعل

جعل يسقى يوم حبل الوصل ماله عذول 000
وقبل يتفوّه لساني ؟ بجعل ؟ وياجعل؟

يوم اشوفك ياطرق العود من ظلّك جفول
000 مثل مايجفل من ظلال رجليه الوعل

سامح الله سهوة الفكر يوم انها تجول
000 في سحابة وجد وأستاسمت؟ ذكراك عل

بس لامنيّ ذكرتك ؟؟ دريت إني بقول :
000 ( قدّر الله بعبده .. وماشاء فعل )

ديوان الشاعر فالح بن قشعم

ديوان الشاعر فالح بن قشعم

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget