يادلال ان ضاع صوتي لايضيع اللي بقى



لاتضيع الصورة اللي في خيالك يادلال



يابعد طول المسافة والكلافة والشقا



يابعد كل الحياة وكل ماجاب الخيال



ماورى سود الليالي والفراق إلاللقا



وش تبين بهالدموع الزرق يابنت الحلال؟



اتركي عنك الدموع وخلي الحزن يهقى



ان ماله فالقلوب الطيبة أية مجال



كلها جرح ونشوف الليل لامنه اتقى



في جلال الصبح جعل الصبح مايلقى جلال



اقبلي قبل نتفارق والوصال ابو النقا



ودي اخذك بيدينك والنقا ولد الوصال



اقبلي واليوم يوم الشعر كانه مارقى



يم ذيك الغيمة اللي كنها (طلبة تعال )



لايجي باكر يغني : (ياسقى الله وسقى)



كل شي ان طال زال الا القصايد ماتزال



لعن ابو ذكرى القصايد كان ذكراها محقا



كل بيت وذكرياته في ملامحها سؤال :



وينها اللي كنت انا والصبح ويديها اشققا؟



اي فال اللي رماني في خيالك اي فال؟



اه كان الشعر راح ورحتي انتي وش بقى



مابقى لي غير اجر الصوت وأسري يادلال

ياللي تقول الدار داري وتختال







ماشفت جده كيف لاروح عصير







تبغى الصراحه كلمة الحق تنقال







جده بحرها غير وجروحها غير







جده سواحل عشق وأحلام وامال







وأسوار طيش وذكريات ومقادير







جده وش أكتب عنك واللي على البال







أرق وأعذب من قصيد وتعابير







أكتب عن جروح وتواريخ وأجيال







ولا عن أحلام وقصيد ومشاوير







تدرين باكتب وأترك العشق ينهال







عن جادل تامر على الصعب ويصير







أسج وأذكر عودها كل ما مال







كنه يطير من ضلوعي لها طير







وأذكر شعرها لانتثر ينثر ألحال







وتلمه بشال عرف يمسي بخير







واذكر نسيم عذب كم عذب الشال







لا طار به والشال ماوده يطير







واذكر نهار دمعها باخره سال







نهار أحزانه عليه طوابير







نهار أدك بضيقتي راحة البال







وأقول ياجده تمسي على خير

ياويل قلبي على اللي شفت صورتها
حوريه تبتسم لي داخل الصوره
ابهامها بين .. جمرتها وجمرتها
من شافها يبصم ان البنت مغروره
وأنا اني لو اتبع بس جرتها
ل أشوف كل القلوب الخضر منثوره
يالعنبو حيها .. ياشين دبرتها
وشلون خلت عيال العز مقهوره
ياكم غرير قنص لربوع ديرتها
ثم عود يجر ملواحه مع طيوره
شامت عن أهل المظاهر رغم طفرتها
واختارت اللي عسفها ب أمره وشوره
فهد لعبها صحيح وصاد غيرتها
حتى غدت في يدينه شبه مكسوره
الله من ليلة تشهد لعبرتها
والله من ونة في الصدر مقبوره
من عقب ماهيب مغتره بشهرتها
حنت له الراس منهيه .. وماموره
وأنا هنيا ماغير أشوف صورتها
وأبطي وأنا أقول .. يخرب بيت هالصوره

يا رفيف الماء .. وفجر العيد .. وأحزان المواني
يا أكثر أهل الأرض طيبة قلب .. وأسرار دفينه

المكان اللي هنا .. مليان ضحكات ، وأغاني
والكلام اللي بغيت أقول .. يحتاج ل سكينه !

شوفي الركن البعيد هناك .. كنه صدر حاني
هذا هو اللي يليق ب شاعر وبنت حزينه!

أنسي الشارع ، وعتمات الزوايا، والمباني
هاتي يدينك نلف الغيم ونشكل مدينه !!

عندي الليلة كلام وصمت .. وأخاف الثواني
تظلمه .. أو تظلم اللي فيه كم ضاعت سنينه

بس لازم تسمعين اللي أبي ولا تراني
لو ب أعيده لك .. نسيت .. ورحت أقول اللي تبينه

شي واحد قبل ما أبدأ .. ما أبي أي شي ثاني
يخطر ف بالك .. وأنا أكشف لك شعور تجهلينه !

إن أنا .. وبكل ما تحمله أحبك من معاني
كنت،وراح أبقى أحبك .. لين .. مدري وش هو لينه !!

بس والله ماقدرت أنسى .. ولا همي نساني
لا ذكرت إنسان .. فيه أسرار مابينك وبينه

كل ما تطري علي فكرة هواك الأولاني
أشعر إني أنطعن مليون مره من يدينه!

أشعر إن عيونك.. الله ما خلقها إلا عشاني
كيف كانت تبتسم له؟!.. قولي إنك تخدعينه !!

صورة إنه كان يمسح دمعك .. تزلزل كياني
وكيف كان يلم شعرك .. ويتبعثر في يمينه

حتى اسمك يوم رحت أدلله .. حظي رماني..
بنفس الاسم اللي يقول .. بذمتك ماهي غبينه !؟

وكني اللي .. كل ما أناديك بالاسم الفلاني
أطلب النسيان .. يترك منه شي تذكرينه !!

لا تظنيني أناني .. لا .. أنا مانيب أناني
لو سلمت من الغرق . ب أموت في ظهر السفينه!

يا إني ما أكمل وأعاني .. أو أكمل ثم أعاني..
كل ما اسمع طاري اسمه .. أو تجي عيني في عينه!

أينا كان الضحيه ؟.. وأينا اللي كان جاني ؟
مدري !.. ولكن قراري لازم إنك تقبلينه:

مثل ما أكره فكرة إنه واحد ياخذ مكاني
ما أقدر أجلس في مكان إنسان.. كنتي تعشقينه!

صوت حبيبي وقبل أقول ياعونك
شكى جروحه ورحت أشكي له طعوني


يقول مقدر أعيش اليوم من دونك
وأقول حتى ولو ماعشت من دوني


يمكن أنا اكون أعز إنسان فعيونك
بس انت والله كل الناس فعيوني


لا صرت ربعي وداري فية جفونك
وش دخل الناس خل الناس يجفوني


يكفيني إن انت لا من قلت وشلونك
تطيب كل الجروح ويختلف لوني


وإن كان منتب مصدقني على هونك
تعال وطالع دروبي وين ودوني


أصبحت أجامل عداي اللي يحبونك
وأكره مشاهد عداك اللي يحبوني


ومن كثر ما احب واكره عنك واصونك
أصبحت دفتر مشاعر وأنت مضموني


إن غبت عني شعرت بلذة طعونك
وإن شفت زولك شعرت بقيمه عيوني

ياصغير السن قدرك طاحت أبراجه
الجرح خلى الصخر ينطق ونطقني



خلاص ماعاد تعني لي ولا حاجة
رح.. جعل ربي يوفقك ويوفقني


من بعد ماكنت نور العمر وسراجه
اليوم صرت الظلام اللي يطوقني


عطيتك أكثر من اللي كنت تحتاجه
أسرفت ف( الحب) ..لين الحب وهقني


خلاص.. مالي ومال الحب وإزعاجه
مالي ومال الدروب اللي تضايقني


تعبت أضم البحر وأهدي أمواجه
تعبت أجامل و أشوف الوقت يسرقني


شكواي للي عليه الضيق و إفراجه
اللي إذا شاء.. يرحمني ويرزقني


أما أنت يابو جبين عقد حجاجه
لاعاد تسأل: علامك ما أنت طايقني ؟


الناس كل على دربه ومنهاجه
وأنا عن الناس مابه شي يفرقني


إلا أني دايم أحب الصدق وأواجه
مخلوق .. و الله على هالوضع خالقني


حتى رفيقي ضماد الجرح وعلاجه
على كثر ما أتمسك فيه .. صدقني ..


لو أدري إنه مرافقني على حاجه
لأمسكه حاجته.. وأقول : فارقني

قبل اسافر كنت جالس في زمان الأنتظار
ارتشف هم المكان .. و كل همي حاجتين


كنت خايف من يباس .. و كنت خايف من خضار
كنت اخاف انك تجين و كنت خايف ما تجين


لين شفتك من ورا بيبان صالات المطار
مقبله من كثر شوقك .. كنت اشوفك تركضين


مرة ركضك يمين و نظرة عيونك يسار
و مرة ركضك يسار و نظرة عيونك يمين


تايهة .. ما كنك الا ضحكة وسط انكسار
ساكته .. ماكنك الا دمعة فيها حنين


خايفة .. وجلة .. حزينة .. يعني كنتي بأختصار
تشرحين لكل جاهل معنى كلمة ( عاشقين )


بعدها جيتك ولدت عينك و دار الحوار
من كفوفي دمعتين و من كفوفك دمعتين


كنت اصد و كنتي انتي ثايره مثل الشرار
ماعلى لتغة لسانك غير كلمة ( وين ؟ وين ؟ )


واذكر اني رحت قبل ابدي لك اية اعتذار
رحت حتى قبل اطيب خاطرك في كلمتين


لكن انتي عارفتني زين واللي صار صار
سامحيني واذكريني قد مانتي تقدرين


اذكريني لانتهت للشمس رحله مع نهار
واذكريني لاصحى للصبح ورد الياسمين


واذكريني لا لمحتي في ليالي البرد نار
واذكريني لا سمعتي للمطر صوت حزين


اذكريني واذكريني واذكريني .. بأختصار
..اذكري فهد المساعد قد مانتي تقدرين !

جا يشوف الحال كيفه بعد ماهزه حنينه
وقبل يسألني سألته : كيف حالك يالحبيب ؟

قال : انا كني غريب ضيع دروب المدينه
قلت : انا كني مدينة تنتظر رجعة غريب

قال : اجل وش فيك تكره سيرة الحب وسنينه
قلت : أجل وش لون ما اكره سيرته دامك تغيب

انت لا من غبت حتى مرايتك صارت حزينه
كيف ما تبغاني أحزن وانت لي حظ ونصيب !؟

الهدايا و الرسايل و المكاتيب الثمينه
والليالي و القمر و الريح و الكون الرحيب

كل ما تبعد .. تجيب الشعر ليه من يدينه
و تقعد جروحي تودي فالطواريق و تجيب

يا بعد كل القصيد و نزوة حداه و انينه
لا ذكرتك لاح بيت .. و طاح ورد .. و فاح طيب

و ان نسيتك ما نساني صوتك المبحوح لينه..
.. ياخذ لجرحي بثاره من خطاياك و يطيب

و بعد هذا جاي ترمي ذنبك بوجه المدينه
ما دريت ان المدينه كلها شمعة غريب

من بغى الفرقا لقى له عذر واسباب ودليل
خل عنك العذر والاسباب دام الحب ضاع

كان ودك بالفراق .. ابشر عسى عمرك طويل
لاتردد وانت لك كلمه ولك امر مطاع

لي عليك انك تبت بكلمة تشفي الغليل
ولك علي اني لأوقف وقفة الرجل الشجاع

لاتجاملني مخافة ( قال ) مدري خوف ( قيل )
عمر ( هرج الناس ) مايسمن ولايغني جياع

كان قصدك ( سر حبك ) .. اوعدك لأصبح بخيل
واحمل اسرارك معي للموت قدر المستطاع

بس قلها ... قل ما احبك ... وابشر بصبر جميل
لاتحسب أني مثل من طبعهم لوي الذراع !

صاحبك ماهو كذا ياصاحب القد النحيل
صاحبك طبعه غريب وغربته غربه طباع

في الهوى مايقبل الحل الوسط ولا القليل
مثل ماهو لاشرى يشري .. ليامن باع باع

ثابت لو هي تميل الارض حدره ... مايميل
يدري ان الفقر ماهو عيب والدنيا متاع

ماعشق لذة حياته كثر عشق المستحيل
ولا كره حتى مماته كثر كره الأنصياع

كم تعلم من شديد البدو وش معنى الرحيل
وكم تعلم من غروب الشمس وش معنى الوداع

وكم تعلم من سحاب الصيف وش معنى الحصيل
وكم تعلم من ليال البرد وش معنى الضياع

ايه انا هذا طريقي ( موحش .. وصعب .. وطويل )
وانت لامنك تعبت .. العالم فجوجه وساع

اعتبرني في بداية سكتك عابر سبيل
و رح وانا قلبي معك من وين وجهت الشراع

يكفي اني لانذكرت في سالفة عشاق .. قيل
:عاشر احبابه شجاع .. وفارق احبابه شجاع

مي هذي مثل طل الصبح لأغصان الحدايق
يبتسم قطر الندى لاباسته أو باسها

مي هذي بنت لامن شفت صدر الليل ضايق ..
أدري ان عيون مي اليوم طال نعاسها !

من هنا تصحى ويصحى الحب في عيون الخلايق
ومن هنا تغفى وتنسى الارض ضحكه ناسها

يسعد الله قلب مي اللي كثر ماهوب بايق ..
..من قلوب الخلق..ماذكر مر يوم وداسها

لأن مي أرق بنت..ولو قست ماهوب لايق
حيرتني مي..الأجمل : هي..والا أحساسها !؟

بالها لاضاق زانت..كيف لامن صار رايق!؟
في انتباهتها براءه..كيف اجل هوجاسها !؟

العمر لو كان ضحكه مي تكفيني دقايق
بس اخاف ان مت..تحني مي فوقي راسها

مي لو تبكي لموتي مالي الا افز فايق
من قبل لاموت أكثر..من نشيج انفاسها

مي .. لاتعطين بال لمن يقول الموت عايق
الجسد موته يفك الروح من حراسها

ماأحبك فوق الارض وبس ياكل الخلايق
حتى تحت الارض أحبك يابعد من داسها

مي لو ماقلت فيها بيت واحد ماتضايق
لأن مالي شعر ينشر لو رفض كراسها