طول النهار أضمد جروح غيري
و يصيح جرحي لا ضويت اخر الليل

يا ما المسا صب السهر في نظيري
و خذا مع لمة هجوسي تعاليل

و خلف العيون اللي تراقب مسيري
أحيت مزون العين قاع المناديل

النار فيها من مواقد ضميري
و الدرب فيه من الرموش المضاليل

أشيل حلم حاس كسره مريري
كم صكت اليمنى اختها ترثي الحيل

انشبت في بعض المحابيل طيري
واطيري اللي عذبته المحابيل

كم صارت العشرة وسيلة عشيري
و عديت مشواري معه (كذبة إبريل)

خلاص دامه ضاق حتى شويري
باللي تجبين اسرعي يا مقابيل

عرفت كيف أكون بعيون غيري
من سالفة بدو على ضوهم ليل