يا زحمة الشوق خفي السير ل أشعاري ... لا يبين صبح الغلا وانا على أعذارك !



من مبطي الناس تنشدني عن اخباري ... ولو هم يدرون .. اخباري : هي اخبارك ، !



نفس الشوارع تعيد اليوم تذكاري ... نفس الأغاني تزيد ب قلبي تذكارك



نفس الأماكن تغيبني عن افكاري ... نفس الهبايب تهب ب وجهي أشعارك !



الحلم بدري .. يفوح ب طيب أزهاري ... والصوت حدري .. يغني ل أعذب انهارك



والليل صبري .. يجول ويسهر ف داري ... والدرب فقري .. يضيع في غلا أسعارك !



والعشق مدري .. ولكنه من " أوزاري " ... والتوت نذري .. أذوقه في وسط دارك



والوقت قبري .. ترابه دافن أقداري ... والموت خبري .. عليك أو منك أو جارك !



ما ذعذع الصبح الا فوق اسواري ... وما ساح عذق النهار الا على اسوارك



هامت بك الروح واسترسلت مشواري ... ويا غربة الروح كان اخطيت مشوارك



كني أشوف اللقا ف عيونك يداري .. واخاف مني ؛ اجيبك لاسوأ اقدارك !!



على كثر ما احبك .. أجهل اعذاري ... ولا لي بك إلا أحبك زوووود واختارك ..!



تايه ... مشتت فقير ........... مشقق ستاري ... لكني املك كثيير الحب وأزهارك



لو تسمع الريح عن م تقول أشجاري ؟! ... امداك تعرف في جوفي كبر مقدارك



ولو تسأل ف بالي : هو كم جابك الطاري !؟ ... يطلع لك اكثر .. من اللي جاك ف افكارك !



يا جنة الروح .. قربك ~ غاية امطاري ... ويا لذة العين .. شوفك " عيد يتبارك "



تعال وإشعل في احضاني حطب ناري .. مدامك انت السحب ب استبشر امطارك !!



اسكبني من ماء طهرك وإغسل احجاري ... واكتبني ذنوب .. وانا اتحمل اوزارك !


تعال واقطف فؤادي , وبعثر أعماري ... خذني إليك .. الغريق ب لجة ابحارك !



الكاس خمره ب نشوة حبنا " عاري " ... فديت روحك - تعال أدمنت إسكارك !

منقول