ا راعي البترول قرب هنا عب
عب البيوك اللي توليت عبه


واخذه وشيك ناقص زيوته وصب
ومنين ما يقبل به الزيت صبه


شيك تراني ناوي له على نب
درب ثلاث شهور ماني بانبه


عل و عسى ياكود ياليت يا رب
يا رب موضوعي يخلص يا ربه


قد لي وانا قلبي من الشوق يشتب
يشتب من سبه ومن غير سبه


وانا عذابي في الهوى كل ماهب
يزداد شوقي لا تغير مهبه


واسير خطوه واقف شوي وأخب
وانزل من المشراف وارجع واذبه


واطيح لي في علة مالها طب
وامشي مع العالم وعقلي مسبه


با سباب من هو يخطف الحال واللب
ويروح الرجال من دون لبه


اللي جذبني له وانا جيت منصب
وما عاد لي منه وعنه مغبه


ومحبته ماهي مع كل من هب
نذر على رقبتي نذر ما تشبه


ارهى علي بالحب وارهيت بالحب
ويحب حبي مثل ما احب حبه


ويهدي لي لبيه ما قلت له لب
وقلبي يقول ان قال لبيه لبه


واقول يا لبيه ويقول لي ((تشب))
وصدقت من قال المسبه محبه


وراحت علاقتنا كذا سب في سب
واللي يحب اكثر يزيد المسبه


وما ودي ابطي عنه واصد واغب
من خوفتي من قولة ان صد كبه


ودام البيوك مشيك وصاير top
ويطير بي حبه ويرتاح حبه


يا راعي البترول عجل علي عب
يارب موضوعي يخلص ياربه






الشاعر // مبارك ال خليفة