سفير الشعر




القصيده فرس والبيت فيها عنان
والمعاني تدور سرج خيالها

مهرة ما لقت خيالها من زمان
تلعب من الطرب ماشدت حبالها

ودها شاعر رفيع قدر وشان
يعسف المهره الي ما حد طالها

ودها شاعر حكيم علم ومعان
ياخذ لجام ابو الطيب ويصفا لها

وسمعت عن قصيد فيه سحر وبيان
الثكالا يسليها عن عيالها

ازبنت ونحنت واستسلمت في امان
مثل ما تنحني الاغصان بحمالها

وصرخت شدو عنان ترى النوربان
صهوة الشعر خلوها لمن قالها

اتركوني لشاعر سلموه العنان
واعتلاها سفير الشعر واركا لها

وأطلق عنانها للريح بنت الحصان
ومض برق عجز لا يلحق ضلالها

ضبحها وزن وبحور جزال سمان
وقدحها فكرة ما غيري اشتالها

الحصى مثل طلق من يدين الجبان
تطعن الارض ماهابت من جبالها

برمة كتوفها والمنكبين المتان
حبكة البيت لاقلته على جالها

ظهرها عز كاتبها بحد السنان
وبطنها كنز لابياتي وموالها

بين حضن الوطن وعياله الغصن زان
وانغرس في حياض المجد رجالها

من ديار أبو متعب دار ذرب اليمان
قبلة المسلمين وطلعت هلالها

من ديار الرساله والحرم والاذان
في يديني رساله رحت مشتالها

بان كي مون ترجمها وكوفي انان
ساعدوني على الفكره وايصالها

رايح ومتكل بالله ثم الضمان
محزمي دولتي جعل السعد فالها

دام ابو متعب موافق فانا في امان
سهل الصعب لعياله ومرسالها

وجهتي دار اوباما وسيع البطان
دار من غير العالم مع أجيالها

ما دعاني اوباما واسطات ولجان
لجل أتاجر بربعي واسلب أموالها

رحت صاحب قضيه عز في هالزمان
لجل أوضح مبادينا لجهالها

رحت مسلم وعرف المسألة امتحان
وأعرف إني كفوا إلها ولمثالها


سعود بن حسين السبيعي

الأقدار


ألا يا عالم الأسرار وعارف ماخفى بالجوف

تسهل درب من ناجاك يرجي والأنام رقود


وطمن فكره إلى حار وصابه من همومه خوف

وخوفه كل خوفه باكر إلى زاد همه زود


تحمل خاطره همه وقلبه تحتميه سيوف

ألا يالله تجبر خاطر لو ينكسر مفقود


يلف بحلم من أحلامه إلى بالخيال تطوف

عسى الأمواج تلعب به ويحصل حلمه المنشود


مخاطر من رجى ورده وقال لشوكها ما أشوف

يقول انه يذوق المر والعلقم هو المقصود


وضيع في حمار الدم وردة عمره المخطوف

ويسئل وينها الوردة وهي في كفه المشدود


يقول العشرة الحلوة حسا يف ضيعتها ظروف

وهذا طيب ذكراها بكفي ما عليه شهود


خسارة مادرى الوردة كفنها كفه الملفوف

ولو يدري ذبح نفسه لا حاسد ولا محسود


ألا يالله تشرق شمس ود ما بعدها كسوف

وتحيي بالأمل قلب اماله بليا حدود

سعود بن حسين السبيعي

بنساك




قلت انسني أكيد أنا الان بنساك



بمسحك من عقلي ودنيا غرامي



مادام أنا ما خطيت ومنايه أرضاك



ازعل على كيفك عساك العدامي



لا تجيب طاريه ولا أجيب طرياك



خلاص عقب اليوم انس احترامي



كنت أحسبك طفل أداريك و أرعاك



رح في سبيلك حان وقت الفطامي



رح ما أبي شوفك من الان مابغاك



أبيك تنساني وتنسى كلامي



لا واحسايف ضاع وقتي وأنا أهواك



لا واحسايف كنت مصدر هيامي



كنت أحسبك طيري ابرسلك وانخاك



وصرت الغراب الي على الراس حامي



سلمت قلبي واثقٍ بك بيمناك



ويا للأسف صار الأمين الحرامي

سعود بن حسين السبيعي

حفرته في بطن كفي




لو الرسايل تبين ما لك بداخلي


أرسلت مليون في لحضه ولا تكفي


أكتبك عشقي قبل لا تكتب أناملي


ما شفتي اسمك حفرته في بطن كفي


مدري وش اعطيك وش معطيك تستاهلي


بعطيك عمري هديه ليته يكفي


ياعين لا شفت وجهه خزي وجاملي


امنتك الله اذا شفتيه لا ترفي


ابيه لا غاب عني طيفه الجاهلي


اشكي على طيفه المجنون واغفي


من قبل اعرفه وانا قلبي لعوب خلي

من قبل لعرفه ولا حي عرف شفي

سعود بن حسين السبيعي

الكحل والعقد



تجملت بالحيا والدين والسنّة


وتزينت بالحجاب أحلى قلايدها


متعطرة بالثناء والحمد والمنّة


تسبح شفاها وتهلل بيدها


تكحلت في رسول الله ممتنّة


المكحلة سيرته والدين مرودها


سيرته مثل العطر تهواه ونكّنه


يجمّل أيامها والروح يسعدها


يا عقدها إلي زها في شكله وفنّه


يا مزين صدرها يا منوّر غدها


تستغفر الله وتدعي يا الله الجنّة


تحب رجل امها ويدين والدها


صلاتها لليدين الساجدة حنة


وفي قلبها ذكرها وأركان مسجدها


تجود الذكر بالإدغام والغّنة


حتى حركات مده لك تعددها


في كسرها حشرجة وفي مدها خنّه


اطرب قلوب تمناها وتحسدها

سعود بن حسين السبيعي

أصابع يدك




الا يالله ياخالق ويارازق ويا منان


وياعالم بما تخفي الصدور وما تخبيها


ويامرسل نبي الحق بالتشريع والقران


من الذره بنيت الكون يا سبحان بانيها


لك الحمد ولك المنه ومنا الشكر والعرفان


ولو نشكرك طول العمر والله ما نوفيها


مفضل ارضنا بالدين والاسلام والايمان


ومهبط وحيك ومسجد نبيك والحرم فيها


مسخر افضل عبادك لخدمة زاير الرحمان


سلاطين من الله خصها سبحان واليها


مشو بالعدل ولاهم علينا الواحد الديان


وبسم الله مجراها وبسم الله مرسيها


من معزي لعبدالله وطننا سيد الاوطان


ولابه حيً الا وده انه في ذواريها


من معزي لعبدالله وحامي جالها سلطان


ولي العهد راي وعضد حاضرها وماضيها


من معزي لعبدالله ونجد تنادي لسلمان


عروس ماتبي غيره ولو غيره طمع فيها


قبل عبدالعزيز وهي تشوم ولاتبي انسان


وكل وده بحضن العفيفه كيف يسبيها


وجت تنخى ابو تركي طلبتك عطني كحيلان


تبي سلمان من بشته يغطيها ويكسيها


وجت نجد الحضيضه وسط حضنك ياعظيم الشان


جتك عفوة صغيرة سن في احضان واليها


عدو الدين من هيبتك خاسيً يلعن الشيطان


وفيه احد يلومه وانت يا سلمان حاميها


الاياسيد الطولات والمعروف والاحسان


الا يا كافل الايتام... يا ساتر خوافيها


على كثر العطا والجاه فالتاريخ والازمان


يجي في بحر سلمان الكرم قطره ويرويها


اصابع يدك ما لمست بطن كفك لها ازمان


يدك ماتدري ان الها مفاصل لجل تثنيها


تجي كنك مطر للجدب مثل الرعد والهتان


يفيض الما على شعبانها ويفوح عفريها


تجي كنك نضر للي مضى عمره وهو عميان


يشوف النور بعد الضلمه الي ما يدانيها


تجي كنك بخت للي من صدوف الزمن فقران


لقى مصباحه السحري على كفك ويرجيها


تجي كنك عمر للي على فراش المرض تعبان



وهو قبلك يأس من حالته محدا يداويها




عشقت المجد وانت المجد يمشي في ثياب انسان



عشقت الطيب .. ياطيب اليدين وطيب راعيها




عسانا فدوة لك من سنا البيرق الى الاكفان



عسانا فدوة لك باول الدنيا وتاليها




لك عيال مربيهم على الطولات فالميدان



سلاطين على يدينك مؤسسها وبانيها




يعجز الشعر لاجا في خصال الضيغمي سلمان



ولا نقدر ولو صاغ الكلام اجمل معانيها




ومن يقدر على عد النجوم بها الفضا المليان



قدر يعرف مزايا سيدي و يعد خافيها




على كبر الفضا والشمس ياصل نورها اكوان



مثل سلمان خيره شمس ماتخفى مساعيها




وانا شاعر حكى نبضه قبل لاينطقه بلسان



يبي عفوك من الزله اذا فيها وما فيها




وصلى الله على خير الانام الهاشمي العدنان



عدد ذرات هذا الكون لين الله يفنيها

فقدك القلب








على ذكرى الوله والشوق والعشرة وعام فات



على ذكرى مواعيد الغرام وكل لحظاته



فقدك القلب يا نبض الوريد وصادق الخفقات



فقدك القلب يا صوت الحنان وحسه وذاته



فقدك وما يبي غيرك فقدك ويحترق بسكات



فقد خله ووجدانه فقد حبه وبسماته



يجيني طيفك الغالي هلا به وابرك الحزات



يا شوق القلب وإحساسه ويا اغلي ملذاته



على الله نلتقي باكر وننسى ماضي الونات



لان اللحظة بقربك هي العالم وجناته



على الله نلتقي وان زاد بعدك هلت العبرات



دخيلك لا تبكيها دخيل القلب وحياته



حبيبي والمشاعر صادقه ولكل شي إثبات



تبي إثبات اكبر من كتاب الله ومرضاته



أشوف الكون من دونك ولا يسوى وكنه مات



تعالي ننقذه منهم قبل لا تغيب زفراته



يزيد الوصل ما أمله سنينه كنها لحضات



يزيد وكنه البارح لقاك بكل هفواته



أمل من الحياة ولا أمل من المشاعر هات



أنا وشلون أمل وقلبي تناديك وناته



معك يصحى معك يغفى وفي حضنك حبيبي بات

وبسم الله عليك إن روعك من زود خفقاته

ياطلة النور



يا طلة النور من وجهك يشع الصباح

وجهك يشق الظلام ومبسمك بعثره

الأرض شالت لثام الليل عنها وطاح

حورية فرعت وهدتك عطر زهره

الورد من فرحته بالعطر غنى وفاح

كنه جمع عطر ها لأزهار في مبخره

والنسمة الباردة تجمع رذاذ البراح

وتسابق الريح مجنونة ومستمطر ه

كن الفراشة تنادي ليلها بالمراح

والطير يرقص يغني من غصن لشجره

لا غبت طير الحمام بعالي الصوت ناح

وفي طلتك لجت الأغصان مستبشره

من وجنتك السعد والنور بالخير لاح

يقول يا بخت محبوبك و يا مشطره

يا طلة النور فيك الحسن غنى وصاح

صيحة نيوتن وجدها في سقوط ثمره

أنتِ بزينك قلبتي ما الهماج القراح

وهو باختراعه قلب فكر البشر غيره