:تقول صاحبه القصه كنت متزوجه ومبسوطه مع زوجي ولكن غيره خواته مني خلتهم يسوون الهوايل
وفعلا هذي الحرمه ماشاء الله جميله ونظيفه وطباخه وزوجها يموت فيها كانت كل شهر بقصه جديده واللوان احلى واحلى والجسم ماشاء الله ماكنها جايبه خمسه عيال

والنظافه 0000امممم من تدخلين البيت تشمين الروائح وتشوفين صورتك في البلاط من كثر ماهو نظيف 00 البيت له ريحه والملابس لها ريحه وعبايتها لها ريحه وجسمها له ريحه ماشاء الله
كانت بس من تفتح باب شقتها نشم الريحه ونعرف الباب مفتوح

كانت ترسل مع زوجها الفطور انواع واشكال صواني الفول بالسمن وثلاجات الشاي والنعناع والكركديه والقهوه ياسلام سلم تقعد الراس
والحلا اخ كلنا كنا نجيب من برا الا هي تحرجنا بصراحه الحلا انواع واشكال

يعني الحرمه سبحان الله 00 جميله بكل شي
وبعد ملتزمه واخلاق 00 وكانت تحب زوجها وتهتم فيه 00 لكن خوات زوجها واللي هم اصلا بنات عمها كانوا يغارون منها

وكانوا يحنون ويزنون على اخوهم اللي هو زوجها انه يتزوج وكثر الدق يفك اللحام
كانوا يقنعونه بكل الطرق انه يتزوج بس عشان يقهرونها ويحاولون فيه
ان جاء يمين يجونه يسار وان جاء يسار يجونه يمين لين رضخ الزوج واقتنع بالزواج

وراحوا خوات الزوج من كثر حقدهم وغيرتهم من زوجه اخوهم اللي هي بنت عمهم اصلا
راحوا وخطبوا لخوهم صديقه زوجته 00صديقتها الروح بالروح
تخيلوا الغبنه صديقتها وزوجها حسبي الله عليهم
المهم تقول البنت هذي 00 تقول كنت ادري بكل اللي قاعد يصير ومطنشه
وجاء اليوم الموعود 00 وقالها زوجها ترا اليوم عرسي 000000000
تقول كتمت الضيقه بصدري وحبست دموعي في عيوني والسكاكين تجرح وتقطع بقلبي
وقلت له بكل هدووووء 00 مبروك 00 الله يوفقك 00

تقول يابنات رحت اجهز له شنطته وانا النار تاكل بصدري والدموع تحرق عيوني
لكني مسكت نفسي ولا بينت له شي 0مع اني ماكان بيني وبين الانهيار الا شعره

تقول يابنات محد يتصور وش كان في قلبي 00وانا اشوف زوجي حبيبي مع صديقه عمري
ولكن مابينت له شي وودعته بابتسامه عريضه تخفي وراها انواع العذاب

وتقول لما عرفوا اهلي واخواني تحلفوا فيه وحلفوا يقاطعونه ويسوون ويفعلون فيه
لكني قلت لا لحد يقوله شي ولا احد يسوي له شي خلوه
وحاولوا فيها اهلها واخوانها تترك البيت وتجي عندهم قالت ابد ما اطلع من بيتي خلوني

تقول البنت محد حاس باللي فيني ولو اوصف واقول مابقدر اقولكم عن الغصه اللي بقلبي

تقول اذا جاء زوجي من حرمته الثانيه اللي هي صديقتي 00تقول اكشخ واتزين واللبس عيالي واكشخهم
واجهز القهوه والشاهي والحلا والدنيا ومالذ وطاب
واستقبله احلى استقبال 00 ياهلا ويامرحبا هلا بك يابو فلان ارحب تو مانور البيت
اسفرت وانورت
تقول ولا ابين له شي 00 ولا اقول ليش تزوجت علي ؟؟ وانا وش قصرت فيه ؟؟
تقول ابد ولا حرف 00ولا كنه حصل شي
تقول احطه فوق راسي واسولف واضحك وارقص وامبسط وانكت واسوي كل انواع الترفيه في بيتي

ولين طلع 000000000 بانت حقيقتي رجعت لحزني وهمومي لكن ما ابين عند زوجي شي

لاني لو بكيت وتباكيت وزعلت وغضبت وهاوشت وصرخت ماراح يغير في الموضوع شي بالعكس راح ينفر مني ويبتعد عني ويقول انا كيف كنت متحملها اثاريها نكديه

تقول شلت بقلبي وسكت وقلت حسبي الله على من ظلمني
ومرت الايام والشهور وهو على ذا الحال ان جاء لقى الترحيب والسنع وان طلع ماسألت عنه

لين انجن الزوج 000 وصحى من غفلته وقال كيف انا تزوجت عليها ؟؟ كيف سويت فيها كذا ؟؟

ورجع لها وباس رجولها وقالها سامحيني هذي نزوه 00 وفعلن رجعت الماء لمجاريها

وصديقتها الخاينه تطلقت ورجعت بيت اهلها ورجع الزوج يعيش مع زوجته وعياله مثل اول وقبل

وعرف قيمتها وصار يدلعها اكثر من اول 00
تقول البنت هذي لو اني انهرت وتركت البيت كان ما رجع لي 00 لكني تحملت وصبرت وتصرفت بعقل وتركت العاطفه

مع اني كنت بموت من القهر 00لكن الله عوض صبري

شفتوا يابنات ذكاء الحريم