يجوش في صدري سؤالات ٍ وابي منك الجواب
يامْشابه ٍ ناشدْك بامْخاواته الليل الطويل

علام بالك منشغل قلّي ترى الخفاق ذاب
فضفض فديتك واهدم الحاجز وكمّل للجميل

يوم الزلالي برّد لكبدي عقب طرد السراب
اي والله اني ماني بناسي جميلك يالخليل

واليوم ليه بخدّتك وشْم وفي جوّك ضباب؟
وبْنبرتك عبره وصدرك حامل ٍ حزن جزيل

هل ياترى القربى السّبب، والا خيانات الصّحاب ؟
والا النّعايم والجدي مابينهم ثار الفتيل؟

والا الحياة بْشِدّته شبّت لهيب الاكتئاب ؟
والا المشاعر من عزيز ٍ مدّها لك جاء قليل؟

ابي تجاوبني قبل تدنى سويعات الغياب
لنّي احسّك من كبر ضيقتْك عزّمت الرحيل

يفداك وافي وافضحي عن غبّة عيونك نقاب
خليني ابحر في غياهيبك واطول المستحيل

خليني اروى من علومك واعرف سطور الكتاب
يمكن نذوّب للجليد ويروي العود النحيل

فضفض فديتك مابقى بي من حياة ومن شباب
قلّي وريّحني عسى يبرا بك القلب العليل

مدام قاعي مثل قاعك يرتجي غيث السّحاب
وظْروفنا تشبه بعض بالله وادْخل للدّخيل

اسْمعْه وافهم حالته ياجعل تِجزا بالثواب
خذ في يدي من قبل توهات ٍ عن الظّلّ الظّليل

احسب حسابي مثل ماني حاسب ٍ لاجلك حساب
خلّ نتلاقا لو بحلم الليل ونْدوّر دليل

لعلّ نرقى بالحظوظ ونبري جْروح ٍ عطاب
ونرجّع الساعه ورا الين نروى السلسبيل

يمكن هنا ننسى الحياة اللي تكشّر بالنياب
اللي من اسبابه عشقنا السهر والليل الطويل

.

بقلمي


اورنس