لي متى؟
تكفين قولي لي متى؟
لي متى وانتي بعيده؟
وليمتى وانتي الوحيده
اللي تنور لي حياتي؟
ولي متى أدعي بصلاتي
انك تجين ... وماتجين!؟
ولي متى هذا الحزن؟
ليمتى وانتي الوطن
وقلبي الغريب اللي تمنى
يحضن شوارع ديرته!؟
تكفين قولي لي متى؟
* * * *
لي متى وانتي بغياب؟
لي متى وانتي المسافه
بين عيني والسراب؟
كل ماقربت اوصل .. تطول!
لي متى وحلم الوصول ..
يصرخ .. ولا احدحققه
يحلف .. وقلبي يصدقه
وليمتى كل ما أقول
ان الهموم اللي في قلبي
لابد يجي يوم وتزول ... ماتزول !!
وقلبي يعيد حكايته!
تكفين قولي لي متى؟
* * * *
لي متى وانتي
ملامح مبهمه!؟
لو أشوفك .. ما أعرفك
ولو أعرفك ما أكلمك
ولو أكلمك ..
خوفي يتملك حروفي
ويصبح كلامي تمتمه!
لي متى وانتي مجرد حلم
طول عمري أحلمه!؟
لي متى والحلم يكذب
يكذب .. واصدق كذبته!؟
تكفين قولي لي متى؟
* * * *
صدقيني ..
مهما خذتي من حياتي
ومهما دعا قلبي فصلاتي
انك تجين .. وماتجين
اللي يهمني تعرفين
اني ببقى بانتظارك
مايغيرني عن الحب
الا موتي ..
ولو تظاهرت بسكوتي
حاولي انك تسمعيني
ولما اقول اني اببقى
طول عمري بانتظارك .. صدقيني
ولا تسئليني .. لي متى !؟