من روائع قصائد الشاعر علي بن حمري القحطاني
راية الشعر

ياربي تسهل الامر وتزين ألاحوال = ترانا بلا رحمتك هلكا ومتهاوين
ولا عندنا غيرك ليا صك جال(ن) جال = ضعوف ألاوادم ياقوي فيك متقوين

أبي رحمتك حي وفي القبر وألاهوال = نهار الحساب مشيب الرضع الولدين
لنا حقوق وعلينا حقوق وماحط يشال = زمان يخلي ضاحكينه من الباكين

ماينزل به الراحل ويرحل به النزال = ومواعيدنا واجالنا كل شي بحين
فياحظ من طابت فعايله والاعمال = وياشين حظ أللي لاوحده ولا ثنتين

هبوب الزمان وكنته والبراد اشكال = تقلب به الدنيا واهلها على الجنبين
ولا اصعب على الصاحيين من كثرة الجهال = ولا اقسى على الجهال من سطوة الصاحيين

عسى الله يصيب مدور الشر بالسلال = وعسانا لاظلام ولاحن بمظلومين
ولانطرد المقفي ولانكره الاقبال = ولانخطي اليا صار مانقبل المخطين

لو انهم تناسوا فعلنا مانقص مثقال = من اللي تناسوا جعلهم دايم(ن) ناسيين
ولا تذكرونا غير في حزة الانكال = ليا اشتدت الازمة وخالط صفا الماء طين

نطب الخطر والخوف والموت طب هبال = تقول اننا بمقابل الموت مسترين
بنفنى وتفنى عيالنا بس لانزال = عزاز النفوس اللي على حقنا عيين

على الراس كوفيه ومن فوقها دسمال = ومن فوق دسمالي عقال(ن) يميل يمين
ولو ماتحوش ايماننا مال مانهتال = لو الوقت عاري وجه عشناه مستورين

ابو خمسة لاقل من قيمة ابو ريال = فبو نصف يقدر يقتل احلام بو قرشين
مايوجعك يالسائل سوا جفوة السؤال = ليا صرت تقضي دين ظهرك بمثله دين

ولا فيه بيت(ن) سالم(ن) من بعض الاشكال = وهدامته قله وبنايته كثرين
لنا ماضي وحاظر مانبكي على الاطلال = مايبكي على الاطلال ياكود محرومين

لهم ماضي(ن) حلوى لكن حاظر(ن) بطال = وذولا عرب موتى ولو عادهم حيين
تقل العوايد يوم تتعاقب الاجيال = وسلوم الرجال الاوله تتعب التاليين

ولو نبكي اللي راح ياويل حالي وال = بعد روحوا شيباننا الزحل الوافين
موصيننا بالصدق في القول والافعال = وفي جمعة تهتاب من قوها الطمعين

غدينا شتات وحن عيال(ن) على رجال = رخصنا والاجناب اصبحوا عندنا غاليين
نحب الجمل والحمل ونعذرب الجمال = وهو اللي يقود الزمل من وين اليا لين

من اول يوم إن القل والمال ماينطال = قبل شركة الكهرب تنور بيوت الطين
يوم ان الرفيق اغلى من الروح والمنزال = ويوم ان الرفيق ان غاب نفقده فقد(ن) شين

وذالحين الاخ يقاطع اخوه حيل وحال = ولو حسته الايام ولا غراب البين
اخوي ابن ابوي ان كان مايردع العيال = اليا عال فيني رحت به في ( سند الاثنين )

ابيعه كذا واشرب ورا بيعته فنجال = وانا دون عمري قبل يولد الى ذالحين
جروح العرب تبرى وجرح الاخو قتال = وجرح العرب واحد وجرح الاخو جرحين

ولو يبتلى والله ماخليه لين يهال = علي القبر ولا أنتصر له من الغاويين
يقولون جيبك اكبر اخوانك العقال = وانا اقول وقفة الاخ تسوى كنوز الصين

عطاني الزمن كل شي إلا مره واطفال = عسى الله يكمل زينتي في الحياة امين
لاتحزن ولا تزعل تماسك وهد البال = ترى العاقل اللي يحسب حساب وقته زين

رفيقك تحمل له ثلاث لاشك ثقال = لكن رابعته افطن لها واخذ حق ودين
والاولاد وهبه لاعمام(ن) ولا بخوال = عسى الله يصلح ماعطانا من الجنسين

ياكم بنت هامل جا ولدها بطل الابطال = وكم بنت شيخ(ن) جا ولدها قصير ايدين
زكاة العوال معاكستها زكاة المال = لاطاب إلك واحد فدفن عوالك الباقيين