حي الرساله وحي اللّي كتبهالي
ولعيونها ياهلا باللي موصلها
مرت سنه منتظر لك رد الافعالي
أنطر رسايلك والاقدار تجلّها
واليوم بعد انها جت يابعد حالي
مجرى حياتي دخيلك لاتحولها
قلته وانا ماقريت رسالة الغالي
لكن علومه أباخذها من أولها
وحذفت عن راسي البسام واعقالي
وكل ماقريتله جمله قمت أحللها
وجابتلي أخبارها حلٍ وترحالي
وقامت تعذر ببوها اللي مبهذلها
وتقول في مطبخي وأغسّل دلالي
وأسوي الثانيه للضيف وارسلها
منوّل أفرح بشوفه وأحكي امالي
وأثره يبحث عن أحلامي ويقتلها
وأمي بعدها ترى ذقت العنا لحالي
يلعن عمر بنت غابت من تدللها
لفراقها ناظر لحالي نحل حالي
اليا تذكرتها اللقمات ماكلها
أعاتب الوقت عاكس حظي ومالي
والا أتركه مهنته هذي يزاولها
أنا اليتيمه بلا ماوى ولا والي
في قصر شامخ تحت دبرة عدولها
وكل ماأنتهى سطر من تعذيبها جالي
سطر اخرٍ ينقض جروحي ويفتلها
وقمت أتخيّل وكنّه جالس قبالي
وأثر التخيّل رسايلنا يجملها
وقلت أصبري والفرج للي صبر فاله
وأدعي عسى ربك أحوالك يبدلها
وردّت علي بصوتها الداله السالي
اليا متى ياعاشق دنياً انتحملها
أنت اللي أوّل سكن بالقلب والتالي
وأنت اللذي حبك همومي يجفلها
أما علومي سلامة راسك العالي
مدة غيابك حبيبي لاتطولها